Daterminovaje hałasavańnie na vybarach prezidenta ŭ Biełarusi pačynaje karystacca ŭsio bolšym pośpiecham, zajaviła staršynia Centrvybarkama Lidzija Jarmošyna 8 kastryčnika ŭ efiry anłajn-viaščańnia ŭ redakcyi haziety «Sovietskaja Biełoruśsija».
Za dva dni daterminovaha hałasavańnia, 6 i 7 kastryčnika, pavodle danych CVK, jaŭka vybarščykaŭ skłała 10,94%, što pieravyšaje jaŭku za taki ž pieryjad na vybarach 2010 hoda.
«Jaŭka vysokaja, heta taksama možna rastłumačyć z ulikam taho, što ŭ nas hałasujuć nie tolki tyja, kaho ŭzmocniena zaprašajuć na vybarčyja ŭčastki, naprykład studenty, ale vielmi pazityŭna acanili hetu formu ludzi, jakija nikudy nie jeduć na vychadnyja, — heta piensijaniery», — skazała Jarmošyna.
Pry hetym, pavodle jaje słoŭ, «uzmocnienaje zaprašeńnie» studentaŭ z boku administracyj navučalnych ustanoŭ na vybarčyja ŭčastki padčas daterminovaha hałasavańnia nie źjaŭlajecca parušeńniem zakanadaŭstva: «Kali ich zaprašajuć — čamu nie? Heta vychavańnie. U nas, razumiejecie, jak tolki pačynajuć pracavać z moładździu, adrazu ž — parušeńnie. Voś dziaciej vodziać na matčy, heta nie školnaje mierapryjemstva, ale heta vychavańnie, heta pakaz dzieciam, što možna bavić čas inakš i žyć inakš. Dyk voś zaprašeńnie studentaŭ na vybary — heta taksama vychavańnie, vychavańnie hramadzian».
Staršynia Centrvybarkama adznačyła taksama, što nahody dla žorstkaj krytyki prezidenckaj vybarčaj kampanii 2015 hoda niama, «hałoŭnaje — nie sapsavać uražańnie apošnimi dniami».
7 kastryčnika Jarmošyna paśla daterminovaha hałasavańnia na svaim vybarčym učastku skazała žurnalistam: «Centrvybarkam suprać stymulavańnia daterminovaha hałasavańnia». Kiraŭnik CVK adznačyła, što prahałasavać daterminova źjaŭlajecca «absalutnym pravam vybarščykaŭ». «My nie pytajemsia, čamu jany vyrašyli prahałasavać daterminova. Heta prava vybarščyka — prahałasavać daterminova ci ŭ dzień vybaraŭ», — dadała jana.
U toj ža čas studenty i navučency roznych navučalnych ustanoŭ paviedamlajuć, što kiraŭnictva rekamienduje im prahałasavać daterminova, inakš u ich mohuć źjavicca prablemy z zasialeńniem u internaty. Tym, chto hałasuje daterminova, dajuć vychadnyja z suboty pa paniadziełak. Padobnaja infarmacyja prychodzić i ad rabočych dziaržpradpryjemstvaŭ.
Kamientary