«U Hrodnie ja zarablaju mienš, ale žyvu lepšym žyćciom». Jak amierykaniec pramianiaŭ Štaty na Biełaruś
Brentu 36 hadoŭ, jon rodam sa štata Indyjana. U Hrodnie ŭradženiec zaakijanskaj krainy apynuŭsia dziakujučy kachańniu i ani troški nie škaduje. Da pryjezdu ŭ Biełaruś Brent ničoha nie viedaŭ pra hetu krainu, ale praz hod asvoiŭsia, znajšoŭ pracu i navat trapiŭ u haradzienskuju kamandu pa amierykanskim futbole.
«Kali prylacić baćka, to pakažu jamu Farny kaścioł i Kałožu»
Kab dakazać kachańnie da svajoj lubaj, Brent u 2015 hodzie prylacieŭ u Hrodna na vučobu ŭ letniaj škole ruskaj movy HrDU. Mienavita ŭ Biełarusi amierykaniec zrabiŭ prapanovu svajoj dziaŭčynie. Nieŭzabavie maładyja pažanilisia.
«Kali my daviedalisia, što ŭ nas budzie dzicia, my doŭha vyrašali, dzie budziem žyć. U nas byŭ vybar: kali nie spadabajecca ŭ Biełarusi, pajedziem u Štaty. Ale z časam akazałasia, što ŭ Biełarusi lepš, čym ja čakaŭ. Možna skazać, ja palubiŭ Hrodna».
Vialikuju rolu ŭ vybary miesca pražyvańnia mieli ŭmovy dekretnaha adpačynku: u Štatach žančyna viartajecca na pracu praz šeść tydniaŭ paśla rodaŭ, u Biełarusi ž moža dahladać dzicia navat try hady. A dla Brenta hałoŭnaje było, kab jaho dzicia bolš času pravodziła z maci.
«Mnie spadabaŭsia Hrodna, bo tut šmat historyi. Harady ZŠA zusim maładyja, tam niama taho, što jość u Hrodnie. Chutka da nas u hości prylacić moj baćka, ja jamu pakažu ŭ pieršuju čarhu Farny kaścioł, Kałožu, taksama my pajedziem u Mirski i Niaśvižski zamki».
«U paraŭnańni sa Štatami Biełaruś vielmi tannaja kraina»
Brent kaža, što bolšaść ludziej u Amierycy navat i nie viedaje pra Biełaruś jak asobnuju krainu. Mnohija dumajuć, što heta horad u Rasii. Ale, pažyŭšy ŭ Hrodnie, Brent pierakanaŭsia, što Biełaruś — całkam asobnaja i stabilnaja kraina, jakaja jamu padabajecca.
«U paraŭnańni sa Štatami, Biełaruś vielmi tannaja kraina. Ja pracuju ŭ Hrodnie mieniedžaram pa prodažach i markietynhu i atrymlivaju mienš hrošaj, čym u Amierycy, ale žyvu lepšym žyćciom».
Brent imkniecca časta biehać pa malaŭničych miaścinach Hrodna. Adno ź lubimych jaho miescaŭ — Nioman. Dla amierykanca, jaki žyvie ŭ Hrodnie ŭžo hod, samaje dziŭnaje toje, što na vulicy nichto jamu nie ŭśmichajecca ŭ adkaz i nie kaža «pryvitańnie», jak heta pryniata rabić za akijanam.
«Ty lepšy za našaha kvaterbeka, dałučajsia»
«Mnohija ŭjaŭlajuć amierykancaŭ toŭstymi i lanivymi, ale mnie padabajecca łamać hetyja stereatypy: ja sapraŭdny amierykaniec i ja lublu sport».
Brent nie tolki biehaje ranicaj. Paśla pierajezdu ŭ Hrodna jon staŭ členam amatarskaj kamandy pa baskietbole, a potym naohuł trapiŭ u kamandu pa amierykanskim futbole.
Znajomstva Brenta z «Varvarami» prajšło na Fiestyvali nacyjanalnych kultur. Amierykaniec dałučyŭsia da futbalistaŭ i pakazaŭ, što ŭmieje dobra pasavać. Tady jamu skazali: «Brent, ty lepšy za našaha kvaterbeka, dałučajsia».
«Kali ja vučyŭsia ŭ škole, to hulaŭ za školnuju kamandu i byŭ tam prymajučym. Uzrovień biełaruskich kamand — taki ž jak u dobrych kamand u starejšaj škole ZŠA. Ale voś uzrovień kaledža ŭžo našmat vyšejšy».
Brent ličyć, što haradzienskaj kamandzie jość da čaho imknucca, i jon pasprabuje im u hetym dapamahčy.
Za «Varvaraŭ» amierykaniec pravioŭ užo hulniu. Tady haradziency prajhrali lidaru čempijanatu — «Rysiam». Brent nie chvalujecca z-za niaŭdałaha debiutu i ŭžo ź nieciarplivaściu čakaje čarhovaj hulni, dzie jon zmoža viarnucca ŭ svaje školnyja hady i pakazać, na što zdolny.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary