Darafiejeva, Ułachovič i Kozik admovilisia ad sustrečy z žurnalistami

Kandydaty ŭ deputaty Iryna Darafiejeva, Mikałaj Ułachovič i Andrej Kozik admovilisia ad udziełu ŭ sustrečy z žurnalistami, jakuju 10 vieraśnia arhanizavaŭ u Minsku «Pres-kłub Biełaruś». Pavodle słoŭ arhanizataraŭ, nazvanyja kandydaty napiaredadni paviedamili, što nie buduć udzielničać u sustrečy.

Udzieł u sustrečy pryniali pieršy namieśnik staršyni Libieralna-demakratyčnaj partyi Aleh Hajdukievič, staršynia Partyi BNF Alaksiej Janukievič, namieśnik staršyni ruchu «Za Svabodu» Juraś Hubarevič, kiraŭniki ruchu «Havary praŭdu» Taćciana Karatkievič i Andrej Dźmitryjeŭ, aktyvisty Partyi BNF Illa Dabratvor i Aleś Michalevič, aktyvistka kamiteta pa stvareńni partyi Biełaruskaja chryścijanskaja demakratyja Volha Kavalkova, aktyvisty Biełaruskaj partyi «Zialonyja» Dźmitryj Kučuk i Alaksandr Sykała, samy bahaty kandydat Maksim Krupiejčanka i člen Abjadnanaj hramadzianskaj partyi, režysior Juryj Chaščavacki.

Hajdukievič zajaviŭ, što nastrojeny zmahacca za pieramohu i sumiesna sa svajoj kamandaj padrychtavaŭ pakiet źmianieńniaŭ, u jakim bolš za 100 prapanoŭ pa reformach u roznych śfierach. «Pieramahać možna ŭ luboj krainie, pry lubym zakanadaŭstvie, navat praz administracyjny resurs, tamu što kali ty praviadzieš aktyŭnuju kampaniju i zavajuješ ludziej, to nijakija falsifikacyi niemahčymyja», — skazaŭ Hajdukievič.

Janukievič adznačyŭ, što bałacirujecca ŭ deputaty, kab «vyzvalić biełaruskuju nacyju ad nacyjanalnaha i ekanamičnaha pryhniotu, dać svabodu ludziam i biźniesu», a taksama vyzvalić Biełaruś ad «tych kabalnych umoŭ», u jakich jana apynułasia z-za ciesnaha supracoŭnictva z Rasijaj. Jon taksama padkreśliŭ, što Biełaruś pavinna imknucca da aktyvizacyi adnosin ź ES i NATA.

Dabratvor zajaviŭ, što idzie ŭ parłamient, kab «abaranić krainu i refarmavać sistemu miascovaha samakiravańnia».

Dźmitryjeŭ adznačyŭ, što udziełam u parłamienckich vybarach «Havary praŭdu» praciahvaje «ruch za mirnyja pieramieny»: «Idu z prahramaj raźvićcia rehijonaŭ — tam i pytańni budaŭnictva žylla dla moładzi ŭ rehijonach, raźvićcia małoha i siaredniaha biźniesu, sacyjalnaj abarony nasielnictva».

Kučuk padkreśliŭ, što asnoŭnaj temaj jaho vybarčaj kampanii była antyjadziernaja tematyka. Jon taksama adznačyŭ, što kali nie źmianić «samu sutnaść parłamienta, kab jon staŭ zakanadaŭčym orhanam i ŭ poŭnaj miery vykonvaŭ svaje zadačy, to asabliva rabić tam niama čaho». «Heta moža być mahčymaść havaryć ab prablemach z vysokaj trybuny, ale nie prymać realnyja rašeńni», — skazaŭ Kučuk.

Karatkievič zajaviła, što praciahvaje «zmahacca za pieramohu i ŭdzieł u palitycy». «My padymajem prablemy, ź jakimi siońnia sutykajecca kožny čałaviek, kali sustrakajecca ź dziaržaŭnaj sistemaj», — skazała jana. Pry hetym Karatkievič padkreśliła, što «Havary praŭdu» budzie praciahvać svaju pracu da taho času, pakul nie dasiahnie svajoj mety — źmianieńniaŭ mirnym šlacham.

Kavalkova idzie ŭ parłamient dla taho, kab «vyrašać prablemy ludziej». Pavodle jaje słoŭ, u chodzie ahitacyi padymała roznyja pytańni, u tym liku i prablemu čystaj vady ŭ akruzie, dzie jana bałacirujecca.

Hubarevič adznačyŭ, što vystupaje za praviadzieńnie reform i sumlennych vybaraŭ. Kali b siońnia vybary pravodzilisia sumlenna, zajaviŭ jon, to ŭ parłamiencie pradstaŭniki ŭłady byli b u mienšaści, bo vybarščyki nie chočuć hałasavać za praŭładnych kandydataŭ. «Ale ŭžo ciapier jość šmat faktaŭ parušeńniaŭ, jakija kažuć nam pra toje, što, chutčej za ŭsio, nichto z apanientaŭ ułady ŭ parłamient nie patrapić», — skazaŭ Hubarevič.

Krupiejčanka padkreśliŭ, što kali budzie abrany deputatam, to dla jaho samym hałoŭnym budzie realizavać svaju pieradvybarnuju prahramu biez vydatkaŭ biudžetnych srodkaŭ.

Chaščavacki zajaviŭ, što Biełarusi patrebnyja mirnyja pieraŭtvareńni. «Ale mirny pierachod aznačaje pieradusim złom ciapierašniaj sistemy, u tym liku šlacham traplańnia ŭ parłamient chaj i nievialikaj kolkaści, ale tych ludziej, jakija mohuć havaryć praŭdu», — skazaŭ jon.

• 0
• 0
• 0
• 0
• 0
• 0
• 0
• 0