Navukoŭcy narešcie vyvieli formułu dla zabojstva rakavych kletak
Rakavyja stvałavyja kletki, jakija spryjajuć rostu fatalnych puchlin, mohuć być źniščanyja prostaj kambinacyjaj antybijotykaŭ i vitaminu S. Pra heta paviedamlaje naukatv.ru sa spasyłkaju na zajavu daśledčykaŭ z univiersiteta Sołfard (Vialikabrytanija). Havorka idzie ŭ dadzienym vypadku pra kletki, jakija stanoviacca pieršapryčynaj raka.
Sposaby lačeńnia ankałahičnych zachvorvańniaŭ, jak akazałasia, mohuć być prostyja i biaśpiečnyja. Tak, u 2015 hodzie amierykanskija miedyki ŭstanavili, što aśpiryn błakuje rost puchlin małočnych załozaŭ i zaminaje raspaŭsiudu raka hrudziej.
I voś čarhovym hučnym adkryćciom stała praca brytanskich navukoŭcaŭ, jakija dakazali: spałučeńnie daksicyklinu (paŭsintetyčnaha antybijotyku, jaki šyroka vykarystoŭvajecca dla lačeńnia prablem skury) i askarbinavaj kisłaty (vitamin S) źniščaje stvałavyja rakavyja kletki.
«Častka rakavych kletak vyžyvaje paśla chimijaterapii i stanovicca ŭstojlivaj da lekaŭ. Kab daviedacca, jak jany heta robiać, my vypracavali novuju stratehiju», — raspaviadaje viadučy aŭtar pracy Majkł Lisanci (Michael Lisanti). «My padazravali, što adkaz moža padkazać toje, što niekatoryja vidy raku, jakija my nazyvajem mietabalična hnutkimi, zdolnyja pieraklučacca pamiž krynicami charčavańnia. To bok kali miedykamient źnižaje kolkaść dastupnaha pažyŭnaha rečyva, hnutkija rakavyja kletki mohuć «prakarmicca» za košt alternatyŭnaj krynicy».
U suviazi z hetym daśledčyki raspracavali padychod, jaki nie daje rakavym kletkam mianiać krynicy charčavańnia.
U ekśpierymiencie z kulturami kletak kamanda pastupova naroščvała dozu daksicyklinu na praciahu troch miesiacaŭ, raźvivajučy ŭ kletak mietabaličnuju ryhidnaść (žorstkaść). Meta zaklučałasia va ŭtrymańni ich žyvymi, ale mocna asłablenymi i źniasilenymi, kab jany stali bolš usprymalnymi da nastupnaha ŭdaru.
Pry hetym asnoŭnaj krynicaj charčavańnia dla stvałavych rakavych kletak stała hlukoza. I voś tut u baraćbu ŭstupaje vitamin S: u dadzienym vypadku jon pavodzić siabie jak inhibitar hlikolizu. Inšymi słovami, kletkam prosta niama adkul atrymlivać charčavańnie, jany pačynajuć haładać i pamirać.
Prostaja kambinacyja vitaminu S i daksicyklinu (darečy, nietaksičnych rečyvaŭ, jakija mohuć źnizić pabočnyja efiekty ad supraćrakavaj terapii) akazałasia amal u sto razoŭ bolš efiektyŭnaj, čym 2-dezoksi-D-hlukoza (2-DG) — inšaha pierśpiektyŭnaha supraćrakavaha srodku, jaki taksama znachodzicca na stadyi testavańnia.
Praŭda, aŭtary padkreślivajuć, što taki efiekt naziraŭsia tolki ŭ łabaratornych umovach. Napieradzie budzie pravierka efiektyŭnaści novaha mietadu lačeńnia na žyviołach i z udziełam ludziej. A pakul navukoŭcy papiaredžvajuć, što nie varta sprabavać apraboŭvać takoje lačeńnie ŭ chatnich umovach.
Kamientary