Pakul Vakulčyk pa prośbie Łukašenki asvojvaje vytvorčaść łyžaroleraŭ i łyžaŭ, Ukraina zapałaniła svaimi łyžami Jeŭrasajuz

Pieršyja biełaruskija łyžarolery prademanstravaŭ staršynia KDB Biełarusi Valeryj Vakulčyk. Daručeńnie asvoić vytvorčaść łyžaroleraŭ, łyž i inšaha spartyŭnaha invientara dla masavaha sportu jamu davaŭ Alaksandr Łukašenka. Łyžarolery ŭžo zrabili, vytvorčaść łyž — nastupny etap.

Jak spraviadliva adznačyŭ vajskovy ahladalnik Andrej Parotnikaŭ, Dziaržynski zajmaŭsia biesprytulnikami, Bieryja — avijacyjaj i atamnaj bombaj, Andropaŭ kraŭ zachodnija technałahičnyja sakrety, a voś Vakulčyku daručyli kołcy da dzieraviačyny prykručvać.

Pavialičyć

Biełaruskaja dziaržaŭnaja prapahanda lubić chvalicca, jak biełaruskija ŭłady zachavali ŭsiu samuju lepšuju vytvorčaść z časoŭ SSSR, u toj čas jak u susiednich krainach savieckija zavody byli likvidavanyja. Ale situacyja z łyžami pakazvaje, što heta nie zusim praŭda.

Biełaruskaja fabryka ŭ Cielachanach, jakaja raniej vyrablała da 400 tysiač łyžnych par za hod, zaniapała, i z łyž pieraaryjentavałasia pieravažna na meblu.

U toj ža čas łyžnaja fabryka va ŭkrainskim Mukačavie nie tolki zachavała masavuju vytvorčaść łyž, ale i stała najbujniejšym vytvorcam łyž u Jeŭropie, a taksama najbujniejšym eksparcioram łyž u ES (bolš za 700 tysiač łyž za hod), apiaredziŭšy navat Kitaj (420,6 tysiačy). Dziŭna, ale heta ŭsio adbyłosia biez usialakich śpiecyjalnych daručeńniaŭ prezidenta Ukrainy albo niejkaha kantrolu z boku śpiecsłužb Ukrainy.

Pradpryjemstva ŭ Cielachanach tak za ŭsie hady i nie było pryvatyzavana: z 1998 hoda jano było pad jurysdykcyjaj Kiraŭnictva spravami prezidenta, z 2001 hoda — respublikanskaje ŭnitarnaje pradpryjemstva, a z 2010 hoda — filijał dziaržaŭnaha pradpryjemstva «Biełaruśhandal».

A voś ukraincy pryvatyzavali svajo pradpryjemstva, i ŭ 1996 hodzie było stvorana sumiesnaje ŭkrainska-aŭstryjskaje pradpryjemstva «Fischer-Mukačievo». I heta dało svaje vyniki.

Pavialičyć

85% usich vytvorčych mahutnaściej aŭstryjskaj karparacyi raźmiaścilisia na 19 zakarpackich hiektarach. Zaraz z kanviejera fabryki z 75-hadovaj historyjaj vychodzić kala 3,5 tysiačy par łyž u dzień i kala miljona ŭ hod.

Pavialičyć

Abarot u 2017 skłaŭ 38 miljonaŭ jeŭra z čystym prybytkam 3,3 miljona jeŭra. 1200 ukrainskich rabotnikaŭ zabiaśpiečvajuć čaćviortuju častku suśvietnaha rynku łyž. 99% pradukcyi z Zakarpaćcia idzie na ekspart.

Kampanija vyrablaje łyžy nie tolki pad brendam Fischer — u Mukačavie zachavali i lehiendarny saviecki łyžny brend «Cisa», jaki i zaraz maje svaich amataraŭ.

Taksama ŭ Mukačavie vyrablajuć śpiecyjalnyja łyžy dla ŭkrainskaj armii, chakiejnyja kluški, a taksama inšuju spartyŭnuju amunicyju.

Amal usia pradukcyja vyrablajecca ŭkrainskimi pracoŭnymi z ukrainskaj syraviny. Siaredni zarobak pracoŭnaha na pradpryjemstvie — 13 tysiač hryvień (kala 500 dalaraŭ).

• 0
• 0
• 0
• 0
• 0
• 0
• 0
• 0