Muziej Bahdanoviča ŭ Minsku aficyjna staŭ filijałam Muzieja historyi biełaruskaj litaratury

Litaraturny muziej Maksima Bahdanoviča ŭ Minsku 1 krasavika aficyjna pierajšoŭ u razrad filijała Dziaržaŭnaha muzieja historyi biełaruskaj litaratury. Razam ź im u skład hetaha muzieja ŭklučany taksama staličny Litaraturny muziej Pietrusia Broŭki. 

Rearhanizacyja hetaj ustanovy nijakim čynam nie paŭpłyvaje na pracu muzieja Maksima Bahdanoviča, adznačyła ŭ interv`iu BiełaPAN ciapier užo były dyrektar muzieja Taćciana Šelahovič. «Supracoŭniki muzieja pradoŭžać svaju štodzionnuju pracu, jakaja zaklučajecca ŭ daśledavańni tvorčaści Maksima Bahdanoviča, papularyzacyi jaho tvorčaści, realizacyi litaraturnych, muziejnych, adukacyjnych prajektaŭ», — skazała jana. 

«Ničoha nie spyniajecca, — zapeŭniła Šelahovič. — Heta ŭsiaho tolki źmianieńnie statusu. Vystavy, mierapryjemstvy, sustrečy i prezientacyi — usio heta budzie. Kalektyŭ litaraturnaha muzieja zrobić usio, kab prosty čałaviek, jaki cikavicca tvorčaściu Maksima Bahdanoviča, adčuŭ niejkaje dušeŭnaje ciapło da hetaha čałavieka, nie zaŭvažyŭ hetych naminalnych biurakratyčnych źmianieńniaŭ». 

U filijale «Litaraturny muziej Maksima Bahdanoviča», pavodle jaje słoŭ, zastałosia pracavać 15 čałaviek z 40 heta «roŭna stolki, kolki nieabchodna dla zabieśpiačeńnia hodnaj pracy filijała».

Šelahovič nahadała, što ŭ składzie samoha muzieja Bahdanoviča byli dva filijały — «Falvarak «Rakucioŭščyna» i filijał «Biełaruskaja chatka». U vyniku rearhanizacyi muziej i dva jaho padraździaleńni stali tryma paŭnacennymi i raŭnapraŭnymi filijałami Dziaržaŭnaha muzieja historyi biełaruskaj litaratury. 

Tym nie mienš, ličyć jana, byłym filijałam muzieja Bahdanoviča ciapier patrebnaja «čałaviečaja padtrymka», tamu što «mahčymaści filijała «Litaraturny muziej Maksima Bahdanoviča» na 100% pieravyšajuć mahčymaści filijała «Biełaruskaj chatki» abo «Falvarka «Rakucioŭščyna». 

«Zaŭsiody tut, pa adrasie vulica Bahdanoviča, 7a, byŭ centr navukovaj, daśledčaj, źbiralnaj pracy. Heta byŭ jak reaktar na atamnaj stancyi, jaki vypracoŭvaŭ samaje nieabchodnaje dla žyćciadziejnaści ŭsich astatnich ahrehataŭ. Byłyja filijały muzieja na siońnia pazbaŭlenyja vopytu samastojnaj pracy i materyjalnaj bazy. U Rakucioŭščynie ciapier niama ni kamp`iutara, ni faksa, tam piačnoje aciapleńnie na drovach», — padkreśliła jana. 

Nahadajem, rearhanizacyja litaraturnych muziejaŭ Maksima Bahdanoviča i Pietrusia Broŭki była zaćvierdžana zahadam Ministerstva kultury ad 4 studzienia 2014 hoda, adnak infarmacyja ab panižeńni statusaŭ hetych muziejaŭ ź`iaviłasia jašče ŭ kancy minułaha hoda.

Tady pradstaŭniki tvorčaj intelihiencyi zaklikali ŭrad pierahledzieć hetaje rašeńnie. U śniežni minułaha hoda asobnyja kulturnyja i hramadskija dziejačy praviali na hanku muzieja Bahdanoviča niekalki akcyj u padtrymku muzieja, jakija nie źbirali vialikaj kolkaści ludziej. Na hetych akcyjach tradycyjna prysutničali supracoŭniki pravaachoŭnych orhanaŭ, adnak udzielniki mierapryjemstvaŭ nie zatrymlivalisia.

• 0
• 0
• 0
• 0
• 0
• 0
• 0
• 0