Film «Ślady na vadzie», padtrymany Šunievičam, u prakacie nie akupiŭsia navat na 10%
Film «Ślady na vadzie» vyjšaŭ u prakat 23 lutaha. Asnovu siužeta skłała baraćba biełaruskaj milicyi z bandytyzmam u pieršyja paślavajennyja hady. Na dumku ministra unutranych spraŭ Ihara Šunieviča, film staŭ vydatnym padarunkam da 100-hodździa biełaruskaj milicyi. Ale svaimi hrašyma hledačy nie padtrymali stužku. U asnoŭnym prakacie, jaki skončyŭsia 31 sakavika, jana ledź zdoleła «adbić» kala 8% patračanych na jaje srodkaŭ.
Biudžet karciny skłaŭ amal $1 miljon. Pryčym 70% finansavańnia ŭziało na siabie Ministerstva kultury: taki ščodry padarunak prajektu dastaŭsia ŭ 2015 hodzie paśla pieramohi ŭ adkrytym respublikanskim konkursie na vytvorčaść nacyjanalnych filmaŭ. Pa kursie lipienia 2015 hoda heta skłała 14 miljardaŭ rubloŭ.
Na kolki ŭdałosia akupić vydatkavanyja hrošy?
«Biełaruśfilm» paviedamiŭ, što na «pieršy ajčynny bajavik» zavitali 81 733 hledačy. Maŭlaŭ, heta samy paśpiachovy nacyjanalny film za apošniaje dziesiacihodździe.
Praŭda, u Minsku «Ślady pa vadzie» pahladzieli tolki 5836 čałaviek. Masavaści ŭdałosia dasiahnuć za košt pravincyi. U papularnych zamiežnych filmach, na jakija ludzi iduć pa ŭłasnym žadańni, praporcyja zvyčajna advarotnaja — kasa robicca ŭ stalicy.
Nazvać ahulnyja kasavyja zbory «Śladoŭ na vadzie» nie zmahli ni ŭ «Kinavideaprakatach», ni ŭ Ministerstvie kultury.
Zatoje paraili padličyć samastojna. Košt kvitka składaŭ 1,6-2 rubli. Navat kali brać pa maksimalnaj staŭcy, vychodzić, što ŭdałosia sabrać 163 tysiačy rubloŭ ($86 tysiač u ekvivalencie). Takim čynam, biudžet karciny akupiŭsia nie bolš čym na 8%. Jak bačycie, ličba vielmi dalokaja ad taho, kab chacia b vyjści «ŭ nul».
Načalnik adździeła realizacyi i rekłamy nacyjanalnaj kinastudyi «Biełaruśfilm» Juryj Ihruša ličyć, što takija vyniki nie padstava dla taho, kab šukać niehatyŭ.
«Ja bačyŭ, što u sacyjalnych sietkach abmiarkoŭvajuć, maŭlaŭ, jak heta tak, adzinaja stužka, źniataja «Biełaruśfilmam» u 2016 hodzie, i nie akupiłasia zusim. Ale hetyja ludzi nie razumiejuć, što ź filmami paśla 1,5-2-miesiačnych pakazaŭ tak nie byvaje. Heta doŭhaterminovaja sprava, kudy ŭvachodzić ich prodaž na telebačańnie, DVD-dyski i inšaje. Akramia taho, u kinateatrach Bresckaj, Mahiloŭskaj i Viciebskaj abłaściej «Ślady na vadzie» možna budzie hladzieć amal da vieraśnia»,— kamientuje situacyju Juryj Ihruša i dadaje, što tolki ŭ ZŠA film moža pabić rekordy prakatu za vychodnyja. A ŭ Biełarusi, asabliva z nacyjanalnym praduktam, heta, maŭlaŭ, niemahčyma: kali film i prynosić prybytak, to tolki praz hady.
Čytajcie taksama: Kino i palaki: u prakat vyjšła čarhovaja stužka «Biełaruśfilma» pra paślavajenny supraciŭ z savieckich pazicyj
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ14
Kamientary