Biełaruski braniavik «Kajman» nie sastupić rasijskamu «Tyhru»
Barysaŭski 140-vy ramontny zavod raspracavaŭ i vyrabiŭ mabilny braniravany transpartny srodak (MBTS) «Kajman» na bazie savieckaj BRDM-2 (braniravanaja vyviedna-dazornaja mašyna), paviedamiła hazieta Minabarony Biełarusi «Vo słavu Rodiny».
«Kajman», fota vsr.mil.by
Radykalnaja madernizacyja mašyny, stvoranaj jašče ŭ pačatku 1960-ch hadoŭ, była praviedzienaja ŭsiaho za 4 miesiacy pad kiraŭnictvam hałoŭnaha kanstruktara zavoda -0 Volhi Piatrovaj.
Za asnovu byŭ uziaty korpus BRDM, adnak ciapier pra jaho nahadvaje tolki vostry nos płavajučaj mašyny. Płanujecca, što jana budzie vykarystoŭvacca dla vyviedki, dyviersijnych apieracyj, patrulavańnia i achovy transpartnych kałon, padčas miratvorčych i milicejskich apieracyj, dziejańniaŭ u ŭmovach nadzvyčajnych situacyj.
«Kajman» atrymaŭ dyzielny ruchavik D-245 z elektronnaj sistemaj kiravańnia padačaj paliva, piacistupienievuju tranśmisiju, niezaležnuju tarsijonnuju padviesku.
Atrymałasia mašyna poŭnaj vahaj nie bolš za 7 ton (z 6 bajcami i ŭzbrajeńniem), jakaja maje chutkaść da 110 km/h pa šašy i zapas choda da 1000 km. Zamiest viežy «Kajman» atrymaŭ pavarotny pahon dla ŭstanoŭki kulamiota PKS, hranatamiota AHS ci inšaha bajavoha modula.
« Z anałahaŭ, jakija jość na rynku, hety ŭzor budzie kankurentazdolnym va ŭsich pakazčykach. Zavadskija vyprabavańni pakazali, što pa taktyka-techničnych charaktarystykach «Kajman» nie sastupaje rasijskamu «Tyhru» (bronieaŭtamabil). Da taho ž zrobleny naš mabilny transpartny srodak praktyčna na bazie ajčynnych kamplektujučych, što zaŭvažna paŭpłyvaje na košt mašyny», — skazaŭ namieśnik dyrektara zavoda Leanid Maškoŭski.
HAZ-2330 «Tyhr» — rasijski vajenny bronieaŭtamabil padvyšanaj prachodnaści, maje poŭnuju vahu 5,3 t, chutkaść da 125 km/h. Niekalki «Tyhraŭ» byli pradadzienyja ci pieradadzienyja Biełarusi na nieviadomych umovach.
Ciapier «Kajman» prachodzić vajskovyja vyprabavańni.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary