Duchoŭnik bajevikoŭ «DNR» jedzie ŭ Viciebsk na forum ab «adzinstvie ruskaha naroda»
Skandalny dyjakan Pavieł Šulžonak na svajoj staroncy Ukantakcie vykłaŭ siońnia fotazdymak z nastupnym nadpisam: «Adpraŭlajusia ŭ Viciebsk na vialiki forum, pryśviečany adzinstvu Ruskaha Naroda. Spadziajusia, tam nadvorje lepšaje».
Chto taki Pavieł Šulžonak? Heta 34-hadovy dyjakan z Sankt-Pieciarburha. Jon prasłaviŭsia svaimi pavodzinami ŭ sacyjalnych sietkach. Naprykład, Šulžonak moh zapościć sełfi z mohiłak paśla niadaŭniaha pachavańnia ci z prybiralni. Jon nie saromieŭsia źmiaščać fotazdymki z pabaŭ i baraŭ, dzie ŭžyvaŭ piva. A taksama ździekavaŭsia z achviaravańniaŭ prychadžan.
Šulžonak pisaŭ, što jaho parafija padyhryvaje «chuncie» va Ukrainie, a siabie paraŭnoŭvaŭ ź Sierhijem Radaniežskim, jaki błasłaviŭ na zmahańnie Dźmitryja Danskoha. Prezidenta ZŠA Šulžonak banalna nazyvaje «małpaj», a ŭkraincaŭ — «śvińniami». Jašče dyjakan adznačyŭsia tym, što vioŭ niekatoryja słužby častkova na irłandskaj movie.
Takija pavodziny dyjakana nie zastalisia pa-za ŭvahaj. Jaho adchilili ad słužby na try miesiacy, adnak praź niejki čas znoŭ adnavili ŭ słužbie.
Pavieł Šulžonak nieadnarazova jeździŭ u tak zvanuju «DNR». Jon nie chavaŭ taho, što źjaŭlajecca duchoŭnikam «bajavych padraździaleńniaŭ Danieckaj narodnaj respubliki». «Pa vialikim rachunku tut pavinien być nie ja, a preśvitary i ijerei», — kazaŭ Šulžonak. Jon chadziŭ z našyŭkaj bataljona «Patryjot» na śviatarskim adzieńni.
«Ja nikoha nie mahu zabivać — heta realnaje abmiežavańnie, u adroźnieńnie ad piva», — adkazvaŭ Šulžonak na pytańnie, ci braŭ jon udzieł u bajavych dziejańniach.
Ukraina zabaraniła śviataru ŭjezd na svaju terytoryju.
Kudy ž jedzie dyjakan u Viciebsk? 9—10 listapada ŭ biełaruskim abłasnym centry adbudziecca «Iryninski forum: duchoŭnyja asnovy słavianskaha śvietu».
Arhanizatarami vystupajuć Patryjarchava padvorje pry chramie Śviatoj Iryny ŭ Maskvie, Nižaharodskaja mitrapolija, Viciebskaja jeparchija, Kancylaryja kiraŭnika Rasijskaha impieratarskaha doma, Viciebski dziaržaŭny ŭniviersitet. Mierapryjemstvy buduć prachodzić u Maskvie, Nižnim Noŭharadzie i Viciebsku. U Viciebsku viadoma, što projdzie vystava pra siamju Ramanavych.
Staršynioj forumu ŭ Viciebsku vystupaje jepiskap Dźmitryj (Drazdoŭ).
Cikava, što niekatoryja ŭdzielniki rasceńvajuć forum jak mierapryjemstva ab «adzinstvie ruskaha naroda».
Jakoje dačynieńnie Šulžonak maje da Biełarusi? U svaich sacyjalnych sietkach jon niekalki razoŭ padymaŭ temu našaj krainy. Adnojčy jon pakinuŭ spasyłku na razvahi maskoŭskaha ekśpierta ŭ pytańniach Biełarusi Bahdana Biaspalku, jaki razvažaŭ pra bujstva nacyjanalizmu ŭ našaj krainie. «Tryvožnyja zvanočki ź biełaruskaj uskrainy», — napisaŭ Šulžonak.
Praŭda, praź niejki čas pryznaŭ, što Biełaruś maje prava na svajo isnavańnie. Paśla taho, jak Fomačkin na adkryćci Paralimpijady pranios rasijski ściah, Šulžonak napisaŭ: «U Rasii ŭsio jašče jość maleńkaja braterskaja dziaržava, jakaja, u adroźnienne ad Ukrainy, maje prava na isnavańnie. Heta Biełaruś. U pryncypie, kali naša ŭłada i dalej budzie ščoŭkać svaimi bakłanavymi dziubami, jak jana ščoŭkała 20 hadoŭ u z Ukrainaj, my zhubim i hetuju krainu, ale pakul što nie. Amierykanskich vyludkaŭ Biełaruś da hetaj pary nie słuchajecca».
Ciapier čytajuć
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie27
Kamientary