Zahinułyja na Kamčatcy biełarusy byli siabrami kłuba amataraŭ aktyŭnaha adpačynku

Zahinułyja pry ŭzychodžańni na vułkan Kamień va Uść-Kamčackim rajonie RF hramadzianie Biełarusi Siarhiej Frankoŭski i Andrej Krupadzioraŭ byli siabrami kłuba amataraŭ aktyŭnaha adpačynku Magadan.by.

Jak paviedamiŭ staršynia Biełaruskaj fiederacyi alpinizmu Alaksandr Hadleŭski, jany ŭvachodzili ŭ skład turystyčnaj hrupy, jakaja była arhanizavanaja ŭ pačatku lipienia dla ekśpiedycyi na Kamčatku. Kiraŭnikom hrupy byŭ Frankoŭski. 

«Alpinisckaha vopytu ŭ ich nie było, jany nie źjaŭlajucca alpinistami, siabrami našaj alpinisckaj fiederacyi, nie stali ŭ nas na ŭlik, jany amatary ekstremalnych padarožžaŭ, — raskazaŭ Hadleŭski. — My navat nie viedajem, ci zastrachavali jany svaje žyćci, ci zarehistravalisia jany ŭ słužbie MNS na miescy».

Pavodle słoŭ Hadleŭskaha, u ekśpiedycyju adpraviłasia vosiem biełarusaŭ — piaciora mužčyn i try žančyny, u tym liku žonki zahinułych, Taćciana Frankoŭskaja i Kaciaryna Krupadziorava.

U svaju čarhu, pres-sakratar pasolstva Biełarusi ŭ RF Alaksandr Hardziejčyk paviedamiŭ BiełaPAN, što pry ŭzychodžańni na vułkan Kamień biełarusy vybrali «vielmi składany maršrut». Da taho ž, čas byŭ vybrany niaŭdała. «Pavodle acenak miascovych ekśpiertaŭ, alpinisty chodziać pa hetych miescach da maja, kali mocny lod», — skazaŭ jon.

Hardziejčyk adznačyŭ, što paśla publikacyi ŭ ŚMI infarmacyi ab trahiedyi kiraŭnik adździaleńnia pasolstva Biełarusi ŭ Chabaraŭsku Uładzimir Maksimaŭ «adrazu źviazaŭsia z rasijskim MNS i pahutaryŭ z hubiernataram Kamčackaha kraju Uładzimiram Iluchinym». «Padčas hutarki biełaruski dypłamat paprasiŭ hubiernatara ŭziać pad asabisty kantrol rasśledavańnie hetaj trahiedyi», — raskazaŭ pradstaŭnik pasolstva.

Pošuki zahinułych prachodzili ŭ składanych klimatyčnych umovach, u ich byli zadziejničanyja nie tolki ratavalnyja hrupy, ale i viertaloty. Cieły biełarusaŭ byli znojdzienyja ŭ noč na 14 lipienia, adznačyŭ Hardziejčyk. «Cieły dahetul znachodziacca na ŭschodnim schile vułkana Kamień va Uść-Kamčackim rajonie, tamu što z-za składanych umoŭ nadvorja ciažka dastavić ich na viertalocie ŭ bazavy łahier «Kamień», — patłumačyŭ Hardziejčyk. 

Jak paviedamlałasia raniej, hrupa z vaśmi biełaruskich turystaŭ adpačyvała ŭ rajonie Klučeŭskaj hrupy vułkanaŭ, nie zarehistravaŭšysia ŭ miascovym adździaleńni MNS. Ranicaj 9 lipienia dvoje mužčyn z hrupy adpravilisia ažyćciaŭlać uzychodžańnie na vułkan Kamień, ale ŭ pryznačany čas u łahier nie viarnulisia. Astatnija šeść čałaviek sprabavali arhanizavać samastojny pošuk, ale jon nie prynios pośpiechu, tamu 11 lipienia turysty źviarnulisia pa dapamohu ŭ MNS. 

14 lipienia ratavalniki znajšli cieły źnikłych turystaŭ na ŭschodnim schile vułkana na vyšyni kala 3.400 mietraŭ nad uzroŭniem mora. Pavodle źviestak Śledčaha kamiteta RF pa Kamčackim krai, turysty byli źviazanyja pamiž saboj alpinisckim ryštunkam, i, pavodle papiaredniaj viersii, adzin z mužčyn, sarvaŭšyja ź lednika, paciahnuŭ za saboj svajho naparnika, u vyniku čaho abodva ŭpali z vyšyni.

• 0
• 0
• 0
• 0
• 0
• 0
• 0
• 0