Ministerstva achovy zdaroŭja raskazała, jakija źmianieńni ŭniesieny ŭ paradak afarmleńnia i vydačy listkoŭ niepracazdolnaści i daviedak ab časovaj niepracazdolnaści, paviedamlaje BIEŁTA.
Tak, u suviazi ź pierachodam na afarmleńnie listka niepracazdolnaści (daviedki ab časovaj niepracazdolnaści) u formie elektronnaha dakumienta ŭstanoŭleny novyja formy hetych dakumientaŭ i paradak ich afarmleńnia. Razam z tym vyznačana, što błanki listkoŭ niepracazdolnaści (daviedak ab časovaj niepracazdolnaści), jakija byli zrobleny da ŭstupleńnia ŭ siłu novaŭviadzieńniaŭ, buduć sapraŭdnyja da poŭnaha ich vykarystańnia na ŭsioj terytoryi krainy.
Udakładniena koła asob, jakim vydajecca listok niepracazdolnaści i daviedka ab časovaj niepracazdolnaści, a taksama detalizavany vypadki ich vydačy. Ludziam pracazdolnaha ŭzrostu, jakija nie pracujuć i nie znachodziacca na ŭliku ŭ orhanach pa pracy, zaniataści i sacyjalnaj abaronie ŭ jakaści biespracoŭnych budzie vydavacca daviedka ab časovaj niepracazdolnaści.
Praduhledžana vydača daviedki ab časovaj niepracazdolnaści tym, chto dahladaje invalida I hrupy, u vypadku stacyjanarnaha lačeńnia asoby, jakaja faktyčna ažyćciaŭlaje hety dohlad.
Vyznačany paradak vydačy listka niepracazdolnaści pa dohladzie chvoraha dziciaci va ŭzroście da troch hadoŭ, dziciaci-invalida va ŭzroście da 18 hadoŭ u vypadku, kali maci abo asoba, jakaja faktyčna ažyćciaŭlaje dohlad, adnačasova pracuje na ŭmovach niapoŭnaha rabočaha času, abo doma, abo navučajecca.
U takim vypadku listok niepracazdolnaści vydajecca tolki maci abo tamu, chto faktyčna dahladaje dzicia. Pry hetym praduhledžana mahčymaść vydačy daviedki ab časovaj niepracazdolnaści inšaj asobie pa dohladzie chvoraha dziciaci va ŭzroście da troch hadoŭ (dziciaci-invalida va ŭzroście da 18 hadoŭ).
Jość mahčymaść pradoŭžyć listok niepracazdolnaści (daviedku ab časovaj niepracazdolnaści) čałavieku, jaki ažyćciaŭlaje dohlad chvoraha dziciaci va ŭzroście da 14 hadoŭ (dziciaci-invalida va ŭzroście da 18 hadoŭ), pry akazańni im mieddapamohi ŭ stacyjanarnych umovach, na adzin dzień dla prajezdu da miesca žycharstva (znachodžańnia) u suviazi z addalenaściu arhanizacyi achovy zdaroŭja i niemahčymaściu ŭ dzień vypiski dajechać damoŭ.
Udakładnieny paradak vyznačeńnia nieabchodnaści dohladu dziciaci-invalida pry jaho sanatorna-kurortnym lačeńni abo miedycynskaj reabilitacyi ŭ adpaviednych ustanovach. Ciapier budzie vyznačacca nieabchodnaść u dohladzie dziciaci-invalida va ŭzroście da 10 hadoŭ, a taksama dziciaci-invalida va ŭzroście starejšym za 10 hadoŭ z treciaj abo čaćviortaj stupieńniu straty zdaroŭja.
Pry vyrašeńni pytańnia ab vydačy listka niepracazdolnaści (daviedki ab časovaj niepracazdolnaści) pa dohladzie dziciaci va ŭzroście da troch hadoŭ (dziciaci-invalida va ŭzroście da 18 hadoŭ) u vypadku chvaroby maci nie budzie patrabavacca paćviardžeńnie ab naviedvańni dziciem dziciačaha sada (ustanovy adukacyi, inšaj arhanizacyi, indyvidualnaha pradprymalnika, jakim u adpaviednaści z zakanadaŭstvam pradastaŭlena prava ažyćciaŭlać adukacyjnuju dziejnaść, jakija realizujuć adukacyjnyja prahramy daškolnaj adukacyi i śpiecadukacyi na ŭzroŭni daškolnaj adukacyi).
Vyznačany paradak vydačy dakumientaŭ, što zaśviedčvajuć nieabchodnaść u dohladzie chvoraha dziciaci ŭ ambułatornych umovach, jaki ŭ pieryjad patrebnaści ŭ dohladzie dasiahnuŭ 14-hadovaha ŭzrostu. Pry dasiahnieńni im 14-hadovaha ŭzrostu listok niepracazdolnaści (daviedka ab časovaj niepracazdolnaści) zakryvajecca. Novy listok niepracazdolnaści vydajecca jak pieršasny. Paśla zakančeńnia 7-dzionnaha terminu časovaj niepracazdolnaści vydajecca daviedka ab časovaj niepracazdolnaści.
Novaŭviadzieńni ŭstupajuć u siłu z 31 studzienia 2019 hoda.
Kamientary