Adzinaccać kryčaŭskich milicyjantaŭ napisali zvarot Šunieviču: kiraŭnictva adbiraje ŭ ich premii

Kryčaŭskich milicyjantaŭ kiraŭnictva prymušaje vykonvać płan pa «złačynstvach» i addavać častku zarobkaŭ. 11 supracoŭnikaŭ pravaparadku dasłali ŭ lutym list ministru Šunieviču, u jakim apisvajuć umovy svajoj pracy.

Padpałkoŭnik milicyi Ihar Vusik prasłužyŭ u milicyi 21 hod, miedal «Za biezdakornuju słužbu», jaki jon atrymaŭ letaś, pakazvaje z honaram. Milicyjant pryznajecca, što, adnak, słužyć u Kryčaŭskim RAUSie, dzie jon kiruje ciapier adździełam achovy paradku i prafiłaktyki, usio ciažej. Padpałkoŭnik ćvierdzić, što ciapierašni jahony kiraŭnik, padpałkoŭnik Stanisłaŭ Čupryn, pierajšoŭ usie mahčymyja miežy: supracoŭnikam nie dajuć premijaŭ, a kali premirujuć, hrošy treba addać kiraŭnictvu.

Pabory, kaža Vusik, jahony kiraŭnik dzialiŭ z namieśnikam kiraŭnika pa ideałahičnaj pracy Vasilom Cichanienkam.

«U śniežni 16-ha hoda nam vydali premii, ale my hetaje premijavańnie musili viarnuć. Cichanienku i inšym kiraŭnikam, vidać», — raspaviadaje ŭčastkovy Kryčaŭskaha RAUSu Andrej Šaškoŭ.

Pavodle milicyjantaŭ, dziažurnyja nie mahli sychodzić sa słužby, nie vyjaviŭšy pravaparušeńniaŭ pavodle artykułaŭ «Za chulihanstva» i «Za raśpivańnie ałkaholnych napojaŭ u hramadskich miescach». Milicyjanty musili dziažuryć, pakul nie znojduć vinavatych pavodle adpaviednych artykułaŭ. Na ŭzmocnieny režym niasieńnia słužby za minuły hod pracaŭnikoŭ adździełu achovy paradku pieravodzili 8 razoŭ, zaznačaje były milicyjant Juryj Dziubanaŭ.

«Abstanoŭka ŭ rajadździele była narmalnaja — ludzi mahli pracavać u štatnym režymie. A heta [uzmocnieny režym] — 10 dzion biez vychodnych i 12-hadzinny pracoŭny dzień», — kaža Dziubanaŭ.

«Hniłaja vinahradzina»

Aproč taho, milicyjanty kažuć pra vierbalnyja ździeki. «Abrazy? «Hniły vinahrad, hniłaja vinahradzina, plesień, pryniasi mnie svoj dypłom — ja jaho parvu», — kaža Ihar Vusik. — Maje słovy mohuć paćvierdzić inšyja supracoŭniki — na naradach, dzie b heta ni było: «pryniasicie mnie svaje dypłomy — ja parvu», «prynoście mnie svaje zajavy — u mianie ŭ milicyju čarha staić», «łatruhi», «lanoty», maciernyja vyrazy».

Ihar Vusik razam z kalehami źviartaŭsia da vyšejšaha kiraŭnictva, adnak mahiloŭskaje Upraŭleńnie ŭłasnaj biaśpieki parušeńniaŭ pavodle skarhi milicyjanta nie znajšło. Bolš za toje, paśla napisańnia skarhi sam Vusik trapiŭ na prafiłaktyčny ŭlik. Milicyjant upeŭnieny: u Čupryna suviazi z mahiloŭskimi kalehami, što ładzili pravierku.

«Ja hałasavaŭ za prezidenta»

Ciapier i Ihar Vusik, i jahonyja paplečniki raźličvajuć na rasśledavańnie staličnych orhanaŭ. U zvarocie da ministra ŭnutranych spravaŭ Ihara Šunieviča jany pieraličyli ŭsio, z čym sutykalisia pad kiraŭnictvam Čupryna: źniavahi i kpiny, niespraviadlivyja pakarańni, nieabhruntavanyja z hledzišča milicyjantaŭ pieravody na ŭzmocnieny varyjant niasieńnia słužby dy abaviazkovyja vyjaŭleńni pravaparušeńniaŭ. Padpisali zvarot 11 čałaviek.

«Ja b chacieŭ skazać, što paŭžyćcia prapracavaŭ milicyjantam. Ja hałasavaŭ za prezidenta — za hetuju ŭładu. Ale hetyja nieradzivyja pradstaŭniki — jany tolki padryvajuć jaho aŭtarytet. Naš zvarot da vas — vymušany», — pryznajecca Ihar Vusik. Milicyjant ličyć, što jahonaje kiraŭnictva pavodzić siabie tak, bo adčuvaje biespakaranaść.

Stanisłaŭ Čupryn pa telefonie kaža, što spravu ŭžo razhledzieli.

«Kali źviarnulisia ludzi da ministra sa skarhaj, značyć, raźbiralnictva pravodziać peŭnyja kampietentnyja orhany, — kaža pa telefonie kiraŭnik Kryčaŭskaha RAUS Stanisłaŭ Čupryn. — Dakładniej, užo razabralisia, jość vyniki peŭnych pravierak».

Za parušeńniami ŭ Kryčaŭskaj milicyi pilna sočać miascovyja žurnalisty. Mikałaj Hierdzij ź miascovaje haziety «Volny horad» pryčynaju takoje situacyi nazyvaje kumaŭstvo i zakrytaść dla miedyjaŭ. «Zakrytaść našaj milicyi — heta asnoŭnaja pryčyna voś hetych parušeńniaŭ. Voś hladzicie — napiŭsia, zatrymali — zaraz pa-mojmu kiraŭnik pa-mojmu stolinskaj milicyi — čaho jon tak siabie pavodzić? Tamu što prykryjuć».

Padpałkoŭnik Vusik choča damahčysia zvalnieńnia kiraŭnika, adnak dapuskaje, što paśla aśviatleńnia spravy ŭ miedyjach zvolniać jaho samoha. Navat majučy troch małych synoŭ, jon takoha vyniku nie baicca. Kaža, što ŭ lubym vypadku pracavać hetak, jak apošni hod, bolš nie moža.

• 0
• 0
• 0
• 0
• 0
• 0
• 0
• 0