Regnum: Katok Impieryi razdušyć kožnaha, chto stanie ŭ jaje na šlachu
Rasijski resurs Regnum u čarhovy raz daŭ trybunu aŭtaru, jaki ŭ źniavažlivaj formie vykazaŭsia nakont biełaruskaj dziaržaŭnaści. Sumna viadomy partał raźmiaściŭ u siabie pierakaz artykuła «Biełorusskij bałans ili špahat Łukašienko», jaki pieršapačatkova byŭ apublikavany na resursie «IA REX». U hetym artykule sustrakajecca vialikaja kolkaść vykazvańniaŭ, jakija krasamoŭnym čynam charaktaryzujuć staŭleńnie rasijskich impiercaŭ-čarnasociencaŭ da Biełarusi.
Aŭtar materyjału — Alaksandr Chałdziej, jakoha Regnum nazyvaje «ekśpiertam», vysoka aceńvaje zdolnaści kiraŭnika Biełarusi. Jon ličyć, što vialiki palityčny dośvied i instynkty dazvalajuć jamu «brać ad žyćcia ŭsio», i Rasija dazvalaje Biełarusi vielmi šmat. Ale rana ci pozna heta skončycca, i Biełarusi daviadziecca viartać usie pazyki. Našu krainu aŭtar nie ŭsprymaje jak surjozny abjekt.
«Jašče ŭ hady SSSR Biełaruś mieła pryvilejavanaje stanovišča. Tatarstan zaŭsiody kryŭdziŭsia, što pa ŭzroŭniu ekanomiki jon macniejšy za Biełaruś, a maje tolki status aŭtanomii, u toj čas jak słabaja Biełaruś była ažno cełaj sajuznaj respublikaj!», — piša Alaksandr Chałdziej.
Žurnalist «IA REX» ličyć, što Biełaruś siadzić na ryzykoŭnym špahacie pamiž dvuma hieapalityčnymi hihantami. Kiraŭnik Biełarusi Rasijaj abaraniajecca ad Jeŭropy, a Jeŭropaj — ad Rasii. Mienavita dla taho, kab padtrymlivać hety špahat, kiraŭnik Biełarusi admoviŭsia pryznavać niezaležnaść Paŭdniovaj Asiecii i Abchazii, a taksama pačaŭ «vypalvać u Biełarusi ŭsiu kulturnuju i palityčnuju elitu, aryjentavanuju na Ruski śviet».
Na dumku aŭtara, paśla 2020 hoda pazicyi Rasii tolki ŭzmacniacca, i jana stanie pravodzić jašče bolš aktyŭnuju palityku ŭ dačynieńni da Biełarusi, Ukrainy i krain Bałtyi, a paśla 2024 hoda adbudziecca sapraŭdnaje abjadnańnie Rasii, Biełarusi i Ukrainy.
«Ptuški hniazda Uładzimirava. Impiercy i technakraty. Jany buduć budavać Impieryju, i kryki miascovych kniaźkoŭ im buduć hłyboka abyjakavy. Katok Impieryi razdušyć kožnaha, chto stanie ŭ jaje na šlachu. I nie tamu, što Rasija takaja skvapnaja. Prosta ŭ śviecie, dzie budzie isnavać Šoŭkavy šlach z Kitajem, Indyjaj, Rasijaj, Jeŭrasajuzam i ZŠA, isnavańnie asobnaj Biełarusi, jakaja cielapajecca pamiž polusami pryciahnieńnia za ešałon nafty i tranš kredytu MVF, nie praduhledžana nijakimi scenarami», — ščyra apisvaje mary rasijskich čarnasociencaŭ Alaksandr Chałdziej.
Takuju budučyniu dla biełarusaŭ apisvaje impierac:
«Pad dacham Rasii Biełaruś, a hałoŭnaje — jaje hramadzianie, niezaležna ad nacyjanalnaści, viery, pierakanańniaŭ, dachodaŭ, zajmiejuć tolki ŭpeŭnienuju prystojnuju, a nie žabrackuju budučyniu i spakojnuju pierśpiektyvu. Jak i kavałki byłoj Ukrainy, jakija nie paśpieje prahłynuć Polšča, Rumynija i Vienhryja».
A pakul što, piša aŭtar, Maskva moŭčki cierpić svavolstva i kapryzy Minska, «staranna i mietadyčna nazapašvajučy rachunki dla apłaty».
Ciapier čytajuć
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie27
Kamientary