Siadzibu XIX stahodździa ŭ Miorskim rajonie pradaduć za adnu bazavuju
Siadzibny dom Rudnickich, pabudavany ŭ 1810—1820 hadach u vioscy Asada Dziedzina Miorskaha rajona, 18 maja budzie vystaŭleny na elektronnyja tarhi z pačatkovaj koštam 210 000 rubloŭ.
Hety budynak źjaŭlajecca historyka-kulturnaj kaštoŭnaściu 2 katehoryi, h.zn. respublikanskaha značeńnia. Dom byŭ pabudavany dla dvaranskaha sudździ Alaksandra Rudnickaha pa prajekcie architektara Vitkoŭskaha ŭ styli kłasicyzmu: pramavuholny ŭ płanie dvuchpaviarchovy budynak ahulnaj płoščaj 772,6 kv. m. nakryty valmavym dacham. Centr hałoŭnaha fasada vyłučany čatyrochkałonnym porcikam z trochkutnym frantonam. U azdableńni fasadaŭ vykarystany pilastry, rustoŭka, prafilavanyja karnizy. Płaniroŭka anfiładna-kalidornaja. Pad budynkam sklapienistyja padvały.
Zhodna z umovami prodažu, novy ŭładalnik budynka pavinien vykarystoŭvać abjekt dla pradprymalnickaj dziejnaści nie mienš za try hady, pry hetym pačać jaje nie paźniej za 12 miesiacaŭ z momantu padpisańnia damovy kupli-prodažu. Taksama jamu treba padpisać i zarehistravać u Ministerstvie kultury achoŭnaje abaviazacielstva, a pry nieabchodnaści pravieści restaŭracyju doma i zaviaršyć jaje za dva hady. Akramia taho, pakupniku pryjdziecca kampiensavać biudžetu Miorskaha rajona 4 141 636 rubloŭ za afarmleńnie dakumientaŭ na abjekt.
Vioska Asada Dziedzina znachodzicca prykładna za 15 kiłamietraŭ ad Mioraŭ pa aŭtamabilnaj darozie i za 6,5 kiłamietra ad čyhunki. Akramia samoha budynka, jaho ŭładalnik atrymaje prava na arendu ziamielnaha ŭčastka płoščaj 0,45 hiektara terminam na 50 hadoŭ.
Aŭkcyjon, na jaki vystaŭlajecca siadziba XIX stahodździa, upieršyniu ŭ Viciebskaj vobłaści projdzie ŭ elektronnym farmacie. Akramia hetaha łota, na tarhi vystaviać jašče čatyry budynki.
Ciapier čytajuć
«Mikałaja bili, dzie tolki jaho bačyli». Pra katavańni źniavolenaha anarchista Dziadka raskazała advakatka Mackievič2
Kamientary