«Čałaviek budzie abhornuty»: jak «internet rečaŭ» źmienić naša štodzionnaje žyćcio
Lanota — ruchavik prahresu. Tamu čałaviek imkniecca stvaryć bolš rečaŭ, jakija b palahčali žyćcio i dazvalali rabić jak maha mienš niepatrebnych ruchaŭ i dziejańniaŭ. Dziakujučy svajoj lanocie my ščylna nablizilisia da stvareńnia hetak zvanaha «internetu rečaŭ».
Internet rečaŭ (abo sietka rečaŭ, u anh. skaračeńni IoT) — heta kancepcyja sietki fizičnych pradmietaŭ («rečaŭ»), abstalavanych ubudavanymi technałohijami dla ŭzajemadziejańnia adno z adnym abo z navakolnym asiarodździem, dla kiravańnia jakimi nie treba ci nie abaviazkova ŭmiašańnie čałavieka.
Praściej kažučy, kali ŭziać niekalki lubych rečaŭ (dreva, pras, hadzińnik, dźviery, aŭtamabil) i abstalavać ich pryładami dla padklučeńnia da internetu, usie jany zmohuć pieradavać adno adnamu infarmacyju pra svoj biahučy stan i takim čynam karektavać pracu adno adnaho tak, kab być najbolš uzajemakarysnymi i karysnymi čałavieku.
Ciapier internet rečaŭ znachodzicca na stadyi stanaŭleńnia, bo jon źviazany, u pieršuju čarhu, z «razumnymi» rečami. Treba adroźnivać razumnyja hadžety (smarthadžety) i hadžety z aŭtamatyzavanymi pracesami. I chacia razumnych rečaŭ s kožnym dniom vyrablajecca ŭsio bolš, šmat jakija ź ich nasamreč prosta zvyčajnyja «aŭtamatyzatary» paŭsiadzionnych dla čałavieka pracesaŭ.
Naprykład, toj ža «razumny dom» u bolšaści vypadkaŭ — nijaki nie razumny. Vy možacie ŭklučyć kandycyjanier, nacisnuŭšy adpaviednuju knopku ŭ svaim smartfonie, abo ŭstalavać u naładach, kab jon uklučaŭsia kožny dzień, kali vy prychodzicie z pracy, — a 18-j. Ale što budzie, kali adnym dniom paśla pracy vy vyrašycie pajści nie dadomu, a na sustreču ź siabram? Kandycyjanier usio adno ŭklučycca, bo vy jaho tak zaprahramavali.
Dyk voś, internet rečaŭ praduhledžvaje takuju kancepcyju, kali vaš dom sam razumieje, ci treba ŭklučyć siońnia ŭviečary kandycyjanier, ci treba zapalić śviatło ŭ tym ci inšym pakoi i ci treba zaraz zhatavać var.
Pieradavyja transnacyjanalnyja kampanii, jakija zajmajucca raspracoŭkami ŭ śfiery infarmacyjnych tenałohij, hod za hodam robiać IoT usio bolš blizkim da paŭsiadzionnaha žyćcia. U Biełarusi, kaža zasnavalnik kampanii VP Capital Viktar Prakapienia, nichto pakul surjozna nie zajmajecca technałohijami interneta rečaŭ.
«Vielmi škada, bo heta vielmi pierśpiektyŭny napramak raźvićcia technałohij. Internet rečaŭ — adzin z najbolš mocnych technałahičnych trendaŭ sučasnaści, naroŭni sa štučnym intelektam, dadanaj i virtualnaj realnaściu, błokčejnam i 3D-kapijavańniem. Technałohii interneta rečaŭ užo jeść u Biełarusi i z kožnym hodam ich budzie usio bolej. Ale, na žal, heta pierš za ŭsio źviazana z praniknieńniem technałohij, raspracavanych na zachodnich rynkach. Spadziajusia, što ŭžo chutka z pryniaćciem Dekreta prezidienta «PVT 2.0» situacyja pačnie palapšacca, i bolš biełaruskich kampanij buduć zajmacca novymi prahresiŭnymi technałohijami», — padzialiŭsia z «Našaj Nivaj» IT-biznesmien.
Što ž tyčycca kampanij samaho biznesmiena, to, pa jahonych słovach, pakul što jany zasiarodzilisia na technałohijach štučnaha intelektu i dadadzienaj realnaści.
«Ale my pilna nazirajem za tendencyjami, i ja nie mahu vyklučać, što my budziem raspracoŭvać technałohii internetu rečaŭ u budučym», — skazaŭ Prakapienia.
Naohuł, historyju interneta možna padzialić na čatyry pieryjady:
- Web 1.0 — mahčymy tolki prahlad kantenta prymityŭnych sajtaŭ
- Web 2.0 — mahčymy nie tolki prahlad, ale i hienieracyja infarmacyi
- Web 3.0 — źjaviłasia mašynnaja apracoŭka źviestak
- Internet of Things (IoT) — internet rečaŭ
Ciapier my znachodzimsia na pramiežkavym etapie — pamiž Web 3.0 i IoT. Naprykład, kali dom sapraŭdy «razumny», to vaš mabilny telefon budzie adsočvać vašaje znachodžańnie z dapamohaj GPS i pieradavać jaho ŭ dom. I kali kandycyjanier razumieje, što vy z pracy pajechali nie dadomu, to jon prosta nie budzie ŭklučacca.
Jašče adzin prykład — razumnyja hadzińniki i branzalety roznych vytvorcaŭ. Jany pilna sočać za vašym snom i pačynajuć budzić vas tolki tady, kali vy znachodziciesia ŭ fazie pavierchnievaha snu, kab vašaje abudžeńnie było najmienš składanym.
Ale sapraŭdnaja era internetu rečaŭ nadydzie tolki tady, kali ŭsie rečy pobač z nami buduć nie tolki «razumnymi», ale jašče i buduć umieć uzajemadziejničać adna z adnoj tak, kab my hetaha navat nie zaŭvažali.
Vidavočna, što adbudziecca heta ŭžo zusim skora. Ale jak heta paŭpłyvaje na našaje žyćcio? Ci nie budzie niečakanych vynikaŭ?
«Internet rečaŭ pranikaje va ŭsio novyja i novyja śfiery. My budziem nazirać tendencyju, kali čałaviek budzie «abhornuty» technałohijami i «razumnymi» devajsami — heta ŭžo adbyvajecca. I heta, biezumoŭna, budzie rabić žyćcio bolš kamfortnym i mienš enierhazatratnym. Tamu zaraz aktyŭna raźvivajecca i budzie raźvivacca industryja fitnesu i zdarovaha ładu žyćcia — treba padtrymlivać bałans», — kaža Viktar Prakapienia.
Kamientary