Ci razmaŭlajuć futbalisty zbornaj pa-biełarusku? APYTANKA
3 vieraśnia na placoŭcy la Nacyjanalnaha mastackaha muzieja prajšła prezientacyja novaj formy zbornaj Biełarusi pa futbole. Usia impreza adbyvałasia vyklučna pa-biełarusku. Forma taksama zroblenaja z nacyjanalnymi matyvami.
«NN» spytałasia hulcoŭ hałoŭnaj kamandy krainy, ci ŭmiejuć jany razmaŭlać pa-biełarusku i kali karystalisia našaj movaj.
Ivan Majeŭski («Astana», Kazachstan)
«Tak, ja ŭmieju razmaŭlać pa-biełarusku. Ale, na žal, vielmi doŭha nie karystaŭsia rodnaj movaj. Ja niekatory čas hulaŭ u Polščy, tamu ŭ majoj hałavie šmat zbłytana słovaŭ. Ja liču, što my pavinny razmaŭlać pa-biełarusku. Toje, što prezientacyja prajšła ŭ takim fajnym miescy — heta dobry znak. Kali vučyŭsia ŭ škole, to vielmi dobra i razmaŭlaŭ, i šmat čytaŭ pa-biełarusku. Pomniu z taho času i Vasila Bykava, i Janku Kupału, i Jakuba Kołasa. Heta tyja asoby, kaho pavinien viedać kožny». (Adkazvaŭ pa-biełarusku).
Ihar Stasievič (BATE, Barysaŭ)
«U paŭsiadzionnym žyćci razmaŭlaju vielmi-vielmi redka, ale mahu. Kali zamiežniki prosiać niešta skazać pa-biełarusku, to spakojna mahu heta zrabić. Koła znosinaŭ u mianie ruskamoŭnaje. Staŭleńnie da biełaruskaj movy vyklučna pazityŭna, heta naša rodnaja mova. Kali ty dobra viedaješ biełaruskuju movu, to jana nadzvyčaj pryhoža hučyć. U mianie dobryja nastaŭniki byli ŭ škole biełaruskaj movy». (Adkazvaŭ pa-rusku).
Stanisłaŭ Drahun (BATE, Barysaŭ)
«Trochu razmaŭlaju. Sa škoły jašče viedy zastalisia. U mianie vydatnaje staŭleńnie da biełaruskaj movy. Heta naša rodnaja mova, treba jaje lubić, tym bolš jana takaja pryhožaja». (Pieršaja fraza pa-biełarusku, astatnija pa-rusku).
Pavieł Niachajčyk («Dynama», Brest)
«Kali navučaŭsia ŭ škole, to vydatna viedaŭ biełaruskuju movu. Moh na joj svabodna adkazvać. Ciapier žyćcio prachodzić na ruskaj movie. Kab skazać niešta pa-biełarusku, to treba ŭspomnić słovy, padumać. Paśla škoły čytaŭ Vasila Bykava. Na žal, šmat čaho zabyŭsia i tak lohka, jak raniej, nie mahu na joj razmaŭlać. Chacia niešta atrymlivajecca (śmiajecca)». (Adkazvaŭ pa-biełarusku).
Alaksandr Martynovič («Krasnadar», Rasija)
«Tak, ja razmaŭlaju pa-biełarusku. U škole dobra vučyŭ movu. Pomniu Janku Kupału, Jakuba Kołasa. Heta našaja kraina, našaja mova i jaje pavinien viedać kožny». (Adkazvaŭ pa-biełarusku).
Anton Saroka («Łokieren», Bielhija)
«Razmaŭlaju pa-biełarusku, ale nie vielmi dobra». (Adkazaŭ pa-biełarusku hetuju frazu i źbieh).
Juryj Kiendyš («Šeryf», Małdova)
«Ja ŭsio razumieju, ale sam nie razmaŭlaju. Ja b moh pasprabavać, ale heta budzie vyhladać niedarečna. Absalutna narmalnaje ŭ mianie staŭleńnie. Kamu jak zručniej razmaŭlać. U mianie mama z babulaj tolki pa-biełarusku razmaŭlajuć. Ja ŭsio cudoŭna razumieju i staŭlusia da movy tolki pazityŭna». (Adkazvaŭ pa-rusku).
Kamientary