Vosiem kankretnych paradaŭ i łajfchakaŭ, jak arhanizavać sabie tannaje padarožža

Źjaŭleńnie tannych avijakampanij źmianiła adpačynak ludziej pa ŭsim śviecie da niepaznavalnaści. Navošta pierapłačvać turystyčnaj firmie, kali možna arhanizavać adpačynak pad svaje patreby i biudžet? Navošta treścisia ŭ načnych aŭtobusnych turach u zachodniuju Jeŭropu, kali źlatać z Koŭna ŭ Kapienhahien ciapier možna za 18 jeŭra ŭ dva baki, a z Varšavy na plaž u Italii za 23 jeŭra ŭ dva baki — ceny, dastupnyja navat dla niebahataj siamji.

Asnoŭnaje, što spyniaje ludziej, — strach pierad čymści novym. I heta narmalna. Ale nasamreč bajacca niama čaho. Z čaho pačać tym, chto robić pieršyja kroki ŭ arhanizacyi svaich vandrovak? «Naša Niva» razam z servisam Aviasales.ru padrychtavała nabor paradaŭ, jakija dapamohuć zrabić padarožža jašče bolš tannym.

Tannyja avijalinii pa Jeŭropie dla biełarusaŭ — heta pieradusim vienhierskaja łaŭkost-avijakampanija Wizzair i irłandskaja Ryanair. Jany nie latajuć u Biełaruś, ale majuć rejsy ŭ Vilniu, Koŭna, Varšavu, Lublin, Kijeŭ i inšyja harady niepadaloku.

1. Paznajomciesia z kartaj nizkich cen

Dla pačatku prosta daviedajciesia, jaki ŭzrovień cenaŭ na pieraloty ŭ tym ci inšym nakirunku. U hetym dapamoža Karta nizkich cen.

Spraktykavany vandroŭnik viedaje, što kvitki ŭ Skandynaviju amal zaŭždy tannyja, a ŭ Armieniju niadoraha nie dabiarešsia nijak. Ale takija viedy prychodziać z vopytam. Tamu spačatku pahulajcie z kartaj.

Naprykład, kudy možna niadoraha źlatać ź Vilni ŭ červieni? Abirajecie miesca pryznačeńnia «kudy zaŭhodna» i čas padarožža «červień». Sistema padkazvaje, što pieraloty ŭ Šviecyju pačynajucca ad 10 jeŭra, Narviehiju — ad 17 jeŭra, Italiju — ad 23 jeŭra

Pavialičyć

Kali ŭzrovień cenaŭ padabajecca, možna pierachodzić dalej i padbirać bolš kankretnyja daty.

2. Padbiarycie zručnuju datu

Asablivaść łaŭkostaŭ u tym, što ceny na pieraloty u susiednija dni mohuć adroźnivacca ŭ razy. Kali dla vas pryncypova palacieć 1 červienia, to daviadziecca pahadžacca na lubuju canu. Ale zvyčajna ludzi płanujuć adpačynak prosta na «pačatak červienia» i majuć jakuju-nijakuju hnutkaść.

Znajści samy ŭdały dzień dla vandroŭki dapamoža Kalandar nizkich cen. 

Jakija samyja tannyja pieraloty ź Vilniu ŭ červieni? Za 10 jeŭra možna palacieć 25 červienia ŭ Stakholm, za 20 jeŭra — 19 červienia ŭ Hdańsk i 27 červienia — u Łondan.

Pavialičyć

Niekatoryja servisy šukajuć kvitki tolki ŭ łaŭkost-kampanijach, Kalandar nizkich cen ad Aviasales.ru uličvaje taksama i «kłasičnyja» avijakampanii, naprykład, tuju ž Biełavija.

Adznačym, što takija servisy padboru kvitkoŭ nie pradajuć kvitki sami. Paśla padboru dat jany prapanujuć pierajści na sajt-ahrehatar ci niepasredna da avijapieravozčyka i nabyć kvitki tam.

3. Paraŭnajcie košt hatela ŭ roznych sistemach braniravańnia

Uziaŭšy avijakvitki i adrezaŭšy šlachi adstupleńnia, samy čas pakłapacicca pra žyllo. Apłačvać hateli možna praź lubuju ź dziasiatkaŭ sistem braniravańnia. Usie jany pracujuć pa adnolkavaj sistemie — pryvodziać u hatel turystaŭ, ale zabirajuć sabie peŭnuju častku hrošaj, časam až da traciny ahulnaj sumy.

