Minzdaroŭja prapanuje zabaranić prodaž ałkaholu paśla 23-j hadziny i da 9 ranicy
Ministerstva achovy zdaroŭja prapanuje abmiežavać čas prodažu ałkaholu, u tym liku i piva, pa ŭsioj krainie i realizoŭvać jaho tolki ad 9 ranicy da 23 hadzin viečara. Paśla hetaha času jaho mohuć pradavać tolki ŭ kaviarniach i restaranach. Pra heta žurnalistam raspavioŭ hałoŭny narkołah Ministerstva achovy zdaroŭja Ivan Kanarazaŭ.
Pavodle jaho słoŭ, nad prajektam pravavoha narmatyŭnaha aktu ŭ liku inšych pracujuć MUS i Ministerstva antymanapolnaha rehulavańnia. Ministerstva achovy zdaroŭja svaje prapanovy ŭnios jašče ŭ krasaviku hetaha hoda.
- My razam z MUS adsočvali statystyčnuju infarmacyju. Jość vyraznaja dokaznaja baza, što ŭ vialikaj stupieni złačynstvy nočču i poźnim viečaram źviazany z užyvańniem ałkaholu. Ich ździajśniajuć padpityja ludzi, - tłumačyć Ivan Kanarazaŭ.
U minułym hodzie ŭ prajekcie antyałkaholnaha ukaza ŭžo była prapisanaja zabarona na prodaž śpirtnoha ad 22.00 da 9.00. Akramia taho, u kramach płoščaj bolš za 400 kv. m ałkahol prapanoŭvałasia kuplać tolki ŭ śpiecyjalnych adździełach. Adnak ukaz pakul nie pryniaty.
Uletku 2015 hoda ŭ Minsku dziejničali časovyja abmiežavańni na prodaž śpirtnych napojaŭ. Ź siaredziny červienia da kanca žniŭnia ałkahol pradavali ŭ handlovych kropkach ad 9.00 da 22.00. Paśla narady, na jakoj Alaksandr Łukašenka raskrytykavaŭ urad za nierašučuju abaronu ŭnutranaha rynku ałkaholu, «načny suchi zakon» admianili.
Pry hetym pavodle źviestak Suśvietnaj asacyjacyi achovy zdaroŭja, u 2016-m biełarusy vypili 16,4 litra ałkaholu na čałavieka, i heta druhoje miesca ŭ śviecie paśla Litvy. Pavodle infarmacyi Biełstatu, u minułym hodzie ŭ nas prypadała 8,8 litra na dušu nasielnictva. Źviestki adroźnivajucca, bo Biełstat daje pakazčyk prodažaŭ ałkaholu. SAAZ, uličvajučy acenki ekśpiertaŭ, vyvodzić pakazčyk spažyvańnia ałkaholu. Pry hetym pakazčyk prodažaŭ raźličvajecca na ŭsio nasielnictva, a spažyvańnie - z ulikam hrup, jakija vypivajuć. Ludziej ŭ vieku ad 0 da 15 hadoŭ tut nie ličać.
Na dyspansiernym uliku ŭ krainie na 1 žniŭnia 2017 hoda staić kala 164 500 chvorych na ałkahalizm. Pry hetym u Minsku - kala 35 tysiač čałaviek.
Ciapier čytajuć
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary