«Nacyja, dziaržaŭnaść, zamiežža — vykliki sučasnaści i stratehija raźvićcia» — stała viadoma data VII Źjezda biełarusaŭ śvietu

Siomy źjezd biełarusaŭ śvietu adbudziecca 15—16 lipienia 2017 hoda ŭ Minsku. Datu i miesca praviadzieńnia zaćvierdziła Małaja Rada Zhurtavańnia na pasiadžeńni, jakoje adybłosia 15 śniežnia. Taksama Rada pryniała šerah važnych rašeńniaŭ, siarod jakich najpieršaje — vyznačeńnie temy Źjezdu: «Biełaruskaja nacyja, biełaruskaja dziaržaŭnaść, biełaruskaje zamiežža — vykliki sučasnaści i stratehija raźvićcia».

Pavialičyć

Hetaja tema dazvalaje zasiarodzić uvahu na prablemie zachavańnia dziaržaŭnaha suvierenitetu Biełarusi, što ŭ śviatle hieapalityčnych pracesaŭ apošniaha času nabyvaje ŭsio bolšuju aktualnaść, a taksama razhledzieć pa-raniejšamu nadzionnyja prablemy, źviazanyja sa słabaj nacyjanalnaj identyčnaściu jak siarod biełarusaŭ zamiežža, hetak i ŭ samoj Biełarusi. Važnym aśpiektam pracy Źjezdu stanie vypracoŭka rekamiendacyj adnosna praktyčnych krokaŭ dla pahłybleńnia ŭzajemadziejańnia pamiž Biełaruśsiu i biełarusami zamiežža. 

Źjezdy biełarusaŭ śvietu ładziacca Zhurtavańniem raz na čatyry hady, pačynajučy ad 1993 hoda. I kožny źjezd rabiŭsia važnaj padziejaj, etapam u raźvićci stasunkaŭ pamiž Biełaruśsiu i biełarusami zamiežža.

Mienavita ź inicyjatyvy Zhurtavańnia «Baćkaŭščyna», ahučanaj na Trecim źjeździe, pačali farmiravacca prapanovy dla zakonaprajekta «Ab biełarusach zamiežža» i dziaržaŭnaj prahramy «Biełarusy ŭ śviecie». Z pryniaćciem hetaha zakona ŭ 2014 hodzie byŭ jurydyčna zamacavany status «biełarus zamiežža» i zakładzienaja zakanadaŭčaja baza dla supracoŭnictva ź biełaruskaj dyjasparaj, jakuju ciapier treba pašyrać i napaŭniać praktyčnymi krokami.

Čakajecca, što prapanovy adnosna ŭzajemadziejańnia biełaruskaj dyjaspary i Biełarusi buduć abmierkavanyja jak na plenarnym pasiadžeńni, tak i padčas pracy siekcyj. Na siońnia Małaja Rada zaćvierdziła 4 siekcyi, ź jakich Vialikaja Rada (kudy ŭvachodziać pradstaŭniki i kiraŭniki biełaruskich arhanizacyj u zamiežžy) abiare try.

Na hałasavańnie Vialikaj Rady vyniesieny nastupnyja temy siekcyj:

1. Histaryčnyja karani biełaruskaj dziaržaŭnaści.

2. Biełaruskaja dyjaspara i Biełaruś: stratehija ŭzajemadziejańnia ŭ sučasnych umovach.

3. Biełaruskaja mova i kultura jak padmurak dziaržaŭnaj niezaležnaści.

4. Chryścijanstva ŭ Biełarusi ŭ śviatle 500-hodździa vydańnia Biblii Skaryny.

Małaja Rada daručyła Upravie sfarmavać Arhanizacyjny kamitet i Pracoŭnuju hrupu pa padrychtoŭcy Siomaha źjezdu biełarusaŭ śvietu, a taksama vyznačyć normy pradstaŭnictva delehataŭ. Dziela vyśviatleńnia najbolš važnych nadzionnych pytańniaŭ, jakija chvalujuć arhanizacyi biełarusaŭ zamiežža, było vyrašana pravieści apytańnie, u jakim sabrać prapanovy, skiravanyja jak da biełaruskaj dziaržavy, tak i da hramadskaści. Ankiety buduć dasłanyja ŭ šmatlikija biełaruskija supołki za miažoj. Kab uličyć mierkavańnie jak maha bolš šyrokaha koła tych, chto zajmajecca biełaruskaj spravaj pa ŭsim śviecie, nieŭzabavie na sajcie «Baćkaŭščyny» źjavicca elektronnaja forma apytańnia.

• 0
• 0
• 0
• 0
• 0
• 0
• 0
• 0