Razam z fitnes-trenierkaj, stvaralnicaj telehram-kanała pra zdaroŭje i pravilnaje charčavańnie Leraj Kazakievič raźbirajemsia, ci treba niejkim čynam padstrojvać hrafik trenirovak pad miesiačnyja i kali sport u čyrvonyja dni pryniasie karyść, a kali — nie.
— Kožnaja faza žanočaha cykła supravadžajecca peŭnymi źmienami ŭ harmanalnaj i niervovaj sistemie. Davajcie raźbiarom ich pa čarzie.
Mienstrualnaja faza (1—5 dzień cykła)
Heta toj samy momant, kali my nazirajem kryvaciok. U arhaniźmie zapavolvajecca abmien rečyvaŭ, zatrymlivajecca vadkaść. Niaredka my chodzim nibyta «śmiašaryki», stanovimsia niaŭvažlivymi, hatovymi razarvać usich na šmatki. Častata dychańnia i sercabićcia źnižajecca. U hety pieryjad lepš źnizić intensiŭnaść trenirovak i vyklučyć praktykavańni, jakija patrabujuć natužvańnia (prysiadańni, žymy nahami). Nie varta taksama rabić praktykavańni na pres.
Postmienstrualnaja faza (6—12 dzień cykła)
U hety pieryjad u kryvi stanovicca bolš harmonu estrahienu. My adčuvajem siabie bolš badziorymi i dabrejem na vačach. Lepš nie prapuskać hety momant i treniravacca ŭ taki pieryjad pa maksimumie.
Faza paśla avulacyi (15—24 dzień)
Tut pačynajecca PMS. Harmony znoŭ mianiajuć svaju kancentracyju, abmiennyja pracesy paskarajucca, a pracazdolnaść pavialičvajecca. Ciapier u vas jość siły na ŭsio: rvać, kidać i nie tolki. Praŭda, tolki ŭ tym vypadku, kali PMS vy pieranosicie spakojna.
Faza pierad novaj mienstruacyjaj (24—28 dzień)
Kancentracyja harmonaŭ u kryvi zusim schodzić na ništo, siły pakidajuć vas, tamu tut lepš źvieści treniroŭki da minimumu, ale admianiać zusim nie varta (tolki kali vy zusim nie hublajecie prytomnaść).
Vysnovy:
Kali vy rehularna i staranna trenirujeciesia, to PMS zvyčajna prachodzić lahčej i spakajniej, a padčas krytyčnych dzion źnižajucca bolevyja adčuvańni. Dziakujučy treniroŭkam, palapšajecca krovazvarot, a adpaviedna — harmony chutčej pieranosiacca ad załoz da kletak-mišeniaŭ.
Ale, jak ni kruci, u pieršuju čarhu važna ŭmieć prysłuchoŭvacca da svajho arhanizma i prymać rašeńnie nakont taho, treba treniravacca ci nie, abapirajučysia tolki (!) na ŭłasnyja adčuvańni (i na dyjahnazy, źviazanyja z najaŭnaściu ci adsutnaściu chraničnych zachvorvańniaŭ). Jana zaŭsiody lepšyja za lubyja rekamiendacyi.
Kamientary