Jak admycca ad «panamskaha» skandału. Top-10 samych papularnych sprobaŭ apraŭdańnia

Nahadajem, skandał raspačaŭsia z-za źlivu ŭ presu zakrytaj infarmacyi, jakaja hruntujecca na dakumientach jurydyčnaj kampanii «Mossack Fonseca». Pavodle rapartu, jaki padrychtavaŭ Mižnarodny kansorcyum žurnalisckich rasśledavańniaŭ (ICIJ), vialikaja kolkaść suśvietnych palityčnych lidaraŭ zajmałasia zvyčajnaj karupcyjaj, admyvajučy hrošy ŭ afšorach. Jak śćviardžajuć śpiecyjalisty, heta bujniejšaje pa abjomach kampramietujučaj infarmacyi adnarazovaje vykryćcio ŭ historyi.

Siarod datyčnych da afiery — prezidenty, kiraŭniki ŭradaŭ, saudaŭskija pryncy, baćka brytanskaha premjera Kemierana i jaho paplečniki pa kansiervatyŭnaj partyi, svajak kitajskaha prezidenta Si Czińpinia, siastra prezidenta Konha, pakistanski premjer Navaz Šaryf, futbalist Lijanel Miesi i inšyja. Usiaho ŭ rasśledavańni fihurujuć imiony bolš dvaccaci dziejučych i byłych kiraŭnikoŭ dziaržaŭ, bolš za 100 palitykaŭ z roznych krain śvietu, uklučajučy dziaržavy SND, — Nazarbajeŭ, Pucin, Parašenka, Alijeŭ… Ciapier usie, chto trapiŭ u spravazdaču ICIJ, aktyŭna prydumlajuć sproby apraŭdańnia, ź jakich možna skłaści svojeasablivy top–10.

1. Ničoha nie skažu

Samy prosty sposab reahavańnia na abvinavačańni — uvohule ničoha nie kazać. Heta vybraŭ Sihmiundziur David Hiunlejhs, isłandski premjer, jaki prosta pierarvaŭ intervju, kali ŭspłyła tema afšoraŭ. Praŭda, taki varyjant maje niekatoryja minusy ŭ vyhladzie hramadskich pratestaŭ, jakija achapili krainu. Tolki za adzin dzień pietycyja za adstaŭku ŭrada nabrała 23 tysiačy podpisaŭ (1/14 usiaho nasielnictva). Ź inšaha boku, padobnaja reakcyja niemahčymaja ŭ aŭtarytarnych krainach nakštałt Azierbajdžana abo Kazachstana. Miascovy aficyjoz uparta ihnaruje panamskija listy, a reahavać na publikacyi ŭ niezaležnaj presie čynoŭniki prosta nie majuć zvyčki.

2. Hrošy maje, nie vaša sprava

Jašče adzin varyjant vystavić siabie biełym i puchnatym — zajavić: «Hrošy maje, i ja mahu rabić ź imi usio što zaŭhodna». Tak užo zrabiŭ brytanski premjer Devid Kemieran, abaraniajučy svajho baćku. «U kožnaha jość prava rasparadžacca svajoj majomaściu, jak jon pažadaje, — vykinuć u mora, pradać abo pieravieści ŭ trast. U hetym niama złačynstva ni pa zakonach Pakistana, ni pa mižnarodnych», — kaža ministr infarmacyi Pakistana Achmied Rašyd.

3. Sproba adciahnuć uvahu ad kryzisu

Kali vas padazrajuć u tym, što vy vyvodzili hrošy ŭ afšory, adrazu možna ŭzhadać Ivana Sałaŭjova, prafiesara Akademii MUS Rasii, na dumku jakoha ŭciečki takich surjoznych dakumientaŭ sami pa sabie nikoli nie adbyvajucca. Panamskija dakumienty, jak ličyć Sałaŭjoŭ, — heta sproba adciahnuć uvahu ad katastrafičnaha stanu ekanomiki ŭ krainach Jeŭropy i inšych dziaržavach.

4. Jurydyčnyja kručkatvorstvy

Mienavita tak koratka možna apisać nastupny sposab. Tak robiać u atačeńni ŭkrainskaha prezidenta Piatra Parašenki, jaki, hledziačy pa ŭsim, moža najbolš paciarpieć ad panamskaha skandału. Sprava ŭ tym, što prodaž biznes-aktyvaŭ byŭ važnaj častkaj pijaru Parašenki padčas prezidenckaj kampanii. Ciapier vyśviatlajecca, što ŭładar «Rašenu» padmanuŭ ukraincaŭ, niekatoryja ź jakich nastolki aburanyja, što patrabujuć impičmientu. Dla lehitymacyi machinacyj jurystami Parašenki prapanujecca nastupnaja formuła: «Padatkaabkładańnie karparatyŭnaje i padatkaabkładańnie fizičnaj asoby — heta dva roznych režymy padatkaabkładańnia, i čałaviek u svajoj dekłaracyi pakazvaje tolki tyja dachody, jakija jon atrymaŭ jak fizičnaja asoba, a nie jak karparatyŭnaja struktura, dzie ŭmoŭna možna ličyć, što jon źjaŭlajecca ci nie źjaŭlajecca bienieficyjarnym ŭłaśnikam». Pakiniem čytaču prava samim zrazumieć, što chacieŭ skazać juryst.

