Kolišni ŭdzielnik ansamblu «Pieśniary» i hurtu Rouble Zone Alaksandr Visłaŭski prezientuje na Tuzin.fm albom na vieršy Ryhora Baradulina, jaki zapisaŭ jahony novy prajekt Studio Neman.
Albom «Maleńnie za Biełaruś» z tych, jaki nia maje termina daŭniny. Jon moh być zapisany, skažam na pačatku 80-ch, moh prahučać u 90-ch, a nasamreč vyjšaŭ tolki što. Jaho možna nazvać staramodnym i hetaje vyznačeńnie budzie pachvalboju. Jak vypadkova ŭklučyć jaki-niebudź trek, to možna padumać, što heta adna ź nieviadomych prahramaŭ mulavinskich «Pieśniaroŭ». Pry ŭsim tym asabistym, što ŭkładali aŭtary hetaha albomu, nie pakidaje adčuvańnie, što prajektavali jaho Mulavin dy Baradulin. Sustrelisia, zrabili pa sotačcy, pahamanili, pavybirali vieršy dy vyrašyli zrabić sumiesnuju prahramu – mahutnuju, maštabnuju, kranalnuju ź pieśniami-razvahami nad tym, što jość Biełaruś i jak jaje žycharam zachavać svaju krainu i siabie ŭ joj.
Nasamreč, hetaja prahrama paŭstała ŭ vyniku supracy vydatnaha muzyki, kampazytara i aranžyroŭščyka Alaksandra Visłaŭskaha z vykanaŭcam i paetam Alesiem Kamockim. Alaksandar piać hod tamu ŭdzielničaŭ u zapisie albomu «Viarovica», aranžavaŭ pieśni Alesia na vieršy Ryhora Baradulina. Muzyka duža prasiaknuŭsia jahonaj paezijaj i ŭ jaho paŭstali zadumy ŭłasnych piesień. Realizavaŭ jon ich tolki letaś. Pieršaj z napisanych piesień stała «Jerusalim».
«Ja jaje napisaŭ adrazu ž, jak viarnuŭsia z pachavańnia dziadźki Ryhora, – kaža Alaksandar Visłaŭski. –Pryjechaŭ, staŭ za klavišy i tak naradziłasia jaje melodyja, sa ślaźmi na vačoch. Ja dumaŭ tolki pra toje, čamu ž nie zapisaŭ hety albom pry jaho žyćci. Mahčyma, namahańnie addać daninu pavahi vialikamu paetu i majmu siabru, moža pačućcio viny mianie tady i padšturchnuli zrabić hety značny tvorčy krok. Nia viedaju dakładnaha adkazu, ale ŭ vyniku taho ŭnutranaha abudžeńnia ja zapisaŭ amal dźvie hadziny muzyki. Ciapier my razam z muzykami adabrali 10 melodyj, jakija ŭvajšli ŭ albom».
Adkryvaje albom «Maleńnie za Biełaruś» sam Ryhor Baradulin, jaki čytaje «Ojča naš». Što najpierš uschvalavała aŭtaraŭ hetaj pracy ŭ jahonaj paezii? «Pieradusim patryjatyzm, hramadzianskaja liryka, Baradulin źviartaŭsia da histaryčnaj pamiaci biełarusaŭ, da našaha asablivaha mentalitetu. Ja dumaju, što ŭ albomie jość adkazy na hałoŭnyja pytańni – jak zastavacca biełarusami i zachavać svaju identyčnaść», – kaža spadar Visłaŭski.
Albom atrymaŭsia sapraŭdy pryhožym i hruntoŭnym, ź lohkim prysmakam art-roku i džaz-roku. Biez pretenzii, ale ŭ samuju sutnaść. A «pieśniaroŭskaja» notka tłumačycca prosta – aŭtar muzyki prajšoŭ škołu «Pieśniaroŭ»: jon pačynaŭ u moładzievaj studyi ansamblu «Pieśniary» (1985), a potym uvajšoŭ u skład VIA pad kiraŭnictvam Uładzimiera Mulavina ŭ jakaści klavišnika i bek-vakalista (1987-1991), u hety čas mienavita jon saliravaŭ u «Aleksandrynie» i staŭ pieršym vykanaŭcam «Słuckich tkačych». U 90-ch Alaksandar pracavaŭ u arkiestry pad kiraŭnictvam Michaiła Finbierha i byŭ navat daradcam prezydenta pa kultury, u siaredzinie 90-ch hraŭ u składzie hurta «Rublovaja zona», a potym pierajechaŭ na niekatory čas u Polšču, dzie pracavaŭ u hurcie «5th july». U 2004-2013 hodzie vystupaŭ u składzie adnych ź «Pieśniaroŭ» (p/k Ihara Śviečkina).
Stvarać albom «Maleńnie za Biełaruś» Alaksandru Visłaŭskamu dapamahała prafesijnaja kamanda muzykaŭ, jakija abjadnalisia ŭ prajekt «Studio Neman». U lutym 2016-ha muzyki źbirajucca zładzić žyvuju prezentacyju alboma.
U Łahojsku piekar admaŭlajecca pradavać svoj chleb pakupnikam, u jakich jość sabaki84
Kamientary