BDIPČ ABSIE zaklikaje Biełaruś nieadkładna ŭvieści maratoryj na śmiarotnaje pakarańnie

Biuro pa demakratyčnych instytutach i pravach čałavieka (BDIPČ) ABSIE zaklikaje Biełaruś nieadkładna ŭvieści maratoryj na śmiarotnaje pakarańnie. Z takoj zajavaj vystupiŭ 2 śniežnia kiraŭnik BDIPČ Majkł Hieorh Link.

Jon adznačyŭ, što vykanańnie śmiarotnych pryhavoraŭ u Biełarusi idzie ŭrazrez ź mižnarodnaj tendencyjaj pa admienie hetaha vidu pakarańnia jak «žorstkaha, biesčałaviečnaha i źnievažajučaha hodnaść».

«Bolšaść dziaržaŭ ABSIE ŭžo admianili śmiarotnaje pakarańnie, i ja zaklikaju biełaruskija ŭłady ŭvieści maratoryj u jakaści pieršaha kroku pa admienie śmiarotnaha pakarańnia», — skazaŭ Link.

Jon nahadaŭ, što dziaržavy — členy ABSIE ŭziali na siabie abaviazacielstva trymać pytańnie ab śmiarotnym pakarańni na razhladzie.

Link taksama padkreśliŭ, što sakretnaść vakoł pryviadzieńnia ŭ vykanańnie śmiarotnaha pryhavoru ŭ Biełarusi sama pa sabie źjaŭlajecca «žorstkim, biesčałaviečnym i źnievažajučym hodnaść abychodžańniem z asudžanym i jaho svajakami». «Ale niezaležna ad taho, jak jano vykonvajecca, śmiarotnaje pakarańnie źjaŭlajecca nieprymalnym admaŭleńniem čałaviečaj hodnaści», — padkreślivajecca ŭ zajavie.

Link taksama adznačaje, što siarod 57 členaŭ ABSIE tolki Biełaruś i ZŠA prymianiajuć śmiarotnaje pakarańnie na praktycy.

U pieryjad z 28 listapada pa 1 śniežnia ŭ Biełarusi stała viadoma ab rasstrele troch asudžanych da vyšejšaj miery pakarańnia — 28-hadovaha Ivana Kulaša (abvinavačany ŭ zabojstvie troch žančyn, kradziažy i razboi), 31-hadovaha Siarhieja Chmialeŭskaha (pryznany vinavatym u žorstkim zabojstvie niekalkich čałaviek) i 49-hadovaha Hienadzia Jakavickaha (nieadnarazova sudzimy, pryznany vinavatym u zabojstvie svajoj sužycielki z asablivaj žorstkaściu). Jak vynikaje z aficyjnaha paviedamleńnia, atrymanaha svajakami Jakavickaha, jon byŭ rasstralany 5 listapada. Pravaabaroncy miarkujuć, što ŭ toj ža dzień byli rasstralanyja i inšyja pryhavoranyja da vyšejšaj miery pakarańnia.

Jakavicki i Chmialeŭski źviartalisia sa skarhami na pryhavor u Kamitet AAN pa pravach čałavieka. Kamitet zarehistravaŭ skarhi i prasiŭ biełaruskija ŭłady adkłaści rasstreły da razhladu spraŭ u AAN.

Novyja vypadki śmiarotnaha pakarańnia ŭ Biełarusi asudzili Saviet Jeŭropy, Mižnarodnaja fiederacyja pravoŭ čałavieka, «Mižnarodnaja amnistyja». Jeŭrasajuz dvojčy za hety tydzień vystupiŭ z zajavami, jakija asudžajuć śmiarotnaje pakarańnie ŭ Biełarusi.

• 0
• 0
• 0
• 0
• 0
• 0
• 0
• 0