Ułada zasakreciła sumu vydatkaŭ na pošuk «darmajedaŭ». Jak paviedamiła pres-słužba kampanii «Havary praŭdu», heta vynikaje ź lista namieśnika ministra pa padatkach i zborach Uładzimira Mukviča na zapyt, adpraŭleny kampanijaj 2 kastryčnika.
U liście aktyvisty prasili adkazać na pytańni, u što abychodzicca zbor padatku na darmajedstva i ci praŭda, što hetaja pracedura kaštuje padatkapłacielščykam daražej, čym atrymanyja ad «sacyjalnych utrymancaŭ» sumy.
U adkazie lidaru kampanii Andreju Dźmitryjevu čynoŭnik nie nazvaŭ hetyja ličby na toj padstavie, što jany «nie padlahajuć vydavańniu ŭ ramkach artykuła 16 zakona Respubliki Biełaruś ad 10.11.2008 «Ab infarmacyi, infarmatyzacyi i abaronie infarmacyi».
«Na naš pohlad, heta źjaŭlajecca ŭskosnym paćviardžeńniem taho, što hety padatak źjaŭlajecca na spravie marnatraŭstvam, prykładam nieapraŭdanych vydatkaŭ biudžetu, a nie srodkam jaho napaŭnieńnia», — adznačajuć u kampanii.
Kampanija «Havary praŭdu» pierakananaja, što zapatrabavanaja infarmacyja, u jakoj zacikaŭlena biełaruskaje hramadstva, na spravie nie padpadaje pad zakon «Ab dziaržaŭnaj tajnie» i pavinna być pradastaŭlena hramadzianam dla abjektyŭnaj acenki situacyi, jakaja skłałasia.
«Z ulikam składanych ekanamičnych realij, masavych skaračeńniaŭ na dziaržaŭnych pradpryjemstvach ličym hety padatak niespraviadlivym. Zamiest sacyjalnaj abarony z hramadzian vyciskajuć apošniaje. Urad nie moža zabiaśpiečyć narod pracaj i prymušaje jaho płacić za heta», — ličać aktyvisty.
Jany zaklikajuć «admianić abraźlivy z punkta pohladu maralnaści i ekanamična nieefiektyŭny padatak na darmajedaŭ», «raspracavać zakanadaŭčuju bazu pa ŭviadzieńni adzinaha zboru dla samazaniatych (fryłansieraŭ), zabiaśpiečyć sacyjalnuju abaronu asobam, jakija stracili pracu, stvaryć umovy dla raźvićcia profpieraaryjentacyi i raźvićcia małoha i siaredniaha biźniesu na miescach».
«My źvierniemsia ŭ parłamient z prośbaj zrabić deputacki zapyt i pakazać, ci apraŭdany hety zbor. Upeŭnieny, zasakrečanaja ličba stanie jašče adnym arhumientam na karyść admieny niespraviadlivaha paboru. Jašče raz zaklikajem urad pierajści ad represiŭnaj taktyki ŭ dačynieńni da ludziej da stvareńnia ŭmoŭ dla raźvićcia dziełavoj, ekanamičnaj inicyjatyvy na ŭsich uzroŭniach. Pryjšoŭ čas reformaŭ», — ličyć Dźmitryjeŭ.
Jak paviedamiła 26 kastryčnika namieśnik ministra pa padatkach i zborach Śviatłana Šaŭčenka, MPZ nakiravała kala 50 tys. paviedamleńniaŭ na vypłatu zboru hramadzianam, jakija nie ŭdzielničajuć u finansavańni dziaržaŭnych raschodaŭ.
Dekret prezidenta № 3 «Ab papiaredžańni sacyjalnaha ŭtrymanstva» ad 2 krasavika 2015 hoda abaviazvaje asob (hramadzian Biełarusi, zamiežnych hramadzian i asob biez hramadzianstva, jakija pastajanna pražyvajuć na terytoryi krainy), što nie ŭdzielničali ŭ finansavańni dziaržaŭnych raschodaŭ abo ŭdzielničali ŭ takim finansavańni mienš za 183 kalandarnyja dni ŭ minułym hodzie, vypłačvać zbor u pamiery 20 bazavych vieličyń (420 denaminavanych rubloŭ).
Ciapier čytajuć
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ20
Kamientary