«Vieranika-i-Jura», «Śviatłana-i-Siarhiej». Navošta pary zavodziać sumiesnyja akaŭnty ŭ sacsietkach?
Sacyjalnyja sietki daŭno stali našym svojeasablivym daśje, jakoje my (na ščaście?) možam skłaści pra siabie sami: niejkija fakty prycharašyć, niejkija — schavać, adny fotazdymki pakinuć u archivach, a inšymi, z adpačynku, spamić jašče niekalki tydniaŭ paśla viartańnia na radzimu, farmirujučy paśpiachovy vobraz.
Sacsietki (kali heta nie siamiejnyja forumy) zaŭsiody byli asabistaj terytoryjaj karystalnikaŭ, z vyklučna ich mastackimi srodkami i praviłami. Adnak u peŭny momant u Adnakłaśnikach, va Ukantakcie i navat u instahramie pačali źjaŭlacca parnyja akaŭnty: čaściej za ŭsio, takim čynam zakachanyja parački dadatkova zajaŭlajuć usim pra svaje adnosiny.
Dla niekatorych ich znajomych pierachod asoby ŭ status «my» zamiest «ja» vyhladaje jak varjactva i kachańnie hałaŭnoha mozhu, dla kahości navat źjaŭlajecca śviedčańniem taho, što niechta z dvaich u siamji «padabcaśnik».
My ž źviarnulisia da pieršakrynic i raspytali niekalki biełaruskich par, navošta jany zaviali sumiesnyja akaŭnty.
Śviatłana i Siarhiej Baravikovy, Horki
— Razam my ŭžo 9 hod, ź ich u šlubie — 6. Sumiesny akaŭnt zaviali adrazu paśla viasiella ŭ 2013 hodzie. Ideju padała ja, muž byŭ nie suprać. Jamu, zdajecca, navat heta pryjšłosia da dušy.
Dla nas sumiesny akaŭnt — heta, pa-pieršaje, simvał našaha kachańnia i davieru. U naš čas vielmi šmat dziaŭčat nie mohuć navučycca daviarać svajmu chłopcu, mužu, pieražyvajuć kožny raz, kali jon piša niešta ŭ sacyjalnych sietkach, a paśla ŭpotaj biaruć jaho telefon, kab chucieńka ŭsie pravieryć. Heta niapravilna.
Davier — heta hałoŭnaje ŭ lubych adnosinach.
Staronka pryviazanaja da pošty Śviatłany, niejkich asablivych pravił, jak joj karystacca, u nas niama: parol viedajem aboje.
Možam siadzieć u internecie razam (tak navat kudy bolš cikava): čytajem, što novieńkaha ŭ siabroŭ, prahladajem fotazdymki, videa, paviedamleńni ad znajomych…
Apošnija prychodziać nam abaim, bo ŭ nas šmat ahulnych znajomych. Na niekatoryja ź ich ja mahu adkazać za muža, a jon pačytaje ich paśla, na inšyja — jon adkaža za mianie.
Viadziom akaŭnt my taksama razam, praŭda, fotazdymki i ich abnaŭleńni — zona adkaznaści žonki. Kali naradzilisia dzietki, to na staronku dadalisia fotazdymki ź imi.
Na naš pohlad, svaboda ŭ adnosinach, kaniečnie, pavinna być, treba i adpačyć ad partniora časam. Tamu moj muž spakojna vybirajecca ź siabrami na rybu, a ja mahu pravieści čas ź siabroŭkami. Ale što tyčycca novych znajomstvaŭ, dla jakich i stvoranyja sacsietki… Nie baču ŭ ich sensu. Kali ty sustreŭ druhuju pałavinku, u vas ščaślivaja siamja, navošta vam niechta jašče?
Piatro i Julija Karpickija, Orša
Piotr: «Vieści sumiesnuju staronku prapanavaŭ ja. Heta adbyłosia, kali my adčuli: voś toj momant, kali možna ŭsio dzialić na dvaich. Jana ŭspryniała prapanovu narmalna. Z tych časoŭ u nas adzin na dvaich parol, karystajemsia staronkaj, chto kali moža, kožny adkazvaje na paviedamleńni, jakija adrasavanyja mienavita jamu.
U nas jašče jość ahulnaja staronka ŭ Adnakłaśnikach, jak i ŭ mnohich tam, ale, akramia hetaha, paralelna isnujuć indyvidualnyja staronki va Ukantakcie. Ale i ad ich my viedajem paroli: ja — jaje, jana — moj.
Dla nas usio heta jak akt davieru: navošta adnosiny, kali ŭ vas jość niejkija schavanyja fakty?
Kali ŭ nas źjaviacca dzieci, dumaju, my vydalim asobnyja staronki i pakiniem tolki ahulnuju, dzie budziem pościć usio pa temie siamji».
Ihar i Śviatłana Piatrovy, Smalavičy
— My zaviali sumiesny akaŭnt, kali źjechali ad baćkoŭ i pačali žyć razam:
da hetaha na hlebie reŭnaści nam abaim pryjšłosia vydalić svaje staronki, bo my svarylisia praz toje, što niechta łajknuŭ kahości nie taho, napisaŭ kamientar pad čužoj avatarkaj i hetak dalej. Kali staronka adna, praściej.
U nas abaich jość ad jaje parol, my možam karystacca staronkaj adnačasova. Ja zachodžu, kab pačytać miascovyja naviny, pahladzieć śmiešnyja miemy, muž taksama hartaje stužku, moža šukać infu pra mašyny ŭ tematyčnych supołkach. Kali kamuści z nas prychodzić paviedamleńnie, my nie adkryvajem, kali jano adrasavanaje inšamu. Z asabistaha ŭ nas tolki vajbier.
