U druhim kvartale popyt na spažyvieckija kredyty ŭ Biełarusi źniziŭsia. Ab hetym śviedčać źviestki aficyjnaj statystyki.
25 krasavika hetaha hoda nabyło moc rašeńnie Nacbanka ab uviadzieńni zabarony na vydaču spažyvieckich kredytaŭ nasielnictvu biez daviedak ab dachodach.
Na hetym fonie ŭ druhim kvartale hoda, pavodle źviestak Nacbanka, abjom rynku spažyvieckaha kredytavańnia staŭ skaračacca. Tak, užo ŭ krasaviku pryrost zapazyčanaści nasielnictva pa spažyvieckich kredytach źniziŭsia ŭ 2,5 razu ŭ paraŭnańni z sakavickim pakazčykam.
Kali ŭ sakaviku zapazyčanaść nasielnictva pa rublovych spažyvieckich kredytach vyrasła na 216,5 młrd. rubloŭ, to ŭ krasaviku — tolki na 83,7 młrd.
U mai zafiksavana admoŭnaja dynamika hetaha pakazčyka — abjom zapazyčanaści fizasob pa spažyvieckich kredytach źniziŭsia za apošni miesiac viasny na 99,8 młrd. rubloŭ.
Skaračeńnie popytu na spažyvieckija kredyty paśla rašeńnia Nacbanka ab abaviazkovym pradstaŭleńni kredytaatrymalnikami daviedak ab dachodach było prahnazavanym.
«Čałaviek, vykazaŭšy žadańnie ŭ mahazinie ažyćciavić impulsnuju pakupku ŭ kredyt, nie zmoža hetaha zrabić, bo daviedajecca, što dla afarmleńnia kredytu patrebna daviedka ab dachodach. Vidavočna, heta źnizić dastupnaść ekspres-kredytaŭ», — prahnazavaŭ u kamientary BiełaPAN top-mieniedžar adnaho z bankaŭ zabaronu rehulatara, jakaja rychtavałasia na toj momant.
Zabarona na vydaču spažyvieckich kredytaŭ biez daviedak ab dachodach moža być abumoŭlena imknieńniem finansavych uładaŭ abmiežavać spažyviecki impart, havorać ekśpierty.
Jany źviartajuć uvahu na toje, što kurs Nacbanka na zhortvańnie ekspres-kredytavańnia adpaviadaje hrašova-kredytnaj palitycy, jakaja pravodzicca uładami i praduhledžvaje abmiežavańnie abjomaŭ kredytavańnia ekanomiki. Zhodna z adnoj ź viersij, zabarona Nacbanka mahła taksama stać reakcyjaj na zvaroty hramadzian, jakija nie zmahli pahašać kredyty i pradjaŭlali dziaržorhanam šmatlikija pretenzii z suviazi z vysokim koštam spažyvieckich pazyk.
Na dumku bankiraŭ, u suviazi z zabaronaj na vydaču kredytaŭ biez daviedak ab dachodach moža pavialičycca popyt na kredytnyja karty bankaŭ. Dla atrymańnia takich kart nieabchodna adzin raz (pry afarmleńni) pradstavić daviedku ab dachodach i potym možna kuplać tavary ŭ kredyt nieabmiežavanuju kolkaść razoŭ. Pry zaklučeńni dahavora na atrymańnie karty ŭkazvajecca limit avierdrafta (maksimalnaja suma pradastaŭleńnia kredytu), jaki moža atrymać trymalnik karty.
Kamientary