«Nie dazvolcie źnievažać nastaŭnikaŭ!» Napiaredadni vybaraŭ Taćciana Raviaka źviarnułasia z adkrytym listom da ministra Žuraŭkova

Pradstaŭnica pravaabarončaha centra «Viasna» Taćciana Raviaka nakiravała elektronny zvarot ministru adukacyi Biełarusi.

U liście da Michaiła Žuraŭkova pravaabaronca źviartaje ŭvahu na fakty prymusu nastaŭnikaŭ da ŭdziełu ŭ falsifikacyi vynikaŭ prezidenckich vybaraŭ u Biełarusi. Tekst lista Taćciana Raviaka raźmiaściła na svajoj staroncy ŭ «Fejsbuku»:

«Michaił Anatoljevič, ciapier, jak Vy viedajecie, idzie kampanija vybaraŭ prezidenta Biełarusi. Raspaviadu Vam historyju adnoj nastaŭnicy ź vielmi dobraj mienskaj himnazii. Ź siońniašniaha dnia, paniadziełka, jana adklikanaja z adpačynku na tydzień, bo jaje ŭklučyli (źviartaju ŭvahu — uklučyli, a nie jana dobraachvotna ŭvajšła) u inicyjatyŭnuju hrupu dziejnaha prezidenta. Jana abaviazanaja sabrać 200 podpisaŭ.

Adzinaje, čaho ŭdałosia joj damahčysia — kab dazvolili nie stajać u pikietach, a źbirać podpisy pa kvaterach. I heta pry tym, što hetaja nastaŭnica nikoli nie była prychilnicaj dziejnaha prezidenta i ni razu za jaho nie hałasavała.

Padčas minułych vybaraŭ u 2010 hodzie hetaja nastaŭnica była ŭklučanaja va ŭčastkovuju kamisiju. Hałasavała jana za A. Sańnikava i padčas padliku ličyła častku stosaŭ biuleteniaŭ za hetaha kandydata. Naličyła 70, a kali ŭ vynikovym pratakole ŭbačyła ahulnuju ličbu 14, to aburyłasia i admoviłasia jaho padpisvać. Pratakoł padpisali za jaje. A potym ź joj była surjoznaja razmova. Joj naŭprost skazali, što jaje ŭčynak — heta nie tolki jaje adkaznaść, ale i zavuča, i dyrektara, i što ŭ vypadku čaho jany taksama zastanucca biez pracy.

A što takoje zastacca nastaŭnicy biez pracy, ja mahu raspavieści na prykładzie inšaj byłoj užo nastaŭnicy — Natalli Iljinič, nastaŭnicy vyšejšaj katehoryi, jakaja 26 hadoŭ adpracavała ŭ Talkaŭskaj siaredniaj škole i była zvolnienaja ŭ pačatku 2011 hoda za ŭdzieł u inicyjatyŭnaj hrupie adnaho z alternatyŭnych kandydataŭ u prezidenty.

Michaił Anatoljevič, ja była vielmi rada, kali ŭbačyła, što Vy stali ministram adukacyi. Vaša imknieńnie da taho, kab biełaruskaja sistema adukacyi adpaviadała jeŭrapiejskim standartam, uvažaje za vielmi dobraje i pierśpiektyŭnaje dla budučyni krainy. I ŭpeŭnienaja, što takaja budučynia nie zabiaśpiečvajecca siońniašnim stracham i zapałochvańniem supracoŭnikaŭ. Jeŭrapiejski standart — heta pierš za ŭsio svaboda dumki i pluralizm mierkavańniaŭ. Isnaja prezidenckaja kampanija — pieršaja dla Vas u jakaści ministra, i ad vašaj asabistaj pazicyi ciapier moža šmat zaležać. Nie dazvolcie źnievažać nastaŭnikaŭ. 

P.S. Kali Vy paličycie patrebnym, ja vas paznajomlu z nastaŭnicaj, pra jakuju idzie havorka, pad harantyi biaśpieki jaje asabista i jaje kiraŭnictva. I z Natallaj Iljinič taksama».

• 0
• 0
• 0
• 0
• 0
• 0
• 0
• 0