Eks-kiraŭnik «Biełnaftachima» Žylin sprabavaŭ źjechać u Maskvu, ale byŭ zatrymany
Hienprakuratura Biełarusi padazraje byłoha staršyniu kancerna «Biełnaftachim» Ihara Žylina ŭ złoŭžyvańni słužbovymi paŭnamoctvami.
Pavodle krynic partała TUT.BY, Žylin abo jaho žonka nibyta vykarystoŭvali słužbovy mabilny telefon u svaich asabistych metach. U vyniku nahavaryli na sumu bolš za 10 tysiač dołaraŭ.
Akramia taho, byli pytańni ŭ siłavikoŭ i da jaho prastornaj kvatery, za jakuju vypłačvałasia vysokaja, na ich dumku, arendnaja płata.
«Ihar Fiodaravič — čałaviek maskoŭski. Niahledziačy na ŭzrost (73 hady) lubić kamfort. Žonka ŭ jaho simpatyčnaja, dosyć maładaja. Čałaviek, vierahodna, staraŭsia, kab siamji było dobra», — raspavioŭ surazmoŭca.
Pavodle słovaŭ krynic TUT.BY, «da prafiesijnych jakaściaŭ nie było pytańniaŭ, u jaho dziejańniach nie było niejkaha žudasnaha kryminału, tamu dziŭnym vyhladaje źmiaščeńnie jaho pad vartu».
Ihar Žylin kiravaŭ «Biełnaftachimam» ź lutaha 2011 hoda. Raniej u 2009—2011 hh. uznačalvaŭ «Hrodna Azot». Da pierajezdu ŭ Biełaruś Žylin, tady hramadzianin RF, pracavaŭ na chimičnych pradpryjemstvach u Rasii, Ukrainie, Uźbiekistanie i Hruzii.
Treciaha lipienia była apublikavanaja pastanova ŭrada ad 30 červienia, zhodna ź jakoj staršynia kancernu «Biełnaftachim» Ihar Žylin byŭ vyzvaleny ad zajmajemaj pasady. Pryčyna adstaŭki ŭ dakumiencie nie nazvana.
Pavodle infarmacyi krynic, daviedaŭšysia 1 lipienia ab svajoj adstaŭcy Žylin paśpiašaŭsia ŭ Maskvu, ale byŭ zatrymany biełaruskimi siłavikami.
Pavodle infarmacyi «Našaj Nivy» Ihar Žylin byŭ adnym z atrymantaŭ elitnaj ziamli ŭ Viaśnincy («Drazdy-2»).
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary