Budynki pa 11 eŭraŭ

Dziaržkammajomaść vystaviŭ na prodaž za 1 bazavuju vieličyniu 39 abjektaŭ.

Dziaržaŭny kamitet pa majomaści abnaviŭ pieralik abjektaŭ, jakija padlahajuć prodažu na aŭkcyjonach z ustanaŭleńniem pačatkovaj cany prodažu, roŭnaj adnoj bazavaj vieličyni (Br35 tys., abo 11 eŭraŭ). Pa stanie na 28 lutaha naličvajecca 39 takich abjektaŭ, paviedamili karespandentu BIEŁTA u Dziaržkammajomaści.

Samaja vialikaja kolkaść abjektaŭ znachodzicca ŭ Viciebskaj vobłaści — 19. U vioscy Zubrevičy Aršanskaha rajonu na aŭkcyjony vystaŭlajucca 15 abjektaŭ. Heta budynki i zbudavańni, prynaležnyja ŭstanovie «Baza — schovišča dziaržaŭnaha strachavoha fondu dakumentacyi Respubliki Biełaruś».

U pieraliku jość i niedabudavanyja abjekty sa stupieńniu hatoŭnaści 8‑40 pracentaŭ. U Zelvienskim rajonie Haradzienskaj vobłaści za adnu bazavuju vieličyniu prapanujecca nie zavieršany budaŭnictvam kapitalny budynak — reabilitacyjna‑adnaŭlenčy centr na 124 miescy.

U Dziaržkammajomaści rastłumačyli, što hety pieralik abjektaŭ majomaści, jakija nie vykarystoŭvajucca i vystaŭleny na prodaž za adnu bazavuju vieličyniu, zaćvierdžany pastanovaj urada ad 27 krasavika 2007 hodu numar 541. Abjekty znachodziacca ŭ respublikanskaj ułasnaści i padlahajuć uklučeńniu ŭ haspadarčy abarot z 1 traŭnia 2007 hodu pa 30 krasavika 2008 hodu. Pieršapačatkova ŭ pieralik uvachodziła 69 abjektaŭ. U 2007 hodzie na aŭkcyjonach było pradadziena 16 abjektaŭ. Na niekatoryja ź ich cana ŭ čas aŭkcyjonu ŭzrasła šmatrazova. U pryvatnaści, 5 abjektaŭ u Škłovie (pramysłovyja budynki, skład i haraž) byli pradadzieny amal za Br400 młn.

Ciapier abłasnyja fondy dziaržmajomaści pravodziać i planujuć novyja aŭkcyjony pa prodažy majomaści z pačatkovaj canoj za adnu bazavuju vieličyniu. Miarkujecca, što abjekty, jakija zastanucca, buduć uniesieny ŭ novy pieralik majomaści, što nie vykarystoŭvajecca. Pieralik budzie zaćviardžacca pastanovaj uradu ŭ krasaviku‑traŭni 2008 hodu.

Pavodle dadzienych Dziaržkammajomaści, u Biełarusi ciapier naličvajecca 13,5 tys. abjektaŭ dziaržaŭnaj ułasnaści, jakija nie vykarystoŭvajucca abo nieefektyŭna vykarystoŭvajucca i jakija pavinny być uviedzieny ŭ haspadarčy abarot. Prykładna 25‑30 pracentaŭ hetych abjektaŭ praduhledžany dla prodažu na aŭkcyjonach abo konkursach. U hetym pracesie budzie aktyŭna vykarystoŭvacca mechanizm ich realizacyi za adnu bazavuju vieličyniu.

Pavodle BIEŁTA

• 0
• 0
• 0
• 0
• 0
• 0
• 0
• 0