U nievykanańni abaviazacielstvaŭ pry budaŭnictvie Harłykskaha horna-abahačalnaha kambinata abvinavacili adno adnaho Biełaruś i Turkmienistan.
27 vieraśnia staršynia Savieta Respubliki Nacyjanalnaha schodu, były premjer-ministr Michaił Miaśnikovič zaprasiŭ na razmovu pasła Turkmienistana Nazarhuły Šahułyjeva.
«U jakaści asoby, upaŭnavažanaj prezidentam Respubliki Biełaruś A.R.Łukašenkam zabiaśpiečvać kuratarstva za chodam budaŭnictva Harłykskaha horna-abahačalnaha kambinata ŭ Turkmienistanie, M.U.Miaśnikovič vykazaŭ krajniuju zaniepakojenaść u suviazi ź nievykanańniem turkmienskim bokam uziatych na siabie finansavych i inšych abaviazacielstvaŭ pa realizacyi nazvanaha prajekta. Było padkreślena, što hety faktar, a taksama šmatlikija pieraškody, u tym liku subjektyŭnaha charaktaru, ź jakimi sutykajucca biełaruskija budaŭniki, niehatyŭna ŭpłyvajuć na chod budaŭnictva», — havaryłasia ŭ paviedamleńni pres-słužby SR NS.
Miaśnikovič «padkreśliŭ nieabchodnaść pryniaćcia Ašchabadam šerahu nieadkładnych mier u metach paśpiachovaha zaviaršeńnia budaŭnictva kambinata».
30 vieraśnia turkmienskaje pasolstva raspaŭsiudziła zajavu MZS krainy, u jakoj paviedamlajecca, što ŭ hety dzień pa daručeńni prezidenta Turkmienistana Hurbanhuły Bierdymuchamiedava adbyłasia sustreča ŭpaŭnavažanych členaŭ urada Turkmienistana ź biełaruskaj delehacyjaj, jakuju ŭznačalvaje namieśnik prem`ier-ministra Anatol Kalinin.
«Asablivaja ŭvaha nadavałasia stanu asobnych prajektaŭ, što realizujucca ŭ Turkmienistanie biełaruskimi kampanijami. Jak viadoma, najbolš bujnym ź ich źjaŭlajecca budaŭnictva Harłykskaha horna-abahačalnaha kambinata, jakoje ažyćciaŭlajecca AAT» Biełharchimpram». U hetym kantekście turkmienskim bokam była vykazana krajniaja zaniepakojenaść u suviazi ź nievykanańniem biełaruskim bokam uziatych na siabie kantraktnych abaviazacielstvaŭ», — adznačajecca ŭ zajavie.
U pryvatnaści, «byli pryviedzieny kankretnyja fakty značnaha adstavańnia ad zapłanavanych terminaŭ budaŭnictva pa asobnych ab`iektach, jakija ź`iaŭlajucca važnymi składovymi častkami infrastruktury kambinata».
«Akramia taho, niahledziačy na nieadnarazovyja zvaroty ŭradavych struktur Turkmienistana, biełaruskim bokam da hetaha času nie pradstaŭlena infarmacyja ab terminach pastaŭki častki abstalavańnia na sumu ŭ niekalki dziasiatkaŭ miljonaŭ dołaraŭ ZŠA i prajekty nastupnych śpiecyfikacyj. Taksama adznačany fakty nieadnarazovaj zatrymki vypłaty zarabotnaj płaty z boku AAT «Biełharchimpram» turkmienskim hramadzianam, jakija pracujuć na budaŭnictvie ab`iektaŭ kambinata», — padkreślivaje MZS Turkmienistana.
«Adnačasova ŭvaha vice-prem`iera Biełarusi było pryciahnuta da paviedamleńniaŭ biełaruskich i niekatorych inšych ŚMI pra toje, što nibyta maje miesca «niezachavańnie turkmienskim bokam svaich finansavych abaviazacielstvaŭ pa kantrakcie». U suviazi z hetym va ŭradzie Turkmienistana było zajaŭlena pra niedakładny charaktar takoj infarmacyi. Pry hetym adznačana, što z boku zakazčyka — «Biełharchimprama» — časta nie vykonvajucca patrabavańni da svoječasovaha i poŭnaha afarmleńnia pakieta dakumientaŭ, nieabchodnaha dla pradstaŭleńnia da apłaty za vykananyja raboty», — adznačajecca ŭ zajavie.
Zychodziačy z vyšejpadadzienaha «turkmienskim bokam padkreślena nieabchodnaść pryniaćcia ŭradam Respubliki Biełaruś nieadkładnych mier u metach svoječasovaha i paśpiachovaha zaviaršeńnia budaŭnictva Harłykskaha horna-abahačalnaha kambinata ŭ Turkmienistanie».
Budaŭnictva kambinata pačałosia ŭ 2009 hodzie. 19 červienia kapsułu ŭ padmurak pradpryjemstvy zakłali Bierdymuchamiedaŭ i Łukašenka. Sumiesnaja raspracoŭka Harłykskaha kalijnaha radovišča budzie sapraŭdnym praryvam u supracoŭnictvie Biełarusi i Turkmienistana na doŭhaterminovuju pierśpiektyvu, zajaviŭ tady biełaruski kiraŭnik.
«My dajem pačatak pryncypova novaj halinie narodnaj haspadarki Turkmienistana — hornazdabyvajučaj. I asabliva pryjemna adznačyć, što tut my nie prosta hanarovyja hości, a niepasrednyja ŭdzielniki vialikaj spravy — maštabnaha inviestycyjnaha prajekta», — zajaviŭ na cyrymonii Łukašenka, padkreśliŭšy, što supracoŭnictva ź biełarusami daje harantyju nie tolki jakaści rabot, ale i vykanalnickaj i finansavaj dyscypliny.
U studzieni 2010 hoda AAT «Biełharchimpram» padpisała ź dziaržaŭnym kancernam «Turkmienchimija» kantrakt na budaŭnictva pad kluč Harłykskaha horna-abahačalnaha kambinata pa vypusku kalijnych uhnajeńniaŭ mahutnaściu 1,4 młn. ton u hod na bazie Harłykskaha radovišča kalijnych solaŭ (Lebapskaja vobłaść Turkmienistana). Pačatak raboty pradpryjemstva byŭ zapłanavany na studzień 2015 hoda. Prem`ier-ministram Biełarusi tady byŭ Miaśnikovič, jaki praciahvaje kuryravać budoŭlu.
U vieraśni 2012 hoda namieśnik prem`ier-ministra Biełarusi Anatol Kalinin i namieśnik staršyni Kabinieta ministraŭ Turkmienistana Bajmyrat Chadžamuchamiedaŭ zajavili, što ŭźviadzieńnie Harłykskaha horna-abahačalnaha kambinata z udziełam biełaruskich i turkmienskich budaŭnikoŭ viadziecca niedastatkovymi tempami.
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie3
Kamientary