«Urałkalij» rychtujecca da adnaŭleńnia partniorstva ź Biełaruśsiu

Akcyjaniery rasijskaha AAT «Urałkalij» i kiraŭnictva Biełarusi rychtujucca da pieramoŭ ab adnaŭleńni partniorstva, jakija projduć praź miesiac pry ŭdziele Alaksandra Łukašenki. Pra heta paviedamlaje «Kommiersant» sa spasyłkaj na nienazvanyja krynicy.

Jak stała viadoma «Kommiersantu», rasijski bok prapanoŭvaje stvaryć novaha ahulnaha trejdara, zarehistravanaha ŭ Maskvie, uzamien Biełaruskaj kalijnaj kampanii. U kapitale novaha trejdara «Urałkalij» choča atrymać kantrolny pakiet, ale pakul Minsk na heta nie zhodny.

Novyja akcyjaniery «Urałkalija» 5 sakavika ŭpieršyniu publična vykazalisia nakont nastupnych adnosinaŭ pamiž kampanijaj i AAT «Biełaruśkalij», sumiesny trejdynh ź jakim «Urałkalij» razarvaŭ jašče ŭ lipieni 2013 hoda. Kiraŭnik «Aneksima» (27,09% akcyj «Urałkalija») Dźmitryj Razumaŭ zajaviŭ Reuters, što adnaŭleńnie supracoŭnictva «syhraje na ruku» abiedźvium kampanijam i «budzie karysnaje dla suśvietnaha rynku ŭhnajeńniaŭ».

Jak paćvierdziła krynica «Kommiersanta», znajomaja ź situacyjaj, akcyjaniery «Urałkalija» i kiraŭnictva Biełarusi razhladajuć mahčymaść adnaŭleńnia supracoŭnictva i płanujuć u kancy sakavika — pačatku krasavika pravieści pieramovy.

Pavodle jaho słoŭ, sustreča projdzie z udziełam Alaksandra Łukašenki.

Za pieramovy vystupajuć abodva klučavyja saŭładalniki «Urałkalija», jakija stajać na ahulnaj pazicyi, zapeŭnivaje inšaja krynica vydańnia, blizkaja da kampanij.

Rasijski bok, pavodle źviestak krynicaŭ «Kommiersanta», prapanoŭvaje stvaryć novaha adzinaha pastaŭščyka dla «Urałkalija» i «Biełaruśkalija» ŭ Maskvie, z dolami 65% i 35% adpaviedna, «ale pakul hety varyjant biełarusaŭ nie zadavalniaje».

Takaja schiema pracavała da 2005 hoda, nahadvaje vydańnie. Tady «Biełaruśkalij» pradavaŭ bolšuju častku pradukcyi praz maskoŭskaje ZAT «Mižnarodnaja kalijnaja kampanija» (pa 33% akcyj naležali biełarusam, «Urałkaliju» i «Silvinitu»). U 2012 hodzie «Urałkalij» užo prapanoŭvaŭ pieravieści trejdara ŭ inšuju jurysdykcyju abo stvaryć novaha, kab źnizić krainavyja ryzyki i pryciahvać inviestycyi. Baki abmiarkoŭvali prajekt «Sajuzkalij» u Šviejcaryi, ale jon nie byŭ realizavany.

Paśla razryvu sumiesnaha trejdynhu «Urałkaliju» ŭdałosia zachavać značnuju častku rynku.

Ale apošnim časam «Biełaruśkalij» pačaŭ aktyŭnuju pracu pa pošuku spažyŭcoŭ. U lutym jon zaklučyŭ kantrakt ź Indaniezijaj (pa 250 tys. ton u hod ciaham troch hadoŭ), z Kitajem (600 tys. ton da lipienia), z Małajzijaj i navat na rasijskim rynku (z «Fasahra»). Pavodle słoŭ adnaho z surazmoŭcaŭ «Kommiersanta», Biełaruś sprabuje vykarystać rost doli na rynku ŭ jakaści arhumientu dla pašyreńnia doli ŭ budučym SP.

Abjadnańnie trejdynhu pa staroj schiemie moža ŭžo nie adpaviadać intaresam Minska, pakolki jon sam vyjšaŭ na pierśpiektyŭnyja rynki i naraściŭ abjomy prodažu, miarkuje Kanstancin Juminaŭ z Raiffeisenbank.

Prajekt moža pryciahnuć «Biełaruśkalij» tolki vychadam u rehijony tradycyjnaj prysutnaści «Urałkalija», naprykład u Łacinskuju Amieryku, udakładniaje analityk. Pavodle jaho słoŭ, adnaŭleńnie partniorstva nie pryviadzie da chutkaha rostu suśvietnych cen, jakija rezka ŭpali paśla razryvu. Ale kampanii, miarkuje analityk, chutčej za ŭsio, buduć viartacca da adchilenaj «Urałkalijem» aryjentavanaj na canu stratehii, pakolki jana sadziejničaje atrymańniu bolšaj maržy.

Nahadajem, u lipieni 2013 hoda rasijskaja kampanija «Urałkalij» abjaviła pra vychad sa składu sumiesnaha ź Biełaruśsiu ZAT «Biełaruskaja kalijnaja kampanija» (BKK) u suviazi z tym, što biełaruski bok pačaŭ ekspartavać pradukcyju «Biełaruśkalija» ŭ abychod BKK.

5 vieraśnia Alaksandr Łukašenka padpisaŭ ukaz № 399 «Ab udaskanaleńni ekspartu kalijnych uhnajeńniaŭ», u adpaviednaści ź jakim stvorana novaja handlovaja kampanija — AAT «Biełaruskaja kalijnaja kampanija». Na novuju kampaniju ŭskładzieny zadačy, jakija dahetul vykonvała ZAT «BKK», — prodaž kalijnych uhnajeńniaŭ. 

Ukaz byŭ padpisany chutka paśla taho, jak u dačynieńni da hrupy supracoŭnikaŭ staroj kampanii — ZAT «BKK» — u Biełarusi raspačali kryminalnuju spravu, a staršynia nahladalnaha savieta ZAT hiendyrektar AAT «Urałkalij» Uładzisłaŭ Baŭmhiertnier byŭ aryštavany ŭ Minsku. Mieniedžary ZAT «BKK» padazrajucca ŭ złoŭžyvańni ŭładaj i słužbovymi paŭnamoctvami, a taksama ŭ kradziažy. 

Alaksandr Łukašenka raniej abvinavačvaŭ kiraŭnictva i ŭładalnikaŭ «Urałkalija» ŭ nieabhruntavanym dempinhu, jaki ŭpłyvaje na ahulnuju cenavuju situacyju na rynku kalijnych uhnajeńniaŭ. «…Jany źniščyli pradpryjemstva. 900 dołaraŭ była tona kalijnych uhnajeńniaŭ na suśvietnym rynku, siońnia — 230. I jany jašče dempinhujuć, i jašče tańniej pradajuć», — kazaŭ Łukašenka na pres-kanfierencyi rasijskim žurnalistam u kastryčniku.

25 listapada 2013 hoda pieršy namieśnik hiendyrektara «BKK» Alaksandr Palakoŭ, adkazvajučy na pytańnie ab mahčymym adnaŭleńni supracoŭnictva BKK z «Urałkalijem», zajaviŭ: «Dla rynku najaŭnaść damoŭlenaści pamiž biełaruskim i rasijskim bakami — pazityŭnaja, hetaha navat čakajuć. My hatovyja da hetaha, nie zakrytyja».

• 0
• 0
• 0
• 0
• 0
• 0
• 0
• 0