Samy papularny servis braniravańnia hatelaŭ u śviecie — Booking.com. Apošni hod jon pravodzić ahresiŭnuju ekspansiju, imknučysia razdušyć kankurentaŭ vahoj. Naturalna, im davodzicca trymać boj i zmahacca za klijenta. U takoj situacyi ŭ kožnaha turysta jość mahčymaść skarystacca situacyjaj z vyhadaj dla siabie.

Hałoŭnaja parada — paraŭnajcie košt hatela ŭ roznych sistemach braniravańnia. Za adzin i toj ža pakoj cana moža adroźnivacca ŭ niekalki razoŭ. Dla takich metaŭ jość šmat servisaŭ, jakija pracujuć pa adnolkavym pryncypie. Naprykład, u Aviasales.ru jość raździeł «Hateli».

Prosta zabivajecie patrebny horad, daty i kolkaść čałaviek. Dalej možna skarystacca i pašyranym pošukam. 

Pavialičyć

U roznych vypadkach samaja tannaja sistema braniravańnia moža adroźnivacca — časam najlepšuju canu prapanuje «Astravok», časam Agoda, a časam i «Bukinh».

Paznačcie sabie toj varyjant, što najbolš spadabaŭsia, ale nie śpiašajciesia braniravać. Možna pasprabavać jašče trochi skinuć canu. Jak?

4. Źviarnicie ŭvahu na vodhuki

Pieradusim abaviazkova pačytajcie mierkavańni tych, chto ŭžo žyŭ u hateli, da jakoha vy pryhladaciesia. Hetyja parady dapamohuć vam nie trapić u śmiardziučaje miesca z kłapami.

I heta nie žart — kali vy, prykładam, budziecie šukać numar na dvaich u Ńju-Jorku, samym tannym varyjantam apyniecca niejki pačvarny World Hotel u kitajskim kvartale. Pražyvańnie tam kaštuje niemałyja $58 za noč, ale…

«Numar realna 2ch2 mietry. My pražyli ŭ hetym hateli 5 načej. Za hety čas my ŭbačyli adnaho kłapa, jaki ŭkusiŭ muža … Ja spać kłałasia, jak da vajny rychtavałasia, mazała siabie kremam, tamu što kłapy nibyta nie lubiać pachaŭ rezkich))) Nu ŭ cełym, kali realna tolki paspać, možna było ciarpieć sa skrypam, ale tudy bolš nie nahoj)», — havorycca ŭ pieršym ža vodhuku. 

Pavialičyć

Naturalna, takich hatelaŭ lepš paźbiahać. Darečy, samaja vialikaja baza vodhukaŭ mienavita u «Bukinha».

5. Vykarystoŭvajcie kupony

Mnohija sistemy braniravańnia dazvalajuć pry apłacie prymianiać śpiecyjalnyja źnižki. Takija kupony byvajuć albo ahulnadastupnymi, albo piersanalnymi, jakija čas ad času prychodzić vam na asabistuju poštu ŭ jakaści rekłamy.

«Atrymajcie źnižku $20 pry braniravańni ad $200», «atrymajcie źnižku 12% pry apłacie praz mabilny dadatak», «atrymajcie treciuju noč biaspłatna pry braniravańni dźviuch načej» — bieźlič padobnych varyjantaŭ hulajuć pa internecie, choć umovy prymianieńnia kuponaŭ mohuć być roznymi. Ź ciaham času vy navučyciesia virtuozna manieŭravać pamiž hetymi prapanovami i abirać sapraŭdy vartyja.

Tamu pierad braniravańniem prosta zahuhlicie niešta nakštałt «kupon Agoda» ci «proma Astravok» z nazvaj patrebnaj sistemy braniravańnia.

Jość i servisy z pastajannymi źnižkami. Naprykład, u Cheaptickets.com na startavaj staroncy zaŭsiody adlustroŭvajecca promakod, jaki daje źnižku 15—18% pražyvańnia.

