U kijeŭskim hateli «Chiłtan» pačalisia hazavyja pieramovy pamiž kiraŭnikami «Naftahaza» i «Hazproma»
U pieramovach biaruć udzieł kiraŭnik «Hazproma» Alaksiej Miler i kiraŭnik praŭleńnia NAK «Naftahaz Ukrainy» Andrej Kobaleŭ, a taksama ministr enierhietyki i vuhalnaj pramysłovaści Ukrainy Juryj Prodan i Jeŭrakamisar Hiunter Etynhier.
Kiraŭnik «Hazproma» Alaksiej Miler prybyŭ u hatel «Chiłtan» kala 20.50. Za 20 chvilin da źjaŭleńnia Milera na sustreču prybyŭ ministr Prodan.
U intervju žurnalistam Prodan zajaviŭ, što padčas pieramoŭ rasijski bok moža pamianiać svaju pazicyju pa canie na haz.
Jak paviedamlałasia, premjer-ministr Ukrainy Arsienij Jacaniuk daručyŭ z paniadziełka, 16 červienia, pierachodzić na płan funkcyjanavańnia enierhietyčnaj haliny va ŭmovach spynieńnia pastavak rasijskaha hazu.
Padčas papiarednich pieramovaŭ na pačatku červienia Rasija narešcie prapanavała Ukrainie haz pa canie $385 za tysiaču kubamietraŭ z ulikam źnižki $100.
Adnak Ukraina admoviłasia ad prapanovy «Hazproma», pakolki rasijski ŭrad, pavodle Jacaniuka, u luby momant moža admovicca ad hetaj skidki.
Taksama Jacaniuk zajaviŭ, što Ukraina nastojvaje na canie $268 za 1 tys. kubamietraŭ.
13 červienia kiraŭnik praŭleńnia NAK «Naftahaz Ukrainy» Andrej Kobaleŭ zajaviŭ, što jeŭrapiejskija kampanii prapanujuć Ukrainie nabyvać u ich haz pa canie nižej $326 za tysiaču kubamietraŭ i Ukraina płanuje pahadzicca na hetyja prapanovy.
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary