U budynku Viarchoŭnaj Rady Ukrainy aryštavanaja deputatka parłamienta Nadzieja Saŭčanka — taja samaja lehiendarnaja pałonnaja lotčyca, jakuju ŭ svoj čas ź ciažkaściu vyzvalali z rasijskaj turmy.
Jaje abvinavačvajuć u padrychtoŭcy teraktaŭ u Kijevie, dziaržaŭnaha pieravarotu i zabojstva kiraŭnikoŭ krainy.
Hienprakuror Juryj Łucenka pakazaŭ u parłamiencie videa. Na im Saŭčanka prapanuje ździejśnić terakt u budynku Viarchoŭnaj Rady.
Na jaje dumku, usio kiraŭnictva krainy varta było źniščyć fizična ŭ adzin dzień, kali prezident Piatro Parašenka pryjedzie ŭ Radu sa štohadovym dakładam. Padčas jaho vystupu ŭ zale prysutničali b i ŭsie ministry. Saŭčanka navat papiarednie namalavała płan parłamienta.
Na videa vidać, što jana pahadžajecca ździejśnić terakt u jakaści śmiarotnicy. «Hieroi nie pamirajuć, nie pamierła tam, pamru tut», — zajaviła jana.
Pa viersii śledstva, Nadzieja Saŭčanka ŭ zmovie z Uładzimiram Rubanam i kiraŭnikom «DNR» Alaksandram Zacharčankam zapłanavali pieravieźci praź liniju raźmiežavańnia zbroju, ź jakoj ažyćciavić abstreł uradavaha kvartała Kijeva ź minamiotaŭ, źniščyć prezidenta, a taksama rasstralać deputataŭ parłamienta znutry.
«Adzinaje zło, jakoje nie daje miru Ukrainie, — heta ŭkrainskaja ŭłada», — zajaviła Saŭčanka pierad aryštam. Jana nie admaŭlaje svaju prysutnaść i svaje słovy na videa.
Nadzieja Saŭčanka ciapier znachodzicca ŭ adździele zabieśpiačeńnia dasudovaha śledstva SBU jak užo zatrymanaja asoba. Ź joj zaraz pravodzicca dopyt u jakaści padazravanaj u prysutnaści advakataŭ.
Rychtujecca chadajnictva ŭ sud ab abrańni miery strymańnia ŭ vyhladzie ŭtrymańnia pad vartaj.
Sud pa abrańni miery strymańnia adbudziecca ŭ piatnicu, 23 sakavika.
***
Nadzieja Saŭčanka naradziłasia ŭ 1981 hodzie ŭ Kijevie. Ukrainski vajskoviec, šturman-apieratar viertalota Mi-24 16-j asobnaj bryhady armiejskaj avijacyi Suchaputnych vojskaŭ Uzbrojenych Sił Ukrainy, kapitan. Hieroj Ukrainy. Deputat Viarchoŭnaj Rady.
U pačatku lipienia 2014 hoda była zachoplenaja bajevikami, vyviezienaja ŭ Rasiju i abvinavačana ŭ zabojstvie rasijskich žurnalistaŭ.
U rasijskaj turmie Saŭčanka nieadnarazova trymała haładoŭku ŭ znak pratestu. Była prysudžana da 22 hadoŭ źniavoleńnia.
U 2016 hodzie była abmienienaja na pałonnych rasijskich vajskoŭcaŭ.
Kamientary