«Sputnik i pahrom»: Niama bratniaha biełaruskaha naroda. U Biełarusi jość ruskija i jość judy
Na šavinistyčnym rasijskim sajcie «Sputnik i pohrom» źjaviŭsia novy artykuł pryśviečany Biełarusi. Jak zaŭsiody, jaho aŭtaram vystupiŭ Kirył Aviarjanaŭ-Minski, jaki raniej žyŭ u Biełarusi, ale źjechaŭ u Rasiju, ci Vielikarosiju, jak piša jon sam.
Na hety raz Aviarjanaŭ-Minsk sprabuje «raźviančać mif pra bratni biełaruski narod». Jon nazyvaje hety stereatyp savieckaj spadčynaj.
«Mabyć, hałoŭnaja z nazvanych zahan — nierazumieńnie taho faktu, što nijakaha «bratniaha naroda» u eks-BSSR niama. Biełaruskich hramadzian možna ŭmoŭna padzialić na dźvie katehoryi: 1) ludzi, jakija ŭ toj ci inšaj miery zachavali ŭśviedamleńnie prynaležnaści da ruskaj cyvilizacyi / ruskaha śvietu / ruskaj nacyi; 2) ludzi, jakija admovilisia ad jakoj by tam ni było ruskaści. Pieršyja — častka ruskaha naroda i patencyjnaja častka ruskaj nacyi (dla razancaŭ abo sibirakoŭ takija biełarusy nie «braterski narod», a toj ža samy narod). Druhija — judy,
jakija, jak elehantna vykazaŭsia Dźmitryj Hałkoŭski, «u ciažkuju chvilinu vyrašyli pierafarbavacca z karasia ŭ parasia, adchryścilisia ad suplamieńnikaŭ i pastavili sabie ŭ Minsku samastojny hierb z devizam «tatu, čuješ, siakuć, a ja ŭciok». «Šachier-machier konsome, ja pa-rusku nie ponime»».
U prapahandzie ŭsiaho biełaruskaha aŭtar abvinavačvaje savieckuju ŭładu. «Roskvit biełaruskaj samastojnaści pryjšoŭsia na 20-ja hady XX stahodździa, kali balšaviki ŭ sajuzie z «buržuaznymi nacyjanalistami» praviali ŭ BSSR hvałtoŭnuju «biełarusizacyju»».
«Žadajučy ŭmacavać «družbu narodaŭ», balšaviki prydumali kancepcyju «ŭschodniesłavianskaha braterstva», jakaja, z adnaho boku, pastulavała nacyjanalnuju adasoblenaść ruskich (hety etnonim u saviecki čas byŭ zamacavany tolki za vialikarusami), ukraincaŭ i biełarusaŭ, a z druhoha — abviaščała ich «braterskimi» narodami, jakija vystupajuć za palityčnaje adzinstva ŭ składzie SSSR», — praciahvaje Aviarjanaŭ-Minski.
«Kancepcyja «troch braterskich słavianskich narodaŭ» taiła ŭ sabie supiarečlivaść: sieparatysckaja biełaruskaja identyčnaść pieršapačatkova była antyruskaja (hruntavałasia na admaŭleńni ahulnaruskaha adzinstva i fietyšyzacyi adroźnieńniaŭ biełarusaŭ ad vielikarusaŭ), z-za hetaha aficyjna dekłaravanaje «ŭschodniesłavianskaje braterstva» ŭsprymałasia bolšaściu pradstaŭnikoŭ biełaruskaj nacyjanalnaj intelihiencyi jak niešta štučnaje, naviazanaje maskoŭskimi ŭładami».
«Antyruskaja sutnaść biełaruskaha nacyjanalnaha prajekta z kožnym hodam prajaŭlajecca ŭsio bolš vyrazna. Tak, letam vyśvietliłasia, što patryjatyčnyja vieršy A.S. Puškina ŭ «brackaj» Biełarusi znachodziacca pad zabaronaj», — heta vypadak, kali ŭ Mahilovie z pastamienta paeta prybrali vierš «Klevietnikam Rośsii».
Faktyčna, vychodzić, što ŭ śpis «judaŭ» aŭtar dadaje nie tolki nacyjanalistaŭ i apazicyju, ale i biełaruskija aficyjnyja ŭłady. Usich tych, chto nie choča, kab Biełaruś stanaviłasia častkaj Rasii.
Ciapier čytajuć
U Varšavu pryjechała sotnia biełaruskich palitviaźniaŭ10
Kamientary