A servis Hotels.com zaličvaje na vaš unutrany rachunak 10% ad koštu pražyvańnia. Kali vy spynilisia ŭ hateli za $50, to $5 ź ich «adkładajecca» na paśla. Jak nabieracie 10 načej u roznych hatelach, zmožacie atrymać biaspłatnaje pražyvańnie na adkładzienuju sumu.

Apošnim časam z dadatkovymi źnižkami staŭ hulacca i «Bukinh».

«Zaprasicie siabra na Booking.com. Jon atrymaje 10%, a vy — $15!» — padobnyja prapanovy vyśviečvajucca ŭ mnohich akaŭntach. Paprasicie, kab niechta z vašaj siamji dasłaŭ vam takuju spasyłku. Kali vy, naprykład, zabranirujecie pa joj hatel za 30 dalaraŭ, spačatku daviadziecca spłacić poŭnuju sumu. A prykładna praź miesiac «Bukinh» pieraličyć na kartku adnamu $3 (10% ad koštu pražyvańnia), a druhomu — $15. U vyniku realny košt hatela składzie $12.

6. Praviercie «harantavanuju canu»

Mnohija sistemy braniravańnia prapanujuć vam pahulać u takuju zabaŭku: maŭlaŭ, my pradajem numar u hateli za $100. Ale kali raptam vy adšukajecie niedzie nižejšuju canu, paviedamicie nam — i my apuścim svaju canu dla vas.

Čym karysny padobny servis? Nie zabyvajcie, što zhadany vyšej Hotels.com zaŭsiody daje vam zaličeńnie hrošaj «na budučyniu». Kali ŭ hetaj sistemie hatel budzie kaštavać $50, a ŭ niejkaj inšaj — $45, vy prymusicie Hotels.com apuścić svaju canu da $45. A paśla jašče i atrymajecie pa ahulnych umovach servisa zakonnyja $5 na svoj unutrany rachunak. Takim čynam realna hatel budzie kaštavać $40.

7. Pahulajcie sa «ślapymi hatelami»

Dadatkovuju mahčymaść kali nie aščadzić, to chacia b zadavolić azart, dajuć sistemy «ślapoha» braniravańnia hatelaŭ.

Jak pracuje heta schiema? Tłumačym na prykładzie servisa Hotwire.com.

Kali vy ŭvodzicie ŭ pošuk patrebnyja horad i datu, vam prapanujecca varyjant: naprykład, čatyrochzorkavy hatel u centry Ryma za $ 60 biez padatkaŭ (jany dadaducca na apošnim etapie braniravańnia). Nazva hatela i ŭsia padrabiaznaja infarmacyja pra jaho pryjdzie na vašu elektronnuju poštu. Ale tolki paśla apłaty! Faktyčna vy kuplajecie kata ŭ miechu, pryčym biez mahčymaści admieny braniravańnia.

Pavialičyć

Časam «uślapuju» možna atrymać hatel udvaja tańniejšy, čym było b pry kupli «ŭ adkrytuju» — jak pašancuje.

8. Apošni etap padrychtoŭki padarožža — łahistyka padčas vandroŭki

Dla pieršasnaha znajomstva ź situacyjaj možna paraić servis Rome2rio.com. Naprykład, uvodzim u pošuk: jak dabracca z Ryma ŭ Miłan. Sistema padkazvaje, što aŭtobus budzie iści kala 5 hadzin i kaštavać ad 30 jeŭra. Daroha ciahnikom zojmie kala 3 hadzin i abydziecca ŭ 35 jeŭra, a jechać na aŭtamabili treba budzie piać z pałovaj hadzin, addaŭšy na bienzin i płatnyja darohi kala 70 jeŭra.

Pavialičyć

Heta vielmi prybliznyja acenki, bo pry peŭnym sprycie možna nabyć kvitok na aŭtobus u hetym kirunku za 5 jeŭra, a kvitok na ciahnik (chaj i bolš marudny) za 9 jeŭra. Adnak ahulnaje ŭjaŭleńnie pra adlehłaści i ŭzrovień cenaŭ daje.

Pišycie ŭ kamientarach pra toje, jak ekanomicie ŭ padarožžach!

Partniorski tekst z Aviasales.ru

• 0
• 0
• 0
• 0
• 0
• 0
• 0
• 0