Bałharyja maje namier spryjać dalejšamu raźvićciu adnosin Biełarusi i Jeŭrasajuza, zajaviŭ ministr zamiežnych spraŭ Bałharyi Danieł Mitaŭ 11 krasavika ŭ Minsku paśla sustrečy z kiraŭnikom MZS Biełarusi Uładzimiram Makiejem.
«Z zadavalnieńniem chacieli b adznačyć źmianieńnie ŭ adnosinach Biełarusi i ES, — skazaŭ Mitaŭ. — Chaciełasia b, kab hetaja tendencyja zachavałasia i ŭ budučyni. Bałharyja budzie spryjać hetamu».
Jon vykazaŭ nadzieju, što rašeńnie ES ab skasavańni sankcyj suprać Biełarusi pryniasie karyść usim bakam. «Zrazumieła, heta pavinna adbyvacca pry ŭmovie zachavańnia pravoŭ čałavieka», — padkreśliŭ Mitaŭ.
Ministr taksama adznačyŭ, što Bałharyja, jak ciapierašni staršynia Kamiteta ministraŭ Rady Jeŭropy, nadaje taksama vialikuju ŭvahu raźvićciu adnosin pamiž Biełaruśsiu i SIE.
«Biełaruś — vyklučna važnaja dla nas kraina pa mnohich pryčynach, u tym liku našaj histaryčnaj, kulturnaj i relihijnaj blizkaści, — skazaŭ Mitaŭ. — Z aptymizmam nazirajem u apošni čas za pahłybleńniem adnosin pamiž našymi krainami ŭ roznych śfierach».
U svaju čarhu Makiej adznačyŭ, što ŭ Biełarusi vizit Mitava razhladajuć jak «važny etap na šlachu dalejšaha raźvićcia adnosin pamiž Biełaruśsiu i Bałharyjaj». Pavodle jaho słoŭ, padčas sustrečy baki abmierkavali stan i pierśpiektyvy adnosin pamiž Biełaruśsiu i Bałharyjaj, a taksama ź ES i Radaj Jeŭropy.
«My nadali asablivuju ŭvahu prablematycy parazumieńnia z Radaj Jeŭropy, u tym liku abmierkavali ŭsie isnujučyja adčuvalnyja pytańni», — skazaŭ Makiej.
Pavodle jaho słoŭ, baki taksama damovilisia najbližejšym časam pravieści pasiadžeńnie mižuradavaj kamisii pa handlova-ekanamičnym i navukova-techničnym supracoŭnictvie.
Mitaŭ udakładniŭ, što pasiadžeńnie kamisii, chutčej za ŭsio, projdzie ŭ červieni hetaha hoda ŭ Safii.
«My damovilisia ciesna pracavać, kab naroščvać naša ŭzajemadziejańnie i raźvivać kantakty va ŭsich śfierach. U nas praktyčna nie majecca razychodžańniaŭ pa pytańniach dalejšaha raźvićcia biełaruska-bałharskich adnosin i adnosin ź ES», — skazaŭ Makiej.
Ciapier čytajuć
Na mitynhu ŭ Vilni zatrymali pravakatara. A Cichanoŭski zajaviŭ pra namier dabivacca sustrečy ź Zialenskim11
Kamientary