U Biełarusi ŭzrastaje piensijnaja nahruzka na pracazdolnaje nasielnictva
U Biełarusi pavialičvajecca piensijnaja nahruzka na pracazdolnaje nasielnictva. Ab hetym paviedamiła siońnia na pres-kanfierencyi namieśnik staršyni Nacyjanalnaha statystyčnaha kamiteta Alena Kucharevič.
«Asnoŭnaj tendencyjaj źmianieńnia ŭzrostavaj struktury nasielnictva źjaŭlajecca pavieličeńnie doli nasielnictva va ŭzroście starejšym za pracazdolny (u žančyn — 55 hadoŭ, u mužčyn — 60 hadoŭ) i źmianšeńnie va ŭzroście maładziejšym za pracazdolny (0-15 hadoŭ). Kolkaść ludziej starejšych za pracazdolny ŭzrost u ahulnaj kolkaści nasielnictva raście bolš chutkimi tempami, čym kolkaść ludziej maładziejšych za pracazdolny ŭzrost», — adznačyła Alena Kucharevič.
U krainie na pačatak 2015 hoda kolkaść asob maładziejšych za pracazdolny ŭzrost skłała 1,6 młn čałaviek (za minuły hod jana pavialičyłasia na 30,1 tys. čałaviek). Kolkaść nasielnictva starejšaha za pracazdolny ŭzrost na pačatak biahučaha hoda dasiahnuła 2,3 młn čałaviek (za 2014 hod jana pavialičyłasia na 45,7 tys. čałaviek). Siońnia amal kožny čaćviorty žychar respubliki — starejšy za pracazdolny ŭzrost, u toj čas jak u 2000 hodzie im byŭ amal kožny piaty, kanstatavała pradstaŭnik Biełstata.
Dola nasielnictva ŭ pracazdolnym uzroście pa-raniejšamu davoli vialikaja, choć nazirajecca tendencyja źmianšeńnia. Na pačatak biahučaha hoda kolkaść hetaj uzrostavaj hrupy nasielnictva skłała 5,6 młn čałaviek (58,6 pracenta ad ahulnaj kolkaści nasielnictva) i za hod źmienšyłasia na 63 tys. čałaviek.
«Prablematyčnaj u budučym bačycca situacyja z papaŭnieńniem pracoŭnych resursaŭ, — ličyć Alena Kucharevič. — Heta abumoŭlena tym, što ŭ pracazdolny ŭzrost buduć ustupać niešmatlikija hrupy dziaciej, narodžanych u kancy 1990-ch - pačatku 2000-ch hadoŭ». Na pačatak biahučaha hoda kolkaść 15-hadovych padletkaŭ, jakija praz hod dasiahnuć pracazdolnaha ŭzrostu, skłała 91 tys., a ludziej, jakija vybyvajuć z hetaha ŭzrostu (59-hadovych mužčyn i 54-hadovych žančyn), naličvajecca 142 tys.
U dalejšym dyspraporcyja jašče bolš uzmocnicca: kolkaść dziaciej, jakija znachodziacca ciapier va ŭzroście 10-14 hadoŭ, składaje 443 tys., a kolkaść nasielnictva pieradpiensijnaha ŭzrostu (5 hadoŭ da vychadu na piensiju) — 720 tys. čałaviek.
Pramym śviedčańniem demahrafičnaha stareńnia nasielnictva źjaŭlajecca źmianieńnie ŭ struktury nahruzki na pracazdolnaje nasielnictva. Pakazčyk piensijnaha ciažaru na 1000 asob pracazdolnaha ŭzrostu pavialičyŭsia z 370 čałaviek starejšych za pracazdolny ŭzrost u 2000 hodzie da 403 čałaviek u 2014 hodzie. Pakazčyk zamiaščeńnia pracoŭnych resursaŭ za hety pieryjad źmienšyŭsia z 356 asob maładziejšych za pracazdolny ŭzrost da 281 čałavieka.
Kamientary