Suśvietnyja ŚMI nieadnaznačna adreahavali na pieramohu 17-hadovaj Adeliny Sotnikavaj, jakaja stała ŭ čaćvier pieršaj rasijankaj, što zavajavała alimpijskaje zołata ŭ žanočym adzinočnym katańni.
Sotnikava bolš čym na piać bałaŭ apiaredziła karejanku Kim Ju Na, jakaja lidziravała paśla karotkaj prahramy.
Tak, francuzskaja l'Equipe nazvała rašeńnie sudździaŭ addać zołata Sotnikavaj skandalnym. «Z samaha pačatku Alimpijady acenki rasiejcam byli «krychu» zavyšanyja. Pamyłki Pluščanki, Lipnickaj, Trańkova i Vałasažar nie karalisia, ale da hetaha momantu pieramahali zaŭsiody tyja, chto hetaha zasłuhoŭvaŭ. Ale ŭ hety dzień usio nie tak. Sudździ addali Sotnikavaj pieršaje zołata ŭ historyi rasijskaha žanočaha fihurnaha katańnia. Ale jana jaho nie zasłužyła. Heta skandał».
Vydańnie USA Today ukazvaje na toje, što pierad advolnaj prahramaj sudździaŭ z Paŭdniovaj Karei i ZŠA źmianili rasijanka i ŭkrainiec.
Tym nie mienš, amierykanskija vydańni vymušanyja pryznać, što prahrama Sotnikavaj była technična bolš składanaj, čym u jaje susiedak pa podyumie.
«Vystupleńnie Sotnikavaj było vydatnym, ale mnohija ahladalniki ličyli, što Kim Ju Na zasłužyła druhi załaty miedal. Ale ŭsio ž možna paspačuvać abodvum fihurystkam. Kim — adna ź lepšych spartsmienak u historyi. Jana dobra vykonvała ŭsie elemienty, vystupała hracyjozna. Sotnikava ža svajoj charyzmaj zachapiła ŭsiu ŭvahu publiki. A sudździ adčuvajuć, za kaho zaŭziatary. I mižvoli pranikajucca simpatyjaj», — pryznaje New York Times.
Dvuchrazovaja niamieckaja alimpijskaja čempijonka Kataryna Vit raskrytykavała sudździaŭ, jakija addali pieramohu Adelinie. «Ja ahałomšana hetym vynikam, surjozna. Ja nie razumieju, jak tut naohuł ličyli bały. Čamu Sotnikava pieršaja, Kim — druhaja?» — skazała Vit ŭ efiry niamieckaha telebačańnia.
Sami ŭdzielnicy alimpijskaha turniru byli zanadta stomlenymi, kab pra niešta spračacca.
Tym časam bolš za miljon čałaviek patrabujuć adabrać u Sotnikavaj pieramohu Na sajcie shange.org apublikavany adkryty list u adras Mižnarodnaha sajuza kańkabiežcaŭ. Aŭtary lista patrabujuć rasśledavać i pierahledzieć vyniki žanočaj advolnaj prahramy. Pietycyju padpisali bolš za 1,25 młn čałaviek.
«Hetaja niespraviadlivaść była bačnaja ŭsim u śviecie, akramia Rasii. My robim heta nie dla Kim Ju Na, a dla zachavańnia spraviadlivaści ŭ sporcie, jakaja pavinna zajmać centralnaje miesca padčas takoha najbujniejšaha forumu, jak Alimpijskija hulni», — havorycca ŭ paviedamleńni.
Praŭda, paźniej było zajaŭlena, što sudździ nie buduć pierahladać vyniki žanočaha finału ŭ fihurnym katańni.
Ciapier čytajuć
Što za 17-hadovy startapier, jaki vyliŭ cebar chłuśni na Libiera na radaść biełaruskim śpiecsłužbam4
Kamientary