U minskim archikatedralnym kaściole imia Najśviaciejšaj Panny Maryi 2 studzienia prajšła śviataja imša z nahody jubileju mitrapalita Minska-Mahiloŭskaha arcybiskupa Tadevuša Kandrusieviča.
3 studzienia kiraŭniku biełaruskaha kaścioła spaŭniajecca 70 hadoŭ. Niepasredna ŭ dzień svajoho naradžeńnia ijerarch budzie celebravać dźvie imšy ŭ archikatedralnym kaściole — u 11.30 i 13.00, paviedamlaje sajt catholic.by.
Tadevuš Kandrusievič naradziŭsia 3 studzienia 1946 hoda ŭ vioscy Adelsk niepadalok ad Hrodna. Skončyŭšy siaredniuju škołu, Kandrusievič pastupiŭ na fizika-matematyčny fakultet Hrodzienskaha piedahahičnaha instytuta, adkul praz hod vymušany byŭ syści ŭ suviazi z abvinavačańniami ŭ tym, što jon rehularna naviedvaje kaścioł i ŭdzielničaje ŭ nabaženstvach. U 1964 hodzie Kandrusievič pastupiŭ na enierhamašynabudaŭničy fakultet Leninhradskaha politechničnaha instytuta, jaki skončyŭ z adznakaj, atrymaŭšy dypłom inžyniera-miechanika. Paśla zakančeńnia ŭniviersiteta da 1976 hoda pracavaŭ inžynieram na Vilenskim zavodzie šlifavalnych stankoŭ.
U 1976 hodzie Kandrusievič pastupiŭ u duchoŭnuju sieminaryju ŭ Kaŭnasie (Litva), skončyŭ jaje ŭ 1981 hodzie i byŭ paśviečany ŭ duchoŭny san. U 1985 hodzie jon atrymaŭ stupień licencyjata teałohii, u 1988-m — abaraniŭ dysiertacyju i atrymaŭ navukovuju stupień doktara teałohii.
U lipieni 1989 hoda papa rymski Jan Pavieł II pryznačyŭ Tadevuša Kandrusieviča apostalskim administrataram Minskaj dyjacezii. U Biełarusi biskup Kandrusievič zasnavaŭ Hrodzienskuju vyšejšuju duchoŭnuju sieminaryju, sadziejničaŭ viartańniu viernikam i adkryćciu bolš čym 100 raniej zakrytych kaściołaŭ, vydańniu «Paradku imšy» i «Katechizisa» na biełaruskaj movie. U 2002 hodzie jon byŭ pryznačany mitrapalitam kafiedry Maci Božaj u Maskvie, a ŭ vieraśni 2007-ha — kiraŭnikom Minska-Mahiloŭskaj archidyjacezii Rymska-katalickaj carkvy.
Tadevuš Kandrusievič vałodaje biełaruskaj, ruskaj, polskaj, anhlijskaj, litoŭskaj i italjanskaj movami.
Kamientary