Dziaržaŭnyja telekanały štodzień aśviatlajuć chod pieradvybarnaj honki. U kadr traplajuć pikiety ŭsich kandydataŭ, ale asnoŭnaja ŭvaha nadzialajecca padtrymcy Alaksandra Łukašenki. Astatnich kandydataŭ pieravažna apisvajuć niejtralna, zhadvajučy tolki ich proźviščy.
Adnak telekanał ANT pierajšoŭ da łabavoj ataki. Aŭtarskaja prahrama «Kak jesť» Alaksieja Michalčanki (u svoj čas byŭ u «čornym śpisie» Jeŭrasajuza) była pryśviečanaja kandydatu ad AHP Anatolu Labiedźku.
«Słovy kiraŭnika dziaržavy pra toje, što vybarcam buduć sprabavać viešać łokšynu na vušy, — bahaty palityčny vopyt. Doŭha čakać nie daviałosia. 22 lipienia inšy pretendent, Anatol Labiedźka, adpraviŭsia da prachadnoj MTZ», — pačaŭ viadučy.
Michalčanka pryznajecca, što sam nie prysutničaŭ na mierapryjemstvie, tamu začytvaŭ cytaty z repartaža na Tut.by, dadajučy svaje kamientary.
Viadučy nahadvaje, što na emblemie AHP namalavany koń, i nadzvyčaj daścipna žartuje: «Luby pachod Labiedźki možna nazvać «chod kaniom». 22 lipienia hetaje niaparnakapytnaje zaniesła na prachadnuju MTZ».
Michalčanka adznačaje, što bolšaść patencyjnych vybarcaŭ nijak nie adreahavała na pikiet Labiedźki: «Jon abiacaŭ miljon novych pracoŭnych miescaŭ, a tysiačy ludziej prachodzili mima».
Što aburyła viadučaha, dyk heta fraza lidara AHP pra transnacyjanalnyja karparacyi, jakija mahli b stvaryć pracoŭnyja miescy ŭ Biełarusi. «Čamu ź Litvy i Łatvii źjazdžajuć u pošukach choć niejkaj pracy sotni tysiač čałaviek? Tam ža najlepšyja ŭ śviecie jeŭrapiejskija sudy i zakony», — «iraniziravaŭ» Michalčanka.
Naprykancy ANT cytuje Alaksandra Fiadutu, jaki raić Labiedźku i jahonamu pakaleńniu sychodzić z palityki paśla vybaraŭ.
«Mnie asabliva spadabaŭsia skaz: «Nieŭzabavie listoŭki i haziety skončylisia, i Labiedźka staŭ davać intervju». Adrazu zachaciełasia dapisać: «A kali skončylisia intervju, staršynia AHP uzarvaŭ siabie apošniaj hranataj», — praciahvaŭ «adpalvać» Michalčanka, udakładniŭšy, što pažartavaŭ.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary