Napiaredadni finała «Jeŭrabačańnia» Siarhieju Łazaravu zhadali jaho vykazvańnie pra Krym
Rasijski vykanaŭca Siarhiej Łazaraŭ napiaredadni finała Jeŭrabačańnia-2016 źjaŭlajecca vidavočnym favarytam, pavodle bukmiekierskich kantor.
Upłyvovaja brytanskaja kampanija «Uiljam Chił» prymaje staŭki na Łazarava z kaeficyjentam 1 da 1,53. Śledam idzie Aŭstralija (1 da 5) i Ukraina (1 da 9).
Adnak ad častki rasijskich internet-karystalnikaŭ možna pačuć navat zakliki bajkatavać i nie padtrymlivać svajho vykanaŭcu. Sprava ŭ tym, što niekatoryja ličać śpievaka niedastatkova patryjatyčnym.
U 2014 hodzie, adrazu paśla aneksii Kryma, Siarhiej Łazaraŭ davaŭ intervju ŭkrainskuju telekanału 1+1, dzie skazaŭ:
«Ja voś hetaj ejfaryi nie padzialaju. Nie viedaju, moža, u mianie paśla hetaha palaciać pamidory z boku svaich rasijskich fanataŭ, ale dla mianie - nu ja pryvyk tak - ja pryjazdžaju ŭ Jałtu, i dla mianie heta Ukraina. Tamu, kali pravodziać usie hetyja kancerty «Krym z nami»… nie, ja ŭ hetym udzielničać nie budu».
Praŭda, vielmi chutka Łazaraŭ byŭ vymušany apraŭdvacca ŭžo ŭ rasijskaj presie. Maŭlaŭ, televizijniki jaho skarystali i z amal hadzinnaj razmovy pra rasijska-ŭkrainskija adnosiny zastałasia piacichvilinnaj narezka, dzie jaho vystaŭlajuć u kiepskim śviatle.
Pry hetym jon usio adno zastaŭsia pry dumcy, što Krym – heta častka Ukrainy. «Prosta ja naležu da maładoha pakaleńnia tych, chto nie moža pamiatać taho, što ŭ 1954 hodzie Chruščoŭ pieradaŭ Krym Ukrainie. Tamu mnie ciažka i niazvykła. Z hodu ŭ hod pryjazdžać u Krym, va Ukrainu, a tut raptam raz - i heta stała Rasijaj».
Sioleta napiaredadni «Jeŭrabačańnia» Siarhiej Łazaraŭ užo admoviŭsia adkazvać na pytańni adnosna Kryma.
U druhi raz Łazaraŭ vyklikaŭ abureńnie rasijskich kamientataraŭ, kali skazaŭ, što ŭ vypadku jaho pieramohi pradstaŭniki hiej-supolnaści mohuć spakojna pryjazdžać u Maskvu. «U nas šmat kłubaŭ i restaranaŭ dla ludziej ź nietradycyjnaj seksualnaj aryjentacyjaj», — skazaŭ śpiavak.
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary