Pryznačeńnie Saakašvili vyklikała ŭ Rasii isteryku 

Pra pieršyja dni Michaiła Saakašvili ŭ Adesie, reakcyju na heta rasijskaj prapahandy my pahavaryli z hałoŭnym redaktaram samaha papularnaha adeskaha sajta Dumskaya.net Aleham Kanstancinavym.

«Naša Niva»: Jak u Adesie ŭspryniali pryznačeńnie Michaiła Saakašvili hubiernataram vobłaści?

Aleh Kanstancinaŭ: Pieršapačatkova navina, kaniečnie, šakavała. My navat padumali — heta žart. Bolšaść adesitaŭ uspryniała heta sa strymanym aptymizmam. Usio ž novaja asoba, nijak nie źviazanaja ź miascovym palitykumam. Heta daje spadziavańnie, što sistema kiravańnia vobłaściu budzie nie na karyść peŭnamu kłanu, a ŭ interasach usiaho rehijona.

Libieralna nastrojenyja ludzi ŭspryniali heta z zachapleńniem, azirajučysia na Hruziju. Jany spadziajucca, što spadaru Saakašvili ŭdasca paŭtaryć svoj hruzinski dośvied. Ekśpierty bolš strymanyja, bo hubiernatar — heta nie prezident dziaržavy z pasłuchmianym parłamientam. Hubiernatar — heta adzin z čynoŭnikaŭ, ad jakoha nie tak šmat zaležyć u našych umovach. Nivodnaje vialikaje rašeńnie: ekanamičnaje, pa pytańniach ułasnaści, biudžetu — biez padtrymki abłasnoj rady niemahčymaje. A na siońnia bolšaści ŭ abłradzie ŭ nas niama. Tam vialikaje značeńnie majuć byłyja rehijanały, jakija nastrojeny krajnie krytyčna da Michaiła Saakašvili.

Novamu hubiernataru budzie niaprosta. Ź inšaha boku, nakolki mnie viadoma, Piatro Parašenka daŭ surjozny kart-­błanš Saakašvili na naviadzieńnie paradku ŭ Adeskim rehijonie. Voś apošniaje pryznačeńnie kiraŭnika Adeskaj abłasnoj milicyi pra heta śviedčyć: im staŭ były namieśnik kiraŭnika MUS Hruzii Łordkipanidze. Za Saakašvili siońnia staić uvieś dziaržaŭny aparat, siłaviki taksama buduć kaardynavacca ź im.

«NN»: Havaryłasia ab skaračeńni čynavienskaha aparatu.

AK: Heta pakul tolki namiery. Była zajava pra zamienu kiraŭnictva 24 z 27 rajonaŭ vobłaści. Nasamreč, heta rasijskija ŚMI tak interpretavali. Bo na siońnia ŭ Adeskaj vobłaści niama 24 kiraŭnikoŭ rajona, a jość vykanaŭcy abaviazkaŭ. I takaja vyčvarnaja forma kiravańnia ŭ nas ciahnułasia ceły hod. Zvyčajna ŭ kiraŭnika vobłaści jość pieršy namieśnik, jaki adkazvaje za ekanamičny błok, namieśnik pa ahrarnaj palitycy, pa budaŭnictvie. U byłoha hubiernatara Palicy nie było namieśnikaŭ. Rolu namieśnikaŭ ihrali daradcy — heta čynoŭniki, jakija trapili pad lustracyju i nie mieli prava bližejšyja 10 hadoŭ zajmać kirujučyja pasady. Heta spadar Kučuk, jaki byŭ namieśnik kiraŭnika Kijeŭskaj abłasnoj administracyi i syhraŭ u padziejach na Majdanie nieadnaznačnuju rolu. I spadarynia Čehadar, były vice­hubiernatar, jakaja traplała pad zakon ab ačyščeńni ŭłady. Nichto nie razumieŭ, chto za što adkazvaje. Sam spadar Palica bolšaść času pravodziŭ nie va Ukrainie, a ŭ Šviejcaryi. Poŭnaje varjactva.

«NN»: Karupcyja — heta hałoŭnaja prablema, ź jakoj budzie zmahacca Saakašvili?

AK: Usie kažuć pra baraćbu z karupcyjaj. Ale ž karupcyju nie moža pieramahčy adzin asobna ŭziaty hubiernatar, navat kali heta Saakašvili. Heta patrabuje namahańniaŭ usich halin ułady. Hubiernatar u nas ža nie moža navat zvolnić načalnika milicyi, nie moža ŭździejničać na mytniu i padatkovuju słužbu. Jon moža źmianić situacyju tolki ŭ svaim viedamstvie, spynić kaznakradstva, moža ŭździejničać na meraŭ haradoŭ, dzie kvitnieje karupcyja. Ale adzin jon nie adužaje karupcyju.

«NN»: U Rasii pryznačeńnie Saakašvili vyklikała šał.

AK: Pryznačeńnie Saakašvili vyklikaje ŭ našych byłych siabroŭ z Rasii stan blizki da isteryki. Jany jaho bajacca strašna. Bo heta ščyry čałaviek. Čałaviek, jaki vajavaŭ z Rasijaj. Heta čałaviek, jaki nienavidzieć nie ruskich, jon nie rusafob, a Rasiju jak ahresiŭnuju, aŭtarytarnuju impieryju, jakaja pahražaje samomu isnavańniu Hruzii i Ukrainy. Kali praciŭnik ciabie baicca, to ty napałovu pieramoh. Adeskaja vobłaść — heta klučavy rehijon Ukrainy, naŭrad ci našy siabry z Maskvy tut niešta ŭžo zrobiać, ale stabilnaść u Adesie — zaruka stabilnaści va ŭsioj Ukrainie.

Rasijskaja prapahanda šmat čaho kaža, naprykład, što pa adeskich vulicach chodziać złyja nacysty, palać usich. Ich słuchać — siabie nie pavažać.

«NN»: A dzie žyvie Saakašvili ŭ Adesie?

AK: Heta infarmacyja źjaŭlajecca zakrytaj. Ale pa našych dadzienych, jon žyvie ŭ domie pryjomaŭ abłasnoj administracyi. Jon achoŭvajecca, ale za im uzbrojeny śpiecnaz nie chodzić. Jon niekalki razoŭ hulaŭ pa horadzie, razmaŭlaŭ z adesitami, fatahrafavaŭsia, jon bolš adkryty za papiarednich hubiernataraŭ. Šykoŭnaha asabniaka ŭ Adesie jon nie maje.

• 0
• 0
• 0
• 0
• 0
• 0
• 0
• 0