Датэрміновае галасаванне на выбарах прэзідэнта ў Беларусі пачынае карыстацца ўсё большым поспехам, заявіла старшыня Цэнтрвыбаркама Лідзія Ярмошына 8 кастрычніка ў эфіры анлайн-вяшчання ў рэдакцыі газеты «Советская Белоруссия».
За два дні датэрміновага галасавання, 6 і 7 кастрычніка, паводле даных ЦВК, яўка выбаршчыкаў склала 10,94%, што перавышае яўку за такі ж перыяд на выбарах 2010 года.
«Яўка высокая, гэта таксама можна растлумачыць з улікам таго, што ў нас галасуюць не толькі тыя, каго ўзмоцнена запрашаюць на выбарчыя ўчасткі, напрыклад студэнты, але вельмі пазітыўна ацанілі гэту форму людзі, якія нікуды не едуць на выхадныя, — гэта пенсіянеры», — сказала Ярмошына.
Пры гэтым, паводле яе слоў, «узмоцненае запрашэнне» студэнтаў з боку адміністрацый навучальных устаноў на выбарчыя ўчасткі падчас датэрміновага галасавання не з'яўляецца парушэннем заканадаўства: «Калі іх запрашаюць — чаму не? Гэта выхаванне. У нас, разумееце, як толькі пачынаюць працаваць з моладдзю, адразу ж — парушэнне. Вось дзяцей водзяць на матчы, гэта не школьнае мерапрыемства, але гэта выхаванне, гэта паказ дзецям, што можна бавіць час інакш і жыць інакш. Дык вось запрашэнне студэнтаў на выбары — гэта таксама выхаванне, выхаванне грамадзян».
Старшыня Цэнтрвыбаркама адзначыла таксама, што нагоды для жорсткай крытыкі прэзідэнцкай выбарчай кампаніі 2015 года няма, «галоўнае — не сапсаваць уражанне апошнімі днямі».
7 кастрычніка Ярмошына пасля датэрміновага галасавання на сваім выбарчым участку сказала журналістам: «Цэнтрвыбаркам супраць стымулявання датэрміновага галасавання». Кіраўнік ЦВК адзначыла, што прагаласаваць датэрмінова з'яўляецца «абсалютным правам выбаршчыкаў». «Мы не пытаемся, чаму яны вырашылі прагаласаваць датэрмінова. Гэта права выбаршчыка — прагаласаваць датэрмінова ці ў дзень выбараў», — дадала яна.
У той жа час студэнты і навучэнцы розных навучальных устаноў паведамляюць, што кіраўніцтва рэкамендуе ім прагаласаваць датэрмінова, інакш у іх могуць з'явіцца праблемы з засяленнем у інтэрнаты. Тым, хто галасуе датэрмінова, даюць выхадныя з суботы па панядзелак. Падобная інфармацыя прыходзіць і ад рабочых дзяржпрадпрыемстваў.
Глядзіце таксама: Як студэнты галасуюць добраахвотна ВІДЭА
«У Віцебску заходзіў у тралейбус і казаў «Слава Украіне!». Украінца ў 67 гадоў пасадзілі за каменты, напісаныя пасля гібелі хроснай дачкі пад абстрэлам у Кіеве1010
Каментары