Abvieščany pryjom zajavak na premiju Hiedrojca

Zasnavalniki Litaraturnaj premii imia Ježy Hiedrojca — Biełaruski PEN-centr, Sajuz biełaruskich piśmieńnikaŭ, Pasolstva Respubliki Polšča ŭ Respublicy Biełaruś i Polski Instytut u Minsku — abviaščajuć pačatak pryjomu zajavak na ŭdzieł u konkursie. Na premiju mohuć naminavacca knihi, vydadzienyja ŭ papiarovym abo elektronnym varyjantach ciaham 2016 hoda na biełaruskaj movie ŭ žanrach «mastackaja proza», «eseistyka».

Abviaščeńnie i ŭšanavańnie pieramožcaŭ adbudziecca ŭvosień. Uznaharody, jakija čakajuć troch najlepšych, pavodle mierkavańnia žury, prazaikaŭ — hrašovy pryz, litaraturnyja stypiendyi i zaprašeńni ŭ jeŭrapiejskija damy tvorčaści.

U adpaviednaści sa statutam premii Hiedrojca, žury abirajecca kamitetam, u jaki ŭvachodziać staršynia Biełaruskaha PEN-centra, staršynia Sajuza biełaruskich piśmieńnikaŭ, a taksama asoba, jakuju jany vybrali ź siabraŭ žury minułych hadoŭ. Sioletni kamitet: Andrej Chadanovič, Barys Piatrovič i Valancin Akudovič.

U žury premii Hiedrojca-2017 uvajšli:

Michaś Andrasiuk, piśmieńnik, žurnalist (Hajnaŭka, Polšča)

Raisa Baravikova, piśmieńnica, paetesa (Minsk, Biełaruś)

Alhierd Bacharevič, piśmieńnik, publicyst (Minsk, Biełaruś)

Alena Brava, piśmieńnica (Barysaŭ, Biełaruś)

Pavieł Kaściukievič, piśmieńnik, pierakładčyk, vydaviec (Minsk, Biełaruś)

Cichan Čarniakievič, litaraturaznaŭca i litaraturny krytyk (Minsk, Biełaruś)

Knihi dla ŭdziełu ŭ konkursie možna dasłać da 15 traŭnia 2017 hoda na paštovy adras: 220050, Minsk, p/s 218, a taksama na elektronny adras: [email protected].

Zajaŭka musić utrymlivać nastupnyja źviestki:

a) infarmacyja pra naminatara, što vyłučaje tvor na Premiju: kantaktnyja numary telefonaŭ i adrasy;

b) karotkaja tvorčaja bijahrafija aŭtara albo ŭsich suaŭtaraŭ, kali tvor napisany ŭ suaŭtarstvie;

v) anatacyja knihi;

h) uryvak da 10 tysiačaŭ znakaŭ, jaki budzie raźmieščany na sajcie Premii;

d) pažadana — adrasy kramaŭ, dzie možna nabyć knihu, ci spasyłki, pa jakich jaje možna spampavać u elektronnym varyjancie.

Da zajaŭki nieabchodna dałučyć 7 asobnikaŭ u papiarovym i 1 asobnik u elektronnym varyjancie. Zajaŭki biez elektronnaj viersii i 7 asobnikaŭ knihi prymacca da ŭdziełu ŭ konkursie nie buduć.

***

Premija imia Ježy Hiedrojca ŭručajecca z 2012 hoda. Papiarednija pieramožcy premii: Pavał Kaściukievič z knihaj «Zbornaja RB pa niehałoŭnych vidach sportu» (2012), Uładzimir Niaklajeŭ z knihaj «Aŭtamat z haziroŭkaj ź siropam i biez» (2013), Ihar Babkoŭ z knihaj «Chvilinka: Try historyi» (2014), Viktar Kaźko z knihaj «Čas źbirać kości» (2015), Maks Ščur z knihaj «Zaviaršyć hieštalt» (2016).

• 0
• 0
• 0
• 0
• 0
• 0
• 0
• 0