Hurt «Krama» napiaredadni žyvoj prezientacyi alboma «Biełaja vada» zapuściŭ novy sajt kramaband.by, na jakim siarod inšaha možna znajści małaviadomyja videa hurtu. Pra staryja pieśni i klipy na teleekranie «Naša Niva» parazmaŭlała ź lideram hurta Iharam Varaškievičam.
U śpisie klipaŭ «Kramy» na novym sajcie nie tolki śviežaja «Dziaŭčynka» i viadomaja 3D-animacyja na «Padaje Doždž». Jość i amal nieviadomyja klipy na «Nieba» dy «Mein Vaterland, auf Wiedersehen» z papiaredniaj płytki «Usio žyćcio — dziŭny son», i sapraŭdnyja siurpryzy, jak «Homielski vals» z hurtami «Pałac» i «Siabry» dy «Bella Ciao» pa-italjansku.
«Heta byli takija prajekty Jahora Chrustalova, i heta było padčas pieršaj zabarony praktyčna ŭsich biełaruskamoŭnych hurtoŭ», — pryhadvaje Varaškievič pra «Bella Ciao», što niekali kruciłasia pa biełaruskim TV. «Heta była nie adna pieśnia. Jašče była «Pryhažunia», heta «Pretty Woman» Orbisana pa-biełarusku, «Siuzanna» była jašče na biełaruskaj movie».
Ciapier klipy «Kramy» — što staryja, što novyja — nie pabačyć na teleekranie. «Viedaju tolki, Siaržuk Truchanovič [hitaryst «Kramy». — NN] skazaŭ mnie, što arhanizatar kancertu źviartaŭsia da telekampanij biełaruskich, kab źniać kancert. Usie admovili, skazali, što heta nie cikavić», — raspaviadaje lidar «Kramy».
Ci źbirajecca hurt znoŭ patrapić na TV? «Nie viedaju, mahčyma heta ci nie. U mianie asablivaha žadańnia niama, chacia heta patrebna, kab ludzi viedali…» — miarkuje Varaškievič.
«Niama pieradač, kudy my mahli patrapić. Jany ŭžo daŭno usie źnikli, pieradačy pra rok-muzyku. Niejkija muzyčnyja kanały, chacia tam praktyčna adna papsa krucicca».
Na novym sajcie kramaband.by možna taksama pačytać naviny hurta, pahladzieć archiŭnyja fota i pasłuchać abranyja pieśni z amal 25-hadovaj tvorčaści hurta. Za stvareńnie sajta hurt vykazvaje padziaku Linie Žarskaj.
Metanakiravanaj raskrutki ŭ internecie na Biełaruś ci zamieža hurt nie viadzie.
«Jak heta nie śmiešna, sajt u nas byŭ kaliści, ale potym zakinuli heta ŭsio. Tak jaho pa siońniašni dzień i nie było.
Ja pa-prostu pieśni pišu, a takija arhanizacyjnyja rečy asablivanikoli nie vyrašaŭ», — śmiajecca jon. Sam Ihar Varaškievič, jak i inšyja ŭdzielniki hurta, karystajecca internetam, u tym liku adkazvaje fanatam na paviedamleńni na svajoj staroncy ŭ Facebook.
Prezientacyja novaha albomu «Biełaja vada» projdzie 28 listapada ŭ Pałacy čyhunačnikaŭ, kvitki na kancert možna kupić tut.
Kamientary