U Minsku źniasuć tolki 30% pryvatnaha siektara, a nie 70, jak mierkavałasia raniej

U Minsku płanujecca źnieści 30% płoščaŭ siadzibnaj zabudovy, paviedamiŭ žurnalistam 14 kastryčnika na prezientacyi karekciroŭki Hienieralnaha płana Minska hałoŭny architektar UP «Minskhrada» Alaksandr Akienćjeŭ.

«Dziejnym hienieralnym płanam zapłanavany abjom składaje: 70% — znos, 30% — zachavańnie. U novaj redakcyi hienieralnaha płana my pa sutnaści atrymali advarotnuju praporcyju: 30% — mahčymy znos, 70% — zachavańnie», — skazaŭ architektar.

Pavodle jaho słoŭ, hienieralny płan «nie vyznačaje kožny dom i kožny rajon, los kožnaha kvartała siadzibnaj zabudovy». «Hetaja praca patrabuje skrupuloznaha horadabudaŭničaha analizu vykonvajecca na nastupnaj stadyi — detalovaje płanavańnie. Na hetaj stadyi i vyznačajecca los kankretnaj siadziby i kankretnaha žychara, kankretnyja miežy znosu», — zaznačyŭ Akienćjeŭ.

«Minčanie, ź jakimi my viadziom dyjałoh pra budučyniu raźvićcia Minska, vielmi baluča pieražyvajuć nakont zabarony im jakich-niebudź form pa ŭtrymańni doma ŭ naležnym paradku. Heta vyklikaje vialikaje pieražyvańnie. My napramuju da hetaha niedatyčnyja, ale ličym metazhodnym nastupnaje: kali na praciahu piaci hadoŭ znos płanujecca, to dazvalać stvareńnie kamfortnych sanitarnych umoŭ (vanna, duš, ubornaja ŭnutry doma). Kali termin znosu vyznačany ŭ 10—15 hadoŭ, to možna dazvolić žycharam zrabić rekanstrukcyju svaich damoŭ i stvaryć dla siabie ŭzrovień dabrabyu. Hetyja pytańni my budziem abmiarkoŭvać z administracyjami rajonaŭ», — skazaŭ Akienćjeŭ.

Na pytańnie ab mahčymym znosie Sielhaspasiołka jon adkazaŭ: «Siońnia pracuje kamisija, i kančatkovaje rašeńnie adnosna losu hetaha rajona budzie pryniataje, nad hetym jašče pracujem».

Śpiecyjalist zaznačyŭ, što «sučasny ŭzrovień raźvićcia horada praduhležvaje znos častki siadzibnaj zabudovy». Pavodle jaho słoŭ, siońnia ŭ Minsku na 22% terytoryi znachodziacca kvartały siadzibnaj zabudovy, a tam žyvuć 3,9% žycharoŭ. «Dla Minska heta vielmi zatratny vid zabudovy. Jak praviła, u takich haradach, jak Minsk, tolki vielmi bahatyja haradžanie mohuć dazvolić sabie pražyvańnie ŭ hetych rajonach. U nas ža ŭ mnohim niebahatyja minčanie ŭ ich žyvuć, i stan damoŭ nie vielmi dobry. My prapanoŭvajem siadzibnuju zabudovu vieści ŭ niepasrednaj blizkaści da horada», — zaznačyŭ hałoŭny architektar.

Jon pryvioŭ prykład. U Minskim rajonie ščylnaść nasielnictva ŭ niekatorych nasielenych punktach składaje 5 čałaviek na ha, a pa horadabudničych normach pavinna być 22—25 čałaviek. «Kali my budziem rekanstrujavać hetyja sielskija nasielenyja punkty i pabudujem z kamfortam, ź sietkami, to možna budzie raźmiaścić tam da 100 tys. žycharoŭ. Heta kałasalny patencyjał», — miarkuje ekśpiert.

***

Aznajomicca z ekspazicyjaj i inšymi materyjałami hienieralnaha płana Minska možna ŭ pieryjad z 12.10.2015 pa 05.11.2015 (z paniadziełka pa piatnicu — z 14.00 da 18.00, u subotu i niadzielu — z 10.00 pa 15.00) u budynku UP «Minskhrada» pa adrasie: h.Minsk, vuł. Kamsamolskaja, 8, 2 pavierch, kab. 204.

Zaŭvahi i prapanovy buduć prymacca ŭ pieryjad praviadzieńnia hramadskaha abmierkavańnia piśmova ŭ knizie zaŭvah i prapanoŭ z 14.00 da 18.00 pa vyšejpaznačanym adrasie, a taksama praz paštovuju suviazi i elektronnuju poštu (e-mail: [email protected]).

• 0
• 0
• 0
• 0
• 0
• 0
• 0
• 0