Banki źnizili pracentnyja staŭki pa ŭkładach nasielnictva

Kamiercyjnyja banki Biełarusi abviaścili ab źnižeńni 17 žniŭnia pracentnych stavak. Ź siońniašniaha dnia hrašova-kredytnyja ŭstanovy ŭstanavili maksimalnuju staŭku pa rublovych układach nasielnictva na ŭzroŭni 20,5% hadavych.

Tak, «Biełarusbank», jaki źjaŭlajecca najbujniejšym trymalnikam układaŭ nasielnictva, paviedamlaje, što z 17 žniŭnia maksimalnaja dachodnaść pa depazitach fizičnych asob u nacyjanalnaj valucie składzie 20,5% hadavych. Takuju staŭku kamiercyjny bank ustanaviŭ pa rublovych układach z terminam raźmiaščeńnia ad adnaho hoda.

U svaju čarhu «Biełahraprambank», jaki źjaŭlajecca druhim pa vieličyni partfiela ŭkładaŭ biełaruskim bankam, taksama abviaściŭ ab źnižeńni pracentnych stavak pa depazitach nasielnictva. Pačynajučy ź sierady bank ustanaviŭ maksimalnuju pracentnuju staŭku (20,5% hadavych) pry ŭmovie raźmiaščeńnia ŭkładu nie mienš jak na 370 dzion.

Nahadajem, da žniŭnia maksimalnaja dachodnaść pa depazitach nasielnictva ŭ biełaruskich bankach składała 25% hadavych, z 1 žniŭnia hrašova-kredytnyja ŭstanovy panižali miežavuju staŭku pa rublovych układach da 22,5% hadavych.

Pastajannaje źmianšeńnie dachodnaści pa bankaŭskich układach letam hetaha hoda abumoŭlenaje manietarnaj palitykaj, jakuju pravodzić Nacbank. U pačatku žniŭnia rehulatar čarhovym razam abviaściŭ ab źnižeńni pracentnych stavak na hrašovym rynku, da jakich pryviazanyja rekamiendavanyja Nacbankam staŭki pa depazitach nasielnictva.

U pryvatnaści Nacbank 17 žniŭnia źniziŭ z 20 da 18% staŭku refinansavańnia i z 25 da 23% — staŭki pa pastajanna dastupnych i dvuchbakovych apieracyjach pa padtrymcy najaŭnaj likvidnaści bankaŭ.

Pry hetym kamiercyjnym bankam Nacbank rekamienduje ŭstanaŭlivać staŭki pa ŭkładach nasielnictva na ŭzroŭni nie vyšejšym za 0,9 staŭki pa pastajanna dastupnych apieracyjach. Usie rašeńni ab źnižeńni pracentnych stavak, jakija prymalisia letam, rehulatar abhruntoŭvaje zapavoleńniem inflacyjaj.

Udzielniki finansavaha rynku Biełarusi ličać, što rašeńni Nacbanka ŭ halinie pracentnaj palityki, jakija prymalisia da apošniaha času, byli adekvatnymi, adnak dla dalejšaha źnižeńnia pracentnych stavak na hrašovym rynku pakul niama nieabchodnych umoŭ.

«Na moj pohlad, sihnał dla dalejšaha źnižeńnia pracentnych stavak jašče vielmi słaby. My nie bačym pakul sapraŭdnych drajvieraŭ ekanamičnaha rostu ŭ krainie, jakim patrebnyja hrošy dla padsiłkoŭvańnia hetaha rostu», — adznačyŭ u žniŭni ŭ kamientaryi BiełaPAN staršynia praŭleńnia «Biełhazprambanka» Viktar Babaryka.

• 0
• 0
• 0
• 0
• 0
• 0
• 0
• 0