Patencyjny kandydat u prezidenty, staršynia Abjadnanaj hramadzianskaj partyi Anatol Labiedźka 18 žniŭnia ŭ Minsku kala CUMa pravioŭ pikiet «Biez svabody słova niama sumlennych vybaraŭ!».
«Što my bačym na aficyjnych telekanałach? My bačym dvaccać hadoŭ: adzin tvar, adny vusy, adna pazicyja. Tam niama alternatyvy, tam niama pramoha efiru, nibyta dzieviać z pałovaj miljonaŭ hramadzian Biełarusi — heta adnadumcy, jakija dumajuć absalutna adnolkava z Alaksandram Łukašenkam», — zajaviŭ Labiedźka na pikiecie.
Na dumku palityka, biełaruskaje telebačańnie stała sinonimam takich słoŭ, jak «chłuśnia», «padman» i «paklop».
Na pikiecie ŭ padtrymku niezaležnaj presy vykinuli ŭ śmietnicu televizar FOTY
«Svaboda słova abaviazkovy spadarožnik svabodnych i sumlennych vybaraŭ, — kaža Anatol Labiedźka. — Heta toje, što spres adsutničaje ŭ Biełarusi. Užo adnaho hetaha dastatkova, kab nie pryznavać hetyja vybary sumlennymi i spraviadlivymi».
«Bolš za toje, u nas niama nie tolki svabody słova. U nas na radyjo, telebačańni, dziaržhazietach sucelny ahitprom. U nas pieraśledujuć tych ludziej, jakija źjaŭlajucca pravadnikami alternatyŭnaj infarmacyi, žurnalistaŭ. Tamu my siońnia zrabili pravilnaje i patrebnuju spravu, nahadali vybarščykam pra toje, što ŭ nas niama svabodnych i sumlennych vybaraŭ. I my vykazali našu salidarnaść z tymi, chto dapamahaje ludziam atrymlivać dakładnuju i alternatyŭnuju infarmacyju», — cytuje palityka sajt AHP.
Akramia taho, Labiedźka vykazaŭ salidarnaść z žurnalistami niezaležnych vydańniaŭ, u pryvatnaści z žurnalistami-fryłansierami, «jakija i siońnia praśledujucca, u dačynieńni da ich falsifikujucca administracyjnyja pratakoły».
Palityk prapanavaŭ prachožym padpisacca pad zvarotam Biełaruskaj asacyjacyi žurnalistaŭ (BAŽ) u dziaržorhany adnosna pracy fryłansieraŭ, jakija praśledujucca za supracoŭnictva z zamiežnymi ŚMI biez akredytacyi.
Pavodle słoŭ staršyni BAŽ Andreja Bastunca, heta toj zvarot, jaki arhanizacyja padrychtavała bolš za miesiac tamu. «Naš zvarot užo nakiroŭvaŭsia ŭ šerah dziaržaŭnych ustanoŭ, i pakul pa jaho sutnaści nichto nie adkazaŭ. Sud nakiroŭvaje ŭ prakuraturu, prakuratura — u milicyju, milicyja — u Mininfarm», — skazaŭ Bastuniec žurnalistam.
Jak adznačyŭ kiraŭnik BAŽ, z pačatku 2015 hoda arhanizacyja zafiksavała 29 vypadkaŭ vyniasieńnia štrafaŭ žurnalistam-fryłansieram u Biełarusi.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj30
Kamientary