U Minsku ad «marki» ź pieradozam pamior 24-hadovy chłopiec, jaho siabar-prahramist — u Navinkach

Čarhovuju śmierć ad pieradaziroŭki «markami» zafiksavali staličnyja pravaachoŭniki. Na hety raz ad hetaj raznavidnaści papularnych «spajsaŭ» u Pieršamajskim rajonie horada pamior 24-hadovy minčanin, paviedamili ŭ pres-słužbie HUUS Minharvykankama.

Małady čałaviek adpačyvaŭ u kampanii dvuch pryjacielaŭ i dziaŭčataŭ. Adzin ź ich, małady IT-šnik, prapanavaŭ zamović pa internecie partyju «marak» — ich dylery pa-raniejšamu pazicyjanujuć jak «lehalnyja». Spažyli ich usio čaćviora. Ale nieŭzabavie prahramistu, jaki nabyŭ psichatrop, stała drenna, i jon u nieadekvatnym stanie vybieh na vulicu. Śledam pabiehli adzin z chłopcaŭ i dziaŭčyna, jakija tut ža vyklikali tavaryšu bryhadu chutkaj miedycynskaj dapamohi. Zaraz paciarpieły znachodzicca na lačeńni ŭ RNPC psichičnaha zdaroŭja ŭ Navinkach.

Kali para viarnułasia ŭ kvateru, ich 24-hadovy siabar užo nie padavaŭ prykmiet žyćcia. Jak vyśvietliłasia, małady čałaviek pamior ad pieradaziroŭki. Zaraz pa hetym fakcie pravodzicca pravierka.

Śmierci pad kapirku

Načalnik upraŭleńnia pa narkakantroli i procidziejańnia handlu ludźmi MUS Biełarusi Mikałaj Karpiankoŭ raspavioŭ, što ŭsie apošnija vypadki śmierciaŭ ad pieradaziroŭki sintetyčnymi narkotykami zdarylisia paśla ŭžyvańnia sinie-zialonaj «marki» z vyjavaj djabła.

Na jaje naniesieny za ŭsio 0,0234 hrama taho ž sintetyčnaha rečyva, jakoje źmiaščajecca ŭ «spajsie». Ustanoŭlena, što ŭ dziaŭčyny-pieršakurśnicy, jakaja pamierła ad pieradaziroŭki ŭ noč na 14 lutaha, byŭ reaktyŭny aciok mozhu.

Marku kładuć pad jazyk, i pad jaje uździejańniem nastaje nastolki mocnaja ejfaryja, jakaja zdolnaja vyklikać aciok mozhu. Tuju ž sinie-zialonuju «marku» ŭžyvaŭ małady čałaviek, jaki pamior ad mocnych parezaŭ, kali pad uździejańniem narkotyku kinuŭsia ŭ akno.

Akazvajecca, uździejańnie adnoj takoj «marki» ŭ 100 razoŭ pieravyšaje ŭździejańnie hierainu.

Va ŭpraŭleńni pa narkakantroli i procidziejańnia handlu ludźmi MUS adznačajuć, što zaraz asnoŭnymi raspaŭsiudniki hetych sintetyčnych narkotykaŭ źjaŭlajucca narkamany — jany pradajuć «marki» i «spajs», kab zarabić na novuju «dozu» dla siabie.

 «Amal u 60% zatrymańniach asnoŭnym narkotykam źjaŭlajucca «spajs». Z 1300 kryminalnych spraŭ za narkotyki 800 — z nahody kurylnych sumiesiaŭ. Kolki treba, kab jašče pamierła maładych zdarovych ludziej, kab moładź zrazumieła: źjasi hetuju marku — pamreš?» — aburyŭsia Mikałaj Karpiankoŭ.

• 0
• 0
• 0
• 0
• 0
• 0
• 0
• 0