5. Nie lepšy čas

Prychilnikam Parašenki naležyć inšy niezvyčajny krok, jaki pavinien vyratavać imidž bosa. Pryznajecca, što Parašenka sapraŭdy praz afšory sychodziŭ ad padatkaŭ, adnak vynasić śmiećcie z chaty zaraz, byccam, nie lepšy čas. «Samaje strašnaje ŭ hetaj situacyi, što, razhojdvajučy łodku, usie hetyja jeŭraaptymisty nie razumiejuć, za košt čaho siońnia da hetaha času trymajecca kraina. A kraina siońnia da hetaha času trymajecca na karupcyjna-aliharchičnym kansiensusie. Kali my prybirajem aliharchičny kansiensus, to ŭsia kanstrukcyja z hrukatam razburajecca», — ličyć Uładzimir Arjeŭ, deputat frakcyi Błoka Piatra Parašenki.

6. Mianie padmanuli

Lijanel Miesi — słavuty futbalist, taksama pryznaje, što sapraŭdy vyvodziŭ hrošy praz afšory, adnak naŭmysna padmanvać nikoha nie chacieŭ. Maŭlaŭ, jaho padmanuli firmy, jakija zajmajucca inviestycyjami. Raniej Miesi ŭžo abvinavačvali ŭ niavypłacie padatkaŭ na sumu kala 6,5 miljona jeŭra šlacham utojvańnia prybytkaŭ u afšornaj sietcy.

7. Zmova vorahaŭ

Nie mienš papularny srodak — śpisać kampramat na zmovu vorahaŭ. Tut foru ŭsim daść Kreml. Uvohule, Rasii pryśviečana značnaja častka rasśledavańnia, dzie śćviardžajecca, što blizkija Uładzimiru Pucinu ludzi praz bank «Rasija» i panamskija afšornyja kampanii «admyli» bolš za dva miljardy dalaraŭ. Kamientujučy hetuju infarmacyju, kiraŭnik kamiteta Dziarždumy pa biaśpiecy RF Iryny Jaravaja kaža: «Kłapatlivym baćkam kalarovych revalucyj nie daje spakoju palityčnaja stabilnaść u Rasii i davier hramadstva prezidentu». U tym ža rečyščy prakamientavaŭ kampramat na Pucina jaho śpikier Dźmitryj Piaskoŭ. «Usio mižnarodnaje rasśledavańnie nakiravana suprać palityčnaj stabilnaści ŭ našaj krainie», — skazaŭ Piaskoŭ, žonka jakoha taksama fihuruje ŭ panamskich papierach jak uładalnica afšornaj kantory.

8. A my nie horšyja

Nastupnaja formuła taksama naležyć Rasii, dzie niekatoryja patryjatyčnyja błohiery prapanujuć razhladać prysutnaść proźvišča Pucina ŭ panamskich listach jak adznaku taho, što rasijskija palityki nie sastupajuć pa kalibry suśvietnym.

9. Heta dla inviestycyj

Pazicyju za aryhinalnaść u chit-paradzie taksama treba addać palitołaham Parašenki. Apošnija ŭsurjez ličać, što skandał z afšorami dapamahaje inviestycyjam u krainu. Maŭlaŭ, patencyjnyja zamiežnyja biźniesmieny ŭ zachapleńni praz fakt, što zaroblenyja va Ukrainie hrošy možna lohka vyvieści z krainy, nie zapłaciŭšy padatki. Adnym słovam, bum inviestycyj ciapier prosta niepaźbiežny.

10. Jany pažartavali

Nu i, narešcie, samy aryhinalny krok. Jaho prydumaŭ adeski mer Hienadź Truchanaŭ, jakoha aŭtary spravazdačy padazrajuć siarod inšaha ŭ vałodańni 20-ciu afšornymi kampanijami. Kamientujučy kampramat suprać siabie, Truchanaŭ u maniery sapraŭdnaha adesita-humarysta zajaviŭ, što aŭtary dakładu pra panamskija listy prosta vyrašali pažartavać.

• 0
• 0
• 0
• 0
• 0
• 0
• 0
• 0