My aboje vielmi raŭnivyja, i choć razumiejem, što tak nielha, ničoha zrabić nie možam. Pra novyja znajomstvy nie moža być i havorki, tamu my i viadziom ahulnuju staronku.
Vieranika i Juryj Kazłovy, vioska Karma Dobrušskaha rajona
— My razam užo vosiem hod, pryblizna hod piać tamu ja prapanavała mužu vieści supolnuju staronku va Ukantakcie. Nam niama čaho chavać adzin ad adnaho, praŭda, reŭnaść usio roŭna nikudy nie dziełasia.
Staronka pryviazanaja da majoj pošty, muž viedaje ŭsie paroli. Pa-mojmu, vielmi zručna, kali ŭsia infarmacyja pra siamju u adnym miescy: supolnyja fotazdymki, infarmacyja pra raźvićcio, styl dziaciej i hetak dalej.
Alaksandr i Śviatłana Martyškiny, Maładziečna
— Ahulnaja staronka ŭ Adnakłaśnikach źjaviłasia ŭ naš pieršy sumiesny hod žyćcia — heta ž profil našaj siamji, usio łahična. Plus my razam raźbiralisia ŭ tym, jak tam usio pracuje.
My supolna vyrašajem, što pisać na «ścianie», čym dzialicca ź siabrami, jakija fotazdymki vystaŭlać… Bolš na staroncy znachodžusia ja, adkazy na paviedamleńni — taksama za mnoj, ale niekatoryja paviedamleńni nadyktoŭvaje muž. Profil naš mianiajecca z kožnym dniom, bo dzietki (u nas dźvie pryhažuni) mianiajucca, i fotazdymkaŭ ź imi prosta nie źličyć!
Dla nas sacsietki ŭ cełym nie vielmi važnaja častka žyćcia: pryjemna, kaniečnie, dzialicca emocyjami sa svaimi siabrami i radavacca čužym pośpiecham, ale kab Adnakłaśnikaŭ nie stała, my b z mužam nie rasstroilisia b dakładna.
Mierkavańnie śpiecyjalista:
Prakamientavać hetuju źjavu my paprasili psichołaha Centra paśpiachovych adnosin Janinu Kanoŭka:
— Kali viadziecca havorka pra adnosiny, psichałohija prytrymlivajecca nastupnaj pazicyi: usio, što aboje (!) partnioraŭ ličać dla siabie narmalnym i adekvatnym, takim dla ich i źjaŭlajecca. Kali i pieršaha, i druhoha zadavalniaje najaŭnaść vyklučna sumiesnych staronak u sacsietkach, im tak kamfortna i biaśpiečna, to ŭsio narmalna. U niekatorych par mohuć być ahulnyja siabry, kampanii — tady čamu b i nie adkazvać im razam. Praŭda, pa maich nazirańniach, čaściej za ŭsio zachapleńnie sumiesnymi akaŭntami charakterna maładym param, u jakich adnosiny tolki pačalisia: heta svojeasablivaja ramantyzacyja pačućciaŭ, imknieńnie da poŭnaha jadnańnia.
Kali ž adzin raŭnavaŭ, a inšy pajšoŭ na ŭstupki, zdaŭsia i tak źjaviŭsia sumiesny akaŭnt — heta niapravilna. Iści na sastupki možna biaskonca, a ŭ vyniku zrazumieć, što vaša asabistaja prastora maksimalna zvuziłasia, vy dazvolili inšamu čałavieku kantralavać žyćcio całkam. U majoj praktycy byli situacyi, kali klijentka praz 10-15 hod voś takoha kantrolu pačynała razumieć, što jaje heta nie zadavalniaje i starałasia vybudavać ułasnyja miežy nanoŭ — naturalna, mužčynu heta nie padabałasia. Čamu stolki hod usio było dobra, a tut źnianacku źmianiłasia? Kanflikty niepaźbiežnyja: baraćba z unutranym hołasam rana ci pozna da hetaha pryvodzić.
Pytańnie reŭnaści takim čynam dakładna nie vyrašyš. Dapuścim, stvaryli vy supolnyja akaŭnty va ŭsich sacsietkach, a što budziecie rabić ź miesiendžarami nakštałt Telehrama ci Vajbiera? Stvareńnie sumiesnaha akaŭnta — heta tolki paviarchoŭnaje rašeńnie prablemy reŭnaści, jakaja nasamreč siadzić hłyboka ŭ čałaviečaj psichicy, i ŭ asobnych vypadkach ciahniecca karaniami ź dziacinstva, u inšych ža, jak ličać niekatoryja śpiecyjalisty, uvohule zakładziena ŭ hienietyčnym kodzie. Kantralavańnie pierapiski daść pamyłkovaje pačućcio spakoju na niejki čas, sapraŭdny ŭzrovień davieru takija dziejańni nie stvarajuć. Paśla sacsietak chočacca kantralavać usio novyja śfiery žyćcia.
Takim čynam, kali aboje čałaviek u pary ščyra chočuć stvaryć ahulny akaŭnt z punktu hledžańnia kamfortu i ŭzajemnaha davieru — heta vydatna. Ale kali padobnaje adbyvajecca dla kantrolu svajho partniora i niemahčymaści ŭcichamiryć reŭnaść — značyć, nadyšoŭ čas dla ščyraj razmovy, a taksama dla vyrašeńnia hłybokich unutranych pytańniaŭ na šlachu da psichałahičnaj stałaści.
Ciapier čytajuć
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza19
Kamientary