Staršynia Biełaruskaha sajuza mastakoŭ: Tak nizka, jak u klipie Hałyhina, biełarusaŭ jašče nie apuskali

Ź vialikaj prykraściu dy ahidaj pahladzieŭ u siecivie videaklip Vadzima Hałyhina i hurtu «Leninhrad», jakim hetyja «prikolnyje pacany» pavinšavali žančyn z pryhožym śviatam. Navat i nie pryhadaju, kali jašče nas, biełarusaŭ, tak nizka apuskali. Ałkašy, debiły, dehradanty, prydurki z trasiankovaj leksikaju alihafrenaŭ, jakaja pierakładajecca ŭ citrach na «pravilnyj vysokokulturnyj jazyk». I ŭsia hetaja padvalna-haražnaja brydota supravadžajecca bazarna-bardelnym choram tutejšych larvaŭ z prypievam «chočacca mužyka, lezie ŭ trusy ruka…». A dyryžyruje hetaju hidotaj narodny, zdavałasia b, artyst Jarmolenka, a na padpieŭkach — naša biźnies-women Hrybalova. Što j kazać, dychtoŭny ŭniosak u tvorčuju bijahrafiju.

Voś takimi nas, biełarusaŭ, bačać maskoŭskija «šnury» dy ich tutejšyja lokai, hatovyja za try panskija kapiejki pataptacca pa ŭłasnym honary, jakoha, padobna, niama, a moža nikoli j nie było. Dy kab tolki pa ŭłasnym, to j chaj sabie, ale ž pataptalisia jany pa nacyjanalnym honary kožnaha z nas, niezaležna ad taho, uśviedamlaje heta chto, ci nie. Bajusia, što bolšaść tutejšych paličyć heta prosta «kłassnym prikołom», prynamsi «tut.by» dy «Naša Niva» na svaich staronkach u interniecie nie pramarudzili ŭsłužyć viasiołamu «barinu».

Sprabuju, dy nijak nie vychodzić ujavić, što hetkaje niešta Šnur z dapamohaju tamtejšych «prikolistov», źniaŭ by, skažam, pra litoŭcaŭ, palakaŭ, łatyšoŭ, azierbajdžancaŭ, a tyja chucieńka pierapampoŭvali b «prikoł» na svaje staronki, kab jak najbolej «łabusaŭ», «azieraŭ» dy «pšekaŭ», pasmakavali toj plavok. Nie dumaju, što hetkaje mahčyma. A nami spadarstva, jak bačym, možna padciercisia, a my jašče i ŭściešylisia: «ach, kak prikolno!». Bo ŭžo zaraz «tut.by» zaklikaje na kancerty adepta rasijskaha brydkasłoŭja hurta «Leninhrad», jakija adbuducca ažno ŭ kastryčniku. Słužym «barinu» i prahniem, kab jon navaliŭ na nas jašče bolej.

Toj, chto dazvalaje nazyvać siabie bydłam, vidać, taho j zasłuhoŭvaje, a toj, chto robić vyhlad, što plavok u vočy — heta Božaja rasa, chaj pa-chałopsku ŭcirajecca dy jašče j padziakuje za smačny plavok, jaki, akazvajecca, usiaho tolki «kłassnyj prikoł». Nu a tyja, chto chamstva nazyvaje chamstvam, a demanstratyŭnuju abrazu — abrazaj, majuć usie šancy być zapisanymi ŭ «kołchoźniki» i «kuricy», tamu što z-za svajoj ciemnaty i tupaści nazaŭsiody zastalisia ŭ minułym stahodździ i nie razumiejuć vytančanaha humaru. «Nu kudy nam da našych ziemlakoŭ, prasunutych u maskoŭskuju hłamurnuju tuśniu?»

Čytajcie taksama: Žonka Hałyhina pra reakcyju na klip: Niepryhožyja kurycy bieź dziaciej i mužoŭ absmoktvajuć humar, jaki im nie zrazumieć!

Možna było b parazvažać nad pryrodaj tutejšaha plebiejstva dy samaaploŭvańnia j zanižanaha nacyjanalnaha imunitetu, ale zaraz nie pra heta. Zaraz mnie chaciełasia b pačuć adpaviednaje reahavańnie ad Ministerstva kultury dy Ministerstva infarmacyi našaj krainy. Bo chto, jak nie jany musiać dbać pra vobraz nacyi ŭ vačach tych, što klaniecca ŭ viečnaj lubovi j braterstvie.

Pryhadałasia raptam, jak kolki hadoŭ tamu niejkaja kamisija na čale z M.I. Čarhincom zabaraniała kancerty suśvietna znakamitaha niamieckaha hurta «Rammstein». Vo dzie, sapraŭdy «prikolno».

P.S. Zašmat było b honaru dla byłych hłamurnych biełarusaŭ palemizavać ź imi, tym bolš daŭno ŭžo nie strašna być imi zaličanym u retrahrady dy «kołchoźniki», što całkam pazbaŭlenyja pačućcia humaru dy samaironii. Nu tut sprava ŭ jakaści humaru: adna sprava — Žvaniecki ci, navat našy Saša i Siroža, druhaja — šnury z hałyhinymi. A hałoŭnaje — samy čas pryhadać biełarusam, što kaliści naš narod mieŭ da 7% šlachty, žyćciovym pryncypam i łozunham jakich byŭ klič «Honar maju!»

Žyvie Biełaruś!

• 0
• 0
• 0
• 0
• 0
• 0
• 0
• 0