«Jany dobraachvotniki, a nie najmity»: u Minsku prajšła pres-kanfierencyja baćkoŭ dobraachvotnikaŭ, što vajujuć va Ukrainie suprać sieparatystaŭ

Staršynia arhkamiteta pa stvareńni BCHD Pavieł Sieviaryniec va ŭstupnym słovie zaznačyŭ, što cisk na hetych baćkoŭ — heta ŭsio praź cisk rasijskich uładaŭ. Va ŭsich baćkoŭ byli vobšuki, vyniataja majomaść — technika. Taksama cisnuć śpiecsłužby na siabroŭ chłopcaŭ.

Sieviaryniec paviedamiŭ taksama, što «RuMOł» (Rasijskaja moładź) paskardziŭsia ŭ prakuraturu na Marynu Chomič za arhanizacyju ŭ minskaj škole kancerta ŭ pamiać pra zahinułaha na Danbasie Alesia Čarkašyna.

Viktar Mielnikaŭ u svaim vystupie zaznačyŭ: «Ustupić u kamitet [baćkoŭ dobraachvotnikaŭ] mianie padšturchnuła toje, što pierakrajvajecca zakanadŭstva RB — uvodzicca paniaćcie najomnictva i teraryzm. Hety artykuł supiarečyć mižnarodnym aktam — treba z hetym štości rabić».

Volha Šaŭlukievič zaznačyła: «Ja maci, ja lublu svajho syna, adrakacca ad jaho nie źbirajusia. Mianie bili, ja zapałochanaja, ale ŭsio roŭna budu iści napierad», — kaža Volha. Volhu Šaŭlukievič raspaviadaje pra vypadak, kali nieviadomy ŭdaryŭ jaje pa hałavie, kali vyjšła z pryharadnaj elektryčki.

«Naš syn Loša ŭspryniaŭ Ukrainu jak susieda, na jakoha napali. Naš syn — darosły čałaviek, ja nie budu kamientavać jaho vybar. Da nas prychodzili, zabrali płanšet — moj płanšet. Pra niejkija narkotyki, falšyvyja hrošy kazali. Ale heta śmiešna — hod prajšoŭ, usio ŭžo pierakładziena ź miesca na miesca daŭno. Płanšet nam nie viarnuli», — zaznačaje jana. 

Siońnia byŭ stvorany Kamitet baćkoŭ dobraachvotnikaŭ, što vajujuć va Ukrainie (kiraŭniki — Šaŭlukievič i Mielnikaŭ).

Jaho meta — abaranić baćkoŭ i chłopcaŭ, jakija vajujuć. Miarkujecca zrabić sprobu jaho rehistracyi, a zatym źviartacca ŭ pałatu pradstaŭnikoŭ, ab admienie papravak u zakon ab najomnictvie, taksama ź listom u Administracyju i da Łukašenki, a taksama da prezidenta Ukrainy Piatra Parašenki.

«Tyja, chto vajujuć za Ukrainu — jany dobraachvotniki. Tyja, chto vajuje za DNR/ŁNR — najomniki», — miarkujuć u kamitecie.

Pa słovach Viktara Mielnikava — baćki Jana Mielnikava, na siońnia kala 120 biełarusaŭ vajuje za Ukrainu, a kala 200 čałaviek «za Navarosiju».

Inicyjatary stvareńnia kamiteta jašče nie źviazvalisia sa svajakami, usich dobraachvotnikaŭ, što vajujuć suprać sieparatystaŭ, ale płanujuć sabrać źviestki pra ŭsich.

Viktar Mielnikaŭ kaža, kab źviazvalisia ź im praz sacyjalnyja sietki.

«My prostyja ludzi, u nas jość praca, my možam try hady havaryć, ale treba pačać dziejničać, kab reabilitavać našych chłopcaŭ», — kaža jon.

• 0
• 0
• 0
• 0
• 0
• 0
• 0